Ena Tusiti na ika21 ni Maji, 2017, eratou kerei ira kece na iVakadinadina i Jiova e veiyasa i vuravura na iLawalawa Dauvakatulewa mera volavola vei ira na vakailesilesi vakamatanitu e Rusia, nira via vakatabuya tiko na neimami cakacaka ena vanua taucoko o Rusia. E sega ni kilai na iwiliwili taucoko ni ivola e vakau, ia eso vei ira na volavola era ciqoma na ivola ni vakavinavinaka vei ira na vakailesilesi e Rusia. E sega ni via rogoca na matanitu o Rusia na kerekere qori, qai vakayagataka vakatani na nona lewa ni veiliutaki me saqata kina nodra sokalou na taci keimami. Ia e vakasakiti nodra duavata na tamata i Jiova, nira vakaraitaka sara ga ena gauna era volavola kina. E rawa vinaka tale ga na kena tuvanaki vei ira na taci keimami mai Rusia na veivuke era vinakata.—1 Pita 2:17.

Dua na ka nodra sasaga e levu na iVakadinadina mera vakaitavi ena ituvatuva qo. Ena so na vanua, e sau levu na vakau ivola e Rusia, era mani veivuke eso era ceguva rawa na kena isau vei ira na sega ni rawata. Eso tale na dautukutuku era vakauta nodra ivola vei ira nodra itokani ena so tale na vanua baleta ni isau lailai. Ena so tale na vanua e levu na mataveitacini era sota vakaivavakoso, vakavuvale tale ga mera volavola, qai vakau vata ga ena dua na gauna ni sau lailai. E sega wale ga ni vakarawarawataka na vakau ni ivola, ia e vakavolekati ira sara ga vakaveitacini, era volekati Jiova tale ga. Dua dina na gauna marautaki qori.

Eso mada ga era cakacaka ena positovesi era tokona na ituvatuva ni vakau ivola qo. Kena ivakaraitaki, e kaya e dua na manidia ni vakau iyaya e Barranquilla, e Colombia: “Au kurabuitaka sara ga na duavata e laurai vei kemuni e veiyasa i vuravura, ni oni veitauriligataka na ka e yaco e Rusia. Au kila ni ka oni cakava qo e Barranquilla, e vakayacori tale tiko ga e veiyasa i vuravura. Au nuitaka nira na kila tale eso na bibi ni ka oni cakava tiko.” E Anseong mai Sauca Korea, e dua e cakacaka ena positovesi, e vakarautaka sara ga e dua na vanua mera vakayagataka na iVakadinadina i Jiova mera vakau ivola kina. E vakarautaka tale ga na sala mera vakau ivola kina e vanuatani, qai sega ni saumi.

E kaya o Yaroslav Sivulskiy, na gusunivosa ni iVakadinadina i Jiova: “Nira rogoca na mataveitacini e Rusia ni sa tuvanaka na iLawalawa Dauvakatulewa na iwalewale ni vakau ivola qo ena vukudra, era nuidei se mani vakacava na vakataulewa ni mataveilewai, e levu e tokoni ira tu.”

E kaya e dua na lewe ni iLawalawa Dauvakatulewa o Mark Sanderson: “Na ituvatuva ni vakau ivola qo e vakadeitaka sara ga na nodra duavata na tamata i Jiova. Nida sa volekata yani na icavacava ni veika vakavuravura qo, e bibi na noda duavata me rawa nida vakabulai kina. Nida waraka meda raica na ka ena cakava o Jiova ena ituvaki e Rusia, meda vukei ira tiko ga na tacida ena sala kece eda rawata. Meda masu tiko ga ena duavata vei Jiova, qai nuitaki koya me vukei ira tiko ga.”—Same 65:2.