OKOTOVA 18, 2023
IROGO MAI VEIYASA I VURAVURA
iMatai ni Soqo ena Vosa vakaCreole ni Jamaica kei na Vosa vakaJamani ni Pennsylvania
Ena Julai 2023, e vakayacori na imatai ni soqo ni veiwasewase ena vosa vakaCreole ni Jamaica kei na vosa vakaJamani ni Pennsylvania. Era tiko na le 2,000 ena soqo ni veiwasewase qo, e kena usutu “Vakaraitaka na Vosota”!
Vosa vakaCreole ni Jamaica
Rau veikidavaki na tacida yalewa vosa vakaCreole ni Jamaica
E vosa ni vanua e Jamaica na vosa vakavalagi. Ia e levu na lewenivanua era vosataka na vosa vakaCreole. Ena ika14 ina 16 ni Julai, 2023, e vakayacori na soqo ni veiwasewase ena vosa vakaCreole ena vanua ni bose na Marlie Technology Park ena tauni o Old Harbour mai Jamaica. Era tiko kina e rauta na le 1,700, eso era gole mai Igiladi, eso tale mai Merika. Era papitaiso na le 12.
Era marau vakalevu na tacida era vosa vakaCreole mai Jamaica mera tiko ena imatai ni soqo ni veiwasewase e rogoci kina na nodra vosa ni sucu. E kaya o Sister Tenesha Gordon: “Na gauna e tekivu kina na porokaramu, au qai rogoca ni kidavaki keimami na tacida tagane ena neimami vosa, au tagi sara ga. Au sega sara ga ni vakabauta. Au vinakata me lako tu ga na soqo!”
Vosa vakaJamani ni Pennsylvania, Merika
Era taura tu na tacida na ivola e volai tu kina “Oni kidavaki ena imatai ni Soqo ni Veiwasewase ni vosa vakaJamani ni Pennsylvania”
Era vosataka na vosa qo e rauta na le 400,000 e Kenada kei Merika. Na mataqali vosa vakaJamani qo era vosataka vakalevu na ilawalawa na Amish kei ira na Mennonite. Era gole mai na veiyasa i Merika na tacida mai na lima na ivavakoso vosa vakaJamani ni Pennsylvania kei na dua na iwasewase lailai mera tiko ena soqo ni veiwasewase. E vakayacori qori ena ika7 ina 9 ni Julai 2023, ena Vale ni Soqoni Lelevu ena tauni o Coraopolis e Pittsburgh, Pennsylvania, Merika. Era tiko kina na sivia na le 200.
E dau vosataka o Brother David Miller na vosa vakaJamani ni Pennsylvania mai na gauna e se gone kina. Ena sivia na 25 na yabaki sa oti, e vulica na iVolatabu kei ira na iVakadinadina i Jiova ena vosa vakavalagi. E sega vakadua ni bau tadra me tu na ivavakoso ena nona vosa ni sucu se me bau vakarautaki na kena soqo ni veiwasewase. E kaya: “E totoka dina! E rawarawa na noqu vakarorogo. E tara na lomaqu na veika au rogoca baleta ni noqu vosa ni sucu.”
Eda marau vata kei ira na tacida era tiko ena soqo vakairogorogo qo. Eda vakavinavinaka tale ga vei Jiova ni vakaduavataka taki keda qai vakarautaka vei keda kece na vosa savasava.—Sefanaia 3:9.