Ena vuku ni matedewa na COVID-19, e dredre kina vei ira na tacida era tiko ena vale ni malumalumu se valenibula mera vakananuma na mate i Jisu. Levu era sega ni rawa ni biubiu mai kina se mera sikovi. Ia ena nodra veitokoni na qase ni ivavakoso, era vakananuma rawa kina na tacida qori na mate i Jisu, na soqo bibi duadua e dau caka e veiyabaki.

Ena siti o Naju, ratou vakananuma na mate i Jisu o Sister Lee Jeom-soon e yabaki 91 kei Sister Kwon Ae-soon, e yabaki 88. E tomani rau tale ga e dua na marama e tataleitaki, e yabaki 96. E vuniwai tiko ena vanua qori e dua na tacida tagane. Ni vakananuma oti kei ira ena nona ivavakoso na mate i Jisu, sa qai vukei ratou na itabaqase qori me ratou sarava tale ga ena Internet na ivunau ni iVakananumi. E vakarautaka tale ga vei ratou na tacida qori na madrai kei na waini.

Ena siti o Uijeongbu, e cakacaka tiko o Brother Choi Jae-cheol ena dua na vale ni malumalumu era tiko kina e 14 na tacida itabaqase. E vukei ratou na tacida qori me ratou sarava na ivunau ni iVakananumi ena Internet, kei ira na tataleitaki. Era sa tekivu vuli iVolatabu sara eso na tataleitaki era sarava na iVakananumi.

E tiko e Cheonan o Sister Kim Tae-sun, e yabaki 59. E laurai vua na kenisa ena lima na yabaki sa oti. E mani curu e valenibula ena vuku ni mosi. Rau curu vata tiko kei na dua tale na tacida yalewa o Kim Jeong-mi. E yabaki 69, e laurai tale ga vua na kenisa. Ena vuku ni matedewa, rau sa na curu tiko ga e valenibula. Ia e vukei rau na qase ni ivavakoso me rau sarava na iVakananumi ena Internet kei ira na vo ni mataveitacini.

Rau mani vola e dua na ivola ni vakavinavinaka na tacida yalewa vei ratou na qase ni ivavakoso. Rau vola: “Vinaka vakalevu na nomudou veivuke me keirau sarava na iVakananumi, keirau marautaka tale ga na veimaliwai kei ira na mataveitacini dina ni keirau tauvimate tu, qai tete tale tu ga na matedewa na COVID-19.”

E curu i vale ni bula o Sister Mieko Fujiwara e dua na tacida yalewa yabaki 70, e cavutu mai na yasana o Mie Prefecture, e Japani. E sega ni rawa ni sarava na vidio ni iVakananumi kei ira na lewe ni nona ivavakoso ni sega na Internet. Ia ni bera qori, rau sa vakauta oti tu e dua na qase ni ivavakoso kei watina na katokatoni ni vunau ni iVakananumi ena nona talevoni. E rawa kina ni vakananuma na soqo bibi qo mai na nona rumu.

E tiko ena vale ni malumalumu e dua na tacida itabaqase o Sister Yuki Takeuchi e yabaki 102, ena siti o Zama. Ni bera na iVakananumi, rau sa vakauta yani vua o vugona tagane kei watina na madrai kei na waini. E rawa kina vua me vakananuma na mate i Jisu ni qiri vei luvena yalewa kei vugona.

E kaya o vugona tagane o Brother Mimura: “E papitaiso o nei ena 1954, e se bera ni calata vakadua na iVakananumi. E duatani duadua na iVakananumi qo, ia dua na ka nona marau ni se rawa tiko ga ni tiko ena soqo bibi qo.”

Eda vakadeitaka ni na sega vakadua ni guilecava o Jiova na nodra sasaga na itabaqase qo mera vakananuma na mate i Jisu, ena nodra veitokoni na qase ni ivavakoso.—Iperiu 6:10.