Ni tete na matedewa na COVID-19 e veiyasa i vuravura, era gumatua tale ga ni vunau na iVakadinadina i Jiova ena gauna ni iVakananumi. Levu era rai kina ena website na jw.org mera vakacegui ena iVolatabu, qai kila na itukutuku butakatakata. Ni vakatauvatani kei na vula o Feperueri, e tubu ena 50 na pasede na kedra iwiliwili na dau rai ena website ena vula o Maji, e tubu tale ga na kedra iwiliwili na kere vuli iVolatabu.

Ni se qai tekivu tete na matedewa, levu era rai ena jw.org. Ena Feperueri, me vaka ga na kena vakarau, era rai ena website ena veisiga e rauta ni rua na milioni. Ia ena Maji, e tubu na iwiliwili ina sivia na tolu na milioni. Na gauna sa tabaki kina na itukutuku me baleta na coronavirus, e tubu sara na iwiliwili qori ina sivia na va veimama na milioni. Ena siga ni iVakananumi, e tubu sara na iwiliwili ena sivia na vitu na milioni, levu vei ira qori era sarava na porokaramu lavotaki ni kena dikevi na tikinivolatabu e veisiga kei na ivunau ni iVakananumi.

E kaya o Brother Clive Martin na ovasia ni Porokaramu na MEPS ena itikotiko liu ni iVakadinadina i Jiova e Warwick, Niu Yoka: “Levu era dau rai ena jw.org ena vula ni iVakananumi mera kila kina na vanua kei na gauna ena vakayacori kina. Keitou biuta ena website na ivunau lavotaki kei na vunau ni iVakananumi ni yabaki qo ena sivia na 500 na vosa. E vica vata na milioni era sarava na porokaramu qori se download. E yaga vakalevu nodra vakayagataka na iVakadinadina i Jiova kei ira na tataleitaki na website ni vakacegui ira, e vukei ira tale ga vakaivolatabu ena gauna dredre qo.”

Macala ga ni levu era na rai ena noda website mera vaqara kina na itukutuku me baleta na sala mera bulabula vinaka kina ra qai kua ni tauvimate, kei na ulutaga me baleta na nuiqawaqawa. E laurai tale ga ni levu era rai ena website mera kila kina na ka e kaya na iVolatabu me baleta na ivakatakilakila ni otioti ni veisiga, kei na parofisai ena Vakatakila wase 6 me baleti ratou na va na dauvodo ose.

E vakasakiti tale ga na kedra iwiliwili na kere vuli iVolatabu ena website. Ena veisiga, era dau kere vuli iVolatabu e rauta ni le 250. Ia ena Maji, e tubu na iwiliwili qori ina rauta na 350. Na kena isoqoni kece e voleka ni 11,000. Ena siga ni iVakananumi kei na siga tarava, era kerea e sivia ni 1,000 ena website mera vulica na iVolatabu.

E kaya o Jisu nira na marau o ira na kauaitaka na nodra veika vakayalo. (Maciu 5:3) Ena gauna dredre qo, eda vakayaloqaqataki vakalevu nida raica na levu ni tamata era rai vei Jiova kei na nona isoqosoqo mera vakacegui kina.—2 Korinica 1:3, 4.