Ena ika7 ni Epereli 2020, era vakananuma ga na iVakadinadina i Jiova e veiyasa i vuravura na mate i Jisu ni veitauvi tu na matedewa na coronavirus. Me vaka ga e tukuna o Brother Stephen Lett e lewe ni iLawalawa Dauvakatulewa: “Ke sa vakacava na levu ni vanua e tete kina na matedewa, ena sega vakadua ni tarova noda vakavinavinakataka na ka rau cakava ena vukuda o Jiova kei Jisu se meda yalolailai meda kua kina ni vakananuma na ivakayakavi ni Turaga.” E vakadinadinataki vakacava qori ena yabaki qo?

Ena qai tabaki ena vica na ulutaga ena noda iRogo, na sala era vakananuma kina na tacida e veiyasa i vuravura na mate i Jisu ni veitauvi tu na matedewa. Eda na raica ena kena imatai qo na sala e vakananumi kina na mate i Jisu ena itikotiko liu ni iVakadinadina i Jiova kei na valenivolavola ni tabana e Merika.

E muria vinaka na iLawalawa Dauvakatulewa na vakatatabu ni matanitu me baleta na soqoni vakalewelevu, e mani tuvanaka gona me vakarautaki e dua na nodra porokaramu ni iVakananumi na lewe i Peceli kece. E vunau o Brother Anthony Morris ena olo e Warwick. Era sarava na vunau qori na lewe i Peceli e Merika mai na nodra rumu. Era lewe lailai ga era vakayagataka na madrai kei na waini, ia e lomasoli na Tabana e Qaravi ira na Lewe i Peceli me vakarautaka vei ira na madrai kei na waini.

E rawa tale ga nira sema ena vidio na lewe i Peceli ena nodra dui ivavakoso mera sarava kina na porokaramu ni iVakananumi. E soli tale ga na galala vei ira na qase ni ivavakoso e Peceli mera vakaitavi ena vunau ni iVakananumi nira sema ena vidio.

Era kaya e levu na lewe i Peceli, ni duatani duadua na iVakananumi ena yabaki qo. Era sega ni sota kei ira na tacidra, ia era duavata kei ira na mataveitacini e veiyasa i vuravura nira vakananuma na nodrau ivakaraitaki uasivi ni loloma, na Kalou o Jiova kei na luvena o Jisu Karisito.—Joni 3:16; Maciu 20:28.