Ena Vakarauwai na ika5 ni Okotova, 2019 e vakayacori na bose vakayabaki ni Watch Tower Bible and Tract Society of Pennsylvania, ena Vale ni Soqoni Lelevu ni iVakadinadina i Jiova, e Newburgh, Niu Yoka, e Merika. E tuvanaka tale ga na iLawalawa Dauvakatulewa e dua na porokaramu vakayalo me vakayacori ni oti na bose qori. Era tiko kina e le 20,679, okati kina eso na vanua era sema yani. Qo eso na itukutuku lekaleka ni porokaramu qori. a

E jeameni ni porokaramu qori o Brother Gerrit Lösch, e solia tale ga na imatai ni vunau e yavutaki ena Maciu 23:10. E uqeti keda meda nanuma tiko e noda iliuliu ga o Jisu Karisito, sega ni dua tale.

E vakamacalataka o Brother Stephen Lett na bibi ni noda dau soli ka ena marau. Dua na sala eda vakaraitaka kina noda lomasoli, oya noda tokona na cakacaka ni vakacoko. E vakamacalataka tale ga e dua na itukutuku lekaleka me baleta na veika e vakacacani ena leqa tubukoso, kei na noda veivuke ena vakacoko ena yabaki vakacakacaka ni 2018 kei na 2019. Sivia na le 900,000 na mataveitacini era vakaleqai ena leqa tubukoso, sivia tale ga e 700 na Vale ni Soqoni kei na 15,000 nodra vale na tacida e vakacacani se talaraki sara ga vakadua. Eda vakayagataka kina na iVakadinadina i Jiova e 49.5 na milioni na dola ena veivuke.

Na itavi qo e okati kina na vidio ni nodra vakavinavinaka mai vu ni lomadra na dautukutuku era vukei.

E vakamacalataki ena vidio qo nida taukena e rauta ni 80,000 na vale e vuravura raraba. Ena saravi tale ga kina na iwalewale eda vakayagataka me dei, vakavinakataki qai tara na vale ni noda sokalou.

E okati ena katokatoni qo e dua na veitarotarogi ena kena digitaki qai voli na qele, ena vanua e tiko kina noda valenivolavola ni tabana e Merika kei na itikotiko liu. Ratou vakatarogi kina e le tolu na tacida tagane ratou veivuke ena cakacaka qori ena veiyabaki sa sivi: o Brother Max Larson, George Couch, kei Gilbert Nazaroff. Ratou kaya ni ratou vakadinadinataka sara ga na veivuke i Jiova ena levu na qele se itikotiko e voli.

E vakarogoi ena vidio qo ni sa lalawataki tiko me tara e dua na vale vou e Ramapo, e Niu Yoka, me vakarautaki kina na ka e biu ena tabana ni tukutuku. E rauta ni tolu na kilomita na kena yawa mai na itikotiko liu e Warwick, e Niu Yoka. E nanumi tiko me tekivu na tarataravaki ena 2022, qai vakaoti ena Tiseba 2026. Ena vinakati gona e veisiga e rauta ni le 1,500 na bolecakacaka ena tarataravaki qo.

E vakamacalataki ena vidio qo, o ira kece na via vakarabailevutaka na nodra cakacaka vakaitalatala me tekivu na Janueri 2020, era na vakalewena ga na kena fomu ena jw.org, ra qai solia vei ira nodra qase ni vavakoso me railesuva.

O rawa ni rogoca na katokatoni ena jw.org, ni o digia mo vakayagataka na Amazon Alexa se Google Assistant.

E vakamatatataka o Brother David Splane na parofisai ena Joeli wase 2, me baleta na yavusa vodre. Eda rai vakanamata ena kena vakamatatataki nida vulica e Na Vale ni Vakatawa.

E vakamacalataka o Brother Samuel Herd na yaga ni New World Translation of the Holy Scriptures (Study Edition), e rawa ni wiliki ena internet. E sevutaka sara kina na New World Translation of the Holy Scriptures (Study Edition) mai na ivola i Maciu ina Cakacaka. Era rawa ni kerea na dautukutuku ena ivavakoso me dua nodra ilavelave.

E vakabibitaka o Brother Anthony Morris ni dodonu me vakaliuci ena noda bula na lotu vaKarisito dina, na vunautaki ni itukutuku vinaka. Na vanua ni sokalou e tokoni kina na itavi ni iLawalawa Dauvakatulewa ena kena tuvanaki na cakacaka vakavunau, kei na vakarautaki ni kakana vakayalo vei ira na dauveiqaravi i Jiova. E cavuta sara na vosa veiuqeti mai Na Vale ni Vakatawa ni ika15 ni Noveba, 1976: “Ni yaco mai na ‘veivakararawataki levu,’ e dodonu meda vakaogai keda tiko ena cakacaka vakavunau e vuravura raraba. Ena yaco vakidacala vei ira e levu nona mai vakataulewa na Turaga o Jisu, okati kina o ira na tamata i Jiova, nira vakaogai ira tiko vakalevu ena vakayacori ni inaki i Jiova!”

Me vaka ga e parofisaitaka o Jisu, e vakamacalataka o Brother Mark Sanderson meda namaka tiko na dauveiqaravi ni Kalou nira na ‘cati keda na veimatanitu kece.’ (Maciu 24:9) Ia e vakauqeti keda o Brother Sanderson meda kua ni rerevaki ira na tamata, o Jiova ga.—Same 111:10.

E vakaraitaki tale ga e dua na vidio vakaciriloloma na nodra vakacacani na tacida e Rusia, kei na nodra valuta na veivakacacani. Na vunau kei na vidio qori, e uqeti keda kece na dauveiqaravi i Jiova me tiko tale ga vei keda na ivakarau ni yalo qori.

E vakamacalataka o Brother Geoffrey Jackson na sala eda rawa ni bulataka kina na tikinivolatabu ena iVolatabu vaKirisi vaKarisito. E tiko kina e dua na matavosa e kena ibalebale taumada na “vakasama vinaka.” E vakabibitaka noda dau ‘vakarautaka’ tiko ga ‘noda vakasama’ (kena ibalebale taumada “vakasama vinaka”) ena iotioti ni veisiga qo.—1 Pita 1:13.

E vakarogoya o Brother Kenneth Cook na tikinivolatabu ni yabaki 2020, na Maciu 28:19: “O koya gona, ni lako moni vakavulici ira . . . mera tisaipeli, ni papitaisotaki ira.” E vakabibitaka ni dodonu meda vukei ira na mareqeta na ka dina, mera yalataka nodra bula vei Jiova, ra papitaiso tale ga.

Na porokaramu vakayalo e vakarautaki ena bose vakayabaki e uqeti keda meda gumatua ena veiqaravi vei Jiova.