Ena ika5 ni Maji 2020, e tauca na Mataveilewai ni Yasana o Dzhankoysky e Crimea, na lewa ni kisi me baleti Brother Sergey Filatov. E vinakata na dauveibeitaki me vesu me vitu na yabaki ena vanua era vesu kina o ira na cala bibi. O Brother Filatov e imatai ni iVakadinadina i Jiova e Crimea me beitaki ena Russia Criminal Code.

Me vaka sa tabaki oti, a vesu o Brother Filatov ena dua na veivaqaqai levu era cakava na ovisa vei ira na tacida ena vica na yabaki sa oti. Ena ika10 ni Okotova 2017, era soqoni tiko ena vale nei Brother Filatov eso na nona itokani kei na nona veikilai mera veivosakitaka na iVolatabu, era laga tale ga na sere ni isoqosoqo. Era katona lo na vakailesilesi ni Russian Federal Security Service (FSB) na soqoni qori. Ni oti e dua na yabaki, ena bogi ni ika15 ni Noveba 2018, era curuma vakaukaua e rauta ni 200 na sotia na nodratou vale e 8 na iVakadinadina i Jiova ena yasayasa qori. E sivia ni 35 vei ira era vaqaqara ena vale nei Brother Filatov, e veimama vei ratou e vakaiyaragi tu. E mani vakatarogi qai sere tale.

E va na luvedrau o Brother Sergey Filatov kei na watina o Natalya, e rua rau se ka lalai. Ni waraka tiko na macala ni nona veilewai, meda masulaki koya mada ga kei ratou na nona vuvale, me ratou nuitaki Jiova tiko ga me nodratou ivakaruru ni na vukei ratou ena gauna ni rarawa.—Same 46:1.