Era sevutaka na iVakadinadina i Jiova e ono na iVolatabu ni oti e rua na muanimacawa. E sevutaki ena ika4 ni Julai, 2020 na New World Translation of the Holy Scriptures ena vosa vakaBislama kei na vosa vakaOromo. Ena siga tarava ena ika5 ni Julai e sevutaki na vakadewa ni iVolatabu qori ena vosa vakaLatvia kei na vosa vakaMarathi. E sevutaki ena siga tale ga qori na New World Translation of the Christian Greek Scriptures ena vosa vakaBengali kei na vosa vakaKaren (S’gaw). E sevutaki na iVolatabu kece qori ena iyaya vakalivaliva, e rogoci tale ga na ivunau e sa katoni oti. Era sema ga yani na dautukutuku ena biaulivaliva qai dua na ka na nodra marautaka na iloloma talei qo mai vei Jiova.

E sevutaka na ivakadewa ni iVolatabu vakavoutaki ni New World Translation vakaBislama o Brother Mark Sleger, e lewe ni Komiti ni Tabana e Viti. E vakarautaki na porokaramu ena vosa vakaBislama, era sema ga yani na dautukutuku qai vakadewataki ena vosa vagalu vakaBislama.

Ratou vakadewataka na iVolatabu qori me tolu na yabaki e rua na timi ni vakadewa. E kaya e dua vei ratou: “Era na marautaka na iVolatabu qo na mataveitacini, e rawarawa na kena wiliki ni vakayagataki kina na vosa ni veisiga. Ni keimami wilika ena matata sara ga vei keimami na ka dina.”

Eda kila ni na yaga sara ga vakalevu na iVolatabu qo ena nodra vuli vakataki ira kei na nodra cakacaka vakaitalatala na sivia na 700 dautukutuku e kea.

E sevutaka o Brother Delroy Williamson, e lewe ni Komiti ni Tabana e Iciopea na New World Translation ena vosa vakaOromo. Era sema yani ena porokaramu qori e 12,548 na mataveitacini, wili tale ga kina e 2,000 na dautukutuku era vosa vakaOromo.

Me rawa ni saravi na porokaramu qori, e vakadonuya na iLawalawa Dauvakatulewa me saravi na kena ivunau katoni ena tivi. E rawa tale ga vei ira na dautukutuku mera qiri yani mera rogoca na porokaramu qori.

E taura e lima na yabaki na nodratou vakadewataka e lima na daunivakadewa na iVolatabu qori. Ena yaga vakalevu vei ira na mataveitacini era veiqaravi ena yalava vosa vakaOromo.

Ni oti e 12 na yabaki na nodra gugumatua na tacida, e sevutaki na New World Translation ena vosa vakaLatvia. Era sureti mera sarava na kena porokaramu na ivavakoso vosa vakaLatvia kei na vosa vakaRusia.

E sevutaka na iVolatabu qori e dua na lewe ni Komiti ni Tabana e Finiladi o Brother Jouni Palmu. E kaya: “E ka marautaki ni sevutaki na iVolatabu qo vei ira na dauwiliwili ena vosa vakaLatvia, e vakayagataki kina na vosa ni veisiga, qai rawarawa na kena wiliki. Keitou kila nira na marautaka vakalevu na nodra vuli kei na nodra vakasamataka vakatitobu na Vosa ni Kalou.”

Qo na ka e tukuna e dua vei ratou na daunivakadewa me baleta na ivukevuke ni vakekeli e tiko ena iVolatabu qori, “Na ka kece sa tu ena iVolatabu vou qo ena yaga ena noda vuli vakataki keda, kei na noda vakasama vakatitobu.”

E sevutaka na New World Translation ena vosa vakaMarathi o Brother Puneet Aggarwal e lewe ni Komiti ni Tabana e Idia, nira soqo vata na ivavakoso vosa vakaMarathi e kea.

Eratou vakadewataka e le ono na daunivakadewa na iVolatabu qori me tolu na yabaki. E kaya e dua vei ratou: “Ena yaga vakalevu na vakadewa qori vei ira na itubutubu nira vakavulici luvedra kei keda nida vakavulici ira na tataleitaki mera kila na ka dina.”

E kaya tale e dua na daunivakadewa: “Eda marautaka vakalevu ni vakalesui mai ena vakadewa qo na yaca ni Kalou, o Jiova ena vanua e volai taumada kina. Voleka ni tabana kece ni iVolatabu qo sa tu kina na yaca i Jiova, sa na qai vakacerecerei dina ga na yacana.”

Era tiko e loma kei Idia e sivia ni 83 na milioni na lewenivanua era vosa vakaMarathi.

E sevutaka o Brother Ashok Patel e lewe ni Komiti ni Tabana e Idia na Christian Greek Scriptures vakaBengali. Era sema yani e sivia e 1,200 na dautukutuku mai Idia kei Bangladesh.

E sivia ni 265 na milioni na lewenivanua era vosa vakaBengali, e ikavitu tale ga ni vosa e vosataki vakalevu e vuravura. Me rawa ni matata na vakadewa vei ira na dauwiliwili, era digitaki mera vakadewa e vica na tacida mai na duidui vanua e Idia kei Bangladesh. E taura e tolu na yabaki nodra cakacaka.

E kaya o Brother Patel ena nona ivunau: “Na iVolatabu vakaBengali e imatai ni iVolatabu me vakadewataki e Idia. E tabaki ena 1801 na vakadewa ni iVolatabu vaKirisi vaKarisito. Dua na ka e vinaka kina na vakadewa qori ni tiko na yaca i Jiova ena vanua e dodonu me biu kina. Ia na vakadewa ni iVolatabu sa tu nikua, e sosomitaka na yaca i Jiova ena icavuti na ‘Turaga.’ Ena yaga sara vakalevu na New World Translation of the Christian Greek Scriptures ni donu qai rawarawa na kena wiliki.”

E kaya e dua vei ratou na timi ni vakadewa: “E laurai ena vakadewa qo na nona lomani ira na tamata kece o Jiova, qai sureti ira tale ga mera mai vulici koya kei na luvena, o Jisu Karisito.”

E sevutaka na Christian Greek Scriptures vaKaren (S’gaw)o Brother Hiroshi Aoki, e lewe ni Komiti ni Tabana e Myanmar. Era sema ena soqo qori e 510 mai na ono na ivavakoso kei na va na iwasewase lalai.

E taura e dua na yabaki na kena vakadewataki na iVolatabu qori. E kaya e dua vei ratou na lewe ni timi ni vakadewa: “Era na taleitaka ni wilika na iVolatabu vaKaren (S’gaw) na dauwiliwili ni vakalesuya na yaca i Jiova, qai vakayagataka tale ga na vosa ni gauna qo. E matata, donu qai kilai rawarawa. Keimami vakavinavinakataki Jiova ena iloloma totoka qo ni na vakavolekati keimami vua ni volai ena neimami vosanisucu.”

E kaya e dua tale na daunivakadewa: “E vakayagataki ena vakadewa ni iVolatabu qo na vosa ni veisiga, era na kila kina na dauwiliwili na ivakarau ni lomadra na talanoataki kina, ra raitayaloyalotaka na ituvaki era sotava, ra qai vakatotomuria tale ga nodra vakabauta.”

Eda marautaka vata kei ira na tacida na kena sevutaki na nodra iVolatabu. Eda nuidei ni na yaga vakalevu vei ira mera toro voleka vei Jiova kei na nodra vakavulica na ka dina vei ira eso tale.—Joni 17:17.