Ena vuku ni matedewa, a vakayacori kina ena imatai ni gauna ena videoconference na Koronivuli ni Cakacaka Vakapainia e veiyasa i vuravura ena yabaki vakacakacaka ni 2021. Na levu ni nodra vakavinavinakataka na gonevuli na ituvatuva vakayalo qo, era saga sara ga mera kua ni calata. Qo eso na irogo mai vei ira na painia ena nona vukei ira o Jiova mera vosota na veika dredre me rawa nira tiko ena vuli.

O Sister Mieko Yoshinari, e painia tudei me 30 na yabaki mai Japani. (Raica na imatai ni iyaloyalo). E sega ni kila vinaka sara na vakayagataki ni iyaya vakalivaliva, qai sega ni dau rai vinaka. Ia a tiko rawa ena vuli, e kaya: “Au dau vola vakamatailelevu na noqu ivakamacala me rawa niu wilika. Au vakila ni vakayaloqaqataki au o Jiova ena vuli qo.”

O Sister Anita Kariuki, e tiko mai Thika e dua na tauni volekati Nairobi mai Kenya. E dua tiko nona sitoa ni caka sasauni me tokona kina vakailavo nona cakacaka vakapainia. Me rawa ni tiko ena vuli, ena vinakati me sogota nona bisinisi me dua na macawa. A lomaleqa vakalailai o Anita, ia e nuidei ni na vukei koya o Jiova. E kaya: “Au talaucaka na lomaqu vei Jiova, qai tomana tiko ga noqu cakacaka vakaitalatala.” Ena muanimacawa ni bera na vuli, e rawata eso na ilavo me rawa ni tokoni koya. Dina ni vinakati tale vua e $30 na ilavo ni Merika, a sogota ga nona bisinisi qai tiko ena vuli. Ena Vukelulu ni oti na kalasi, e qiriti Anita sara e dua a dinau tu vua qai sauma lesu na ivovo ni ilavo sara ga e vinakata tiko!

E tiko o Sister Laurenth Madrigales e Yoro mai Honduras. A luvu nona vale qai sinai ena soso ena cagilaba o Eta kei Iota. Voleka ni ratou vakayalia kece vakavuvale na ka ratou taukena, ratou qai tokitaki ena dua tale na vanua. Gauna vata qori a ciqoma o Laurenth na veisureti me tiko ena vuli. Dua na ka nona marau, ia e leqataka ni na sega ni samaki tu na nodratou vale ena gauna ni vuli. E kaya o Laurenth: “Keitou tekivu sasamaki ena mataka qai dau oti ena bogi. Keitou cakava tiko qori me vica vata na siga. Dua na ka noqu wawale, au vakila ni sa sega vei au na kaukaua meu vakavakarau ena vuli. Au nanuma kina meu sa kua ni tiko ena vuli.” E masulaka sara vei Jiova na nona rarawataka na kena ituvaki. Ni vo e vica na siga ni bera ni tekivu na vuli, dua na ka nona kurabui ni tuvanaka na Komiti ni Vakacoko eso mera samaka na nodratou vale. Qori e rawa kina vua me vakavakarau, qai tiko ena vuli ni sema mai ena internet ena nodratou vale.

Rau painia tudei tiko o Brother Spencer Stash, kei watina o Alexandra, e Cleveland, Ohio, mai Merika. Ni bera ni tekivu na vuli, a curu i valenibula o Robert na tamai Spencer. Rau sega ni vakadeitaka na veiwatini me rau tiko ena vuli se sega. Ia e uqeti rau o Robert me rau vuli. Ka ni rarawa a mai takali o Robert ni vo e rua na siga me caka na vuli. Dua na ka nodrau rarawa o Spencer kei Alexandra, rau qai calata ga na imatai ni siga ni vuli. Ia na nodrau masu wasoma e vakayaloqaqataki rau me rau tiko ena vuli. E kaya o Spencer ni rau lomavakacegu ni rau cakava na ka e vinakata o tamana. E tomana: “Keirau rai vakanamata tu ena gauna keirau na tukuna kina vua ni keirau a tiko ena vuli, qai wasea vua na ka keirau vulica mai kina. Era vukei keirau vakalevu o ira na tacida keirau vuli vata, kei rau na qasenivuli.”

Sa sivia qo e tini na yabaki nona tiko o Brother Jung Dae-sik, ena vanua era qaravi kina na malumalumu mai Sauca Korea. E tauvi strouk qai vakavuna me paralase. E dau vakayagataka tu ga na idabedabe qiqi (wheelchair). E saga me tiko ena dua na vuli ni painia sa caka oti, ia a tiko ga me dua na siga ena vuku ni kena mate. Dua na ka nona marau ni sureti me tiko ena vuli qo ni sema ena internet. E kaya: “Au luluvu sara ga ena levu ni noqu vakavinavinakataka na ituvatuva qo. Ke sega, de dua au na sega ni tiko rawa ena vuli. Au marautaka gona vakalevu ni rawa niu bau vakaitavi ena vuli.”

O Brother Eddy El Bayeh kei watina o Cherise, rau tiko e New South Wales mai Ositerelia. E kaya o Cherise: “Au vakila ni sa sega ni vuavuaivinaka noqu cakacaka vakaitalatala. Dina ni tiko noqu ituvatuva, au sega ga ni kila na sala meu vakarabailevutaka kina noqu cakacaka vakavunau.” Ia e yaga vakalevu vua na vuli qo. E kaya: “E tiko eso na ka e vakadredretaka noqu cakacaka vakavunau. Ia na vuli qo e vukei au ena sala meu gugumatua tiko ga kina.”

Qo na ka e kaya o Eddy ni vakayaloqaqataki koya ena vuli: “Vaka ga e mokoti au na Turaga Cecere o Jiova. E vakatavitavia na tabaqu qai kaya: ‘Kua ni soro! Au na tiko vata kei iko, au lomani iko, au na vukei iko!’”

Sa tuvanaki tu eso tale na vuli me caka ena yabaki qo. Dina nida sotava tu na veika dredre e veiyasa i vuravura, ia e veivakayaloqaqataki nona veivakavulici tiko ga o Jiova. Eda lai nanuma kina na ka e kaya o Jope: “Raica! E vakacerecerei na Kalou ena nona kaukaua, na dauveivakavulici cava e vakataki koya?”—Jope 36:22.

E yaga vakalevu vei ira na tacida na koronivuli ni painia nira sema ena internet. Qo na kedrau itaba na qasenivuli, kei ira na gonevuli mai na veiyasa i vuravura.