Qo sa ikatolu ni yabaki na kena vakarautaki na ivakamacala ni vidio ena noda soqo ni veiwasewase. E yaga vakalevu na iwalewale qo vei ira na mataboko, se o ira e leqa na matadra. Na vakarautaki ni ivakamacala ni vidio e laurai kina nodra sasaga vagumatua na tacida. Mera vakarautaka na kakana vakayalo vei ira e rauta ni 43 na milioni na mataboko, kei na 295 na milioni e vakaleqai na matadra.

E kaya o Dr. Joel Snyder na peresitedi ni isoqosoqo na Audio Description Associates, LLC, e kenadau tale ga ena vakarautaki ni ivakamacala ni vidio: “Au qoroya vakalevu na ka era cakava na iVakadinadina i Jiova mera vakarautaka na itukutuku vei ira na mataboko, kei ira e leqa na matadra. Levu era sega ni dau kauaitaka na vakarautaki ni ivakamacala ni dua na vidio. Au vakavinavinakataki kemuni gona na iwalewale oni cakava qo.”

Ena vuku ni COVID-19, e vakatulewataka kina na iLawalawa Dauvakatulewa meda sema ena internet me saravi kina na soqo ni veiwasewase ni 2020. E tuvanaka tale ga me vakarautaki na ivakamacala ni vidio. E vakarautaka sara na Tabana ni Vakadewa ena itikotiko liu ni iVakadinadina i Jiova e Warwick, Niu Yoka mai Merika, na ivakamacala ni vidio ena soqo ni veiwasewase ni 2020. Ena 2021, e lesi me qarava na itavi qori na tabana ni Text Processing Services ena Watchtower Educational Center ni iVakadinadina i Jiova e Patterson, mai Niu Yoka. Era qai vakavulici na tacida na sala mera kila vinaka kina na kena vakarautaki na ivakamacala ni vidio.

E kaya o Dr.Snyder “e rawa nira vakavulici eso mera vakatovotovotaka na sala vinaka duadua me vakarautaki kina na ivakamacala ni vidio. Me leleka ga, matata, qai rawarawa na kena raitayaloyalotaki na ka e rogoci.”

Ni vakarautaki e dua na vidio ni soqo ni veiwasewase, ratou na rogoca mada e liu na tacida ratou na vakarautaka na kena ivakamacala. Ratou na biuti ratou ena kedra ituvaki na mataboko, se o ira e leqa na matadra. Oti ratou na qai sarava na vidio me ratou raica na vanua e sega ni rogo kina e dua na vosa, qai biu na kena ivakamacala.

E sega ni rawarawa me vakamacalataki na vidio ke dua e vunau tiko, se rogo tiko na sere. O Brother Michael Millen e dua na tacida e qarava tiko na itavi qo, e kaya: “E lekaleka ga na vanua e dau cegu kina na vosa, keitou na digia gona na tikina ga e bibi era na taura rawa na mataboko mai na vidio. Keitou sa na qai biuta me veiganiti kei na gauna, vanua, ira na dramataki kina kei na ka e caka.”

Ratou na saga na tacida me kua ni vakamacalataki kece na veika e laurai ena vidio. E kaya o Dr Snyder ena ivola The Visual Made Verbal, vei ira na vakarautaka na ivakamacala ni vidio: “Mera qai raitayaloyalotaka ga na vakarorogo na ka e laurai ena vidio nira rogoca na kena ivakamacala. Mo kua ni kaya: ‘E cudru o koya,’ se ‘E rarawa na yalewa ya.’ Mo kaya ga: ‘Sa katibati tu o koya,’ se ‘Sa tagi na yalewa ya.’”

Gauna sa volai kece kina na veika me vakamacalataki, ena qai katoni. Me malumu qai kua ni veitubuyaki na rorogo ni domoi koya e katoni. E vakamacalataka o Brother Millen: “O koya e katoni me kua ni veisisivi kei ira era vunau, se rogoci tiko na domodra ena vidio. Ke bulabula tale na domona, de dua era na nanuma na vakarorogo ni dua tale ga vei ira na vakaraitaki tiko ena vidio.”

Ni caka oti na veiveisau ena qai vakau ina valenivolavola ni tabana kece mera vakadewataka qai katona ena nodra vosa. Ena rua na soqo ni veiwasewase sa oti e vakamacalataka o Michael, ni taura e tolu na aua na kena vakarautaki na vidio e dua na miniti na kena balavu.

Nikua era vakadewataka na iVakadinadina i Jiova na ivola vakaivolatabu ena sivia na 1,000 na vosa. E sega ni okati kina na ivakamacala ni vidio. Eso era nanuma ni duidui na vosa e vakayagataki kina. Ia e kaya o Brother Millen: “Na ivakamacala ni vidio e vaka ga nida vosa tiko vei ira na mataboko, ni vakamacalataki sara ga na veika e laurai mai.”

Eda vakavinavinakataki Jiova ni raica me yaga na kakana vakayalo vei ira na tamata kece e duidui na kedra ituvaki!—Aisea 65:13.