E vica na siga na kena vakacaca sara tiko vakalevu na cagilaba o Mangkhut ena yasayasa vakara ni Wasa Pasifika, kei na South China Sea. Qo eso na ripote mai na valenivolavola ni tabana e veivuke vei ira na mataveitacini era donumaka na cagilaba qori.

Micronesia: Ena ika10 ni Seviteba, 2018 e vakacaca na cagilaba o Mangkhut e Rota, e dua na yanuyanu ena Northern Mariana. Qo se qai imatai ni cagilaba kaukaua duadua me ripotetaki ni ravuti Rota ni oti na 2002. E ka ni marau ni sega ni dua na tacida e vakaleqai, sega tale ga ni vakacacani na Vale ni Soqoni e toka kina. Dua ga na tacida e tokitaki me yacova ni vakavinakataki na nona vale. Sa sikovi ira tiko na tacida ena yanuyanu qori na ivakatawa ni tabacakacaka me vakayaloqaqataki ira.

Yatu Filipaini: Ena ika15 ni Seviteba 2018, e vakacaca e Baggao ena yasana e Cagayan ena Yatu Filipaini na cagilaba o Mangkhut (kilai vei ira ena vanua qori me “Ompong”). Qori e dua na cagilaba kaukaua duadua me ravuta na Yatu Filipaini ena yabaki qo. Sa tubu na kedra iwiliwili na mate ina 81.

Ena vanua o Benguet e ka ni rarawa ni dua na tacida yalewa e mate ena cagilaba qo, qai le va na tacida tagane ratou mavoa. A ripotetaki taumada ni vakacacani e 938 nodra vale na tacida, e 15 e rusa sara ga vakadua. E 28 na Vale ni Soqoni sa vakacacani, e dua e voleka ni buluta na sisi ni qele. Mera vakacegui vakayago, vakayalo tale ga na mataveitacini qori ratou sa veiqaravi tiko kina e va na Komiti ni Vakacoko ratou tiko e Baguio, Cauayan, Laoag, kei Tuguegarao. Ena vica na siga mai qo ena gole tiko e dua na lewe ni Komiti ni Tabana me lai vakayaloqaqataki ira na tacida.

Hong Kong: E vakacaca o Mangkhut e Hong Kong ena ika16 ni Seviteba, 2018. E dua na iwase lailai ni valenivolavola ni tabana e vakacacani, kei na dua na tabavale era vakaicili tiko kina lewe ni vuvale e Peceli. E vakacacani tale ga vakalevu e rua na vale era taukena na iVakadinadina i Jiova. E dua na vale e vakacacani ni lutuka na vunikau, dua tale e cagitaki na delanivale ena kaukaua ni cagi. Vica na vale e vakacacani ena levu ni wai. E veivuke totolo na Tabana ni Vakacoko e Hong Kong vei ira na mataveitacini qori.

Keimami nanumi ira tiko ena masu na mataveitacini e vakacacani nodra vale ena cagilaba o Mangkhut. Keimami lomavakacegu tale ga nira sa veivuke tiko eso tale na tacida vakayalo vei ira na tacida qori. E vu dina ni veivakalougatataki i Jiova na noda vuvale.—Vosa Vakaibalebale 17:17.