E duatani duadua na iVakananumi ni mate i Jisu ena yabaki qo. E se qai imatai ni gauna me kaburaki kina ena tivi kei na retio na ivunau ni iVakananumi ena vica na vosa ena levu na vanua e Aferika.

Na ka e caka qori era sarava kina na ivunau e sivia ni 407,000 na dautukutuku kei na dua na iwiliwili levu ni tataleitaki. E sega ni kilai na kedra iwiliwili na sarasara, ia e kaburaki vei ira e sivia na 150 na milioni na lewenivanua.

Levu e veiyasa i vuravura era sarava na ivunau ni iVakananumi ena Internet ena vuku ni matedewa na COVID-19. Ia e sega ni rawa qori vei ira e levu na dautukutuku e Aferika, ni sa rui saulevu na qiri kei na Internet era sega ni rawa kina ni download se sarava na vidio. E vakadonuya na iLawalawa Dauvakatulewa me veivosaki e vica na valenivolavola ni tabana kei ira na kabani ni kakaburaki ena nodra vanua, me baleta na kena saravi se rogoci na ivunau ni iVakananumi ena isau e lailai sara.

Ni bera na iVakananumi, e veivosaki e 11 na valenivolavola ni tabana kei ira na kabani ni kakaburaki ena rogoci se saravi kina na ivunau ni iVakananumi ena sivia na 36 na vanua ena 16 na matanitu. Na 11 na valenivolavola ni tabana qori o Angola, Benin, Cameroon, Côte d’Ivoire, Democratic Republic of the Congo, Ghana, Malawi, Mozambique, Senegal, Zambia, kei Zimbabwe.

Angola

E vakadonuya e ono na siteseni me kaburaka na ivunau ni iVakananumi ena ono na vosa, na vosa vakaIbinda, vaKikongo, vaKimbundu, vakaNyaneka, vakaPotukali, kei na vakaUmbundu. E rogoci tale ga na ivunau ena vanua era levu kina na lewenivanua.

Democratic Republic of the Congo

E tuvanaka e dua na vuli iVolatabu me sarava duadua na iVakananumi nira dau cati keda na nona vuvale. Ia ni vakavakarau tiko, e kacivaka mai o tamana e lomanivale, “Sa tekivu!” Ni gole yani, e kidacala ni ratou sa dabe tu na lewe ni nona vuvale me ratou sarava tale ga na ivunau ni iVakananumi ena tivi. Ratou le tini kece na nona lewenivuvale eratou sarava na porokaramu qori.

E kaya e dua e sega ni tiko ena dina e tiko voleka ena siti o Luena: “Era sega ni cakava e dua na ka va qori na neitou italatala. Ia ni yaco tu mada ga na matedewa na COVID-19, oni se sokalou tiko ga. Keitou na sarava tale ga na porokaramu qori!”

Ghana

E vakadonuya e dua na siteseni ni tivi me kaburaka na ivunau ni iVakananumi ena vosa vakaTwi. E sureti ira mada ga na lewenivanua ena tivi mera sarava na ivunau ni iVakananumi. E vakaraitaka tale ga na vidio, Na Cava a Mate Kina o Jisu? kei Na Cava e Vakatara Tiko Kina na Kalou na Rarawa?, kei na sere ni broadcast, Na Vuravura Vou kei na Sa Voleka Sara.

Senegal

E kaya e dua na tacida yalewa: “Sa veivosakitaki o Jiova ena tivi kei na retio. Sa yawa sara ga! Keimami vakalougatataki qai marau. Qori gona na neimami Kalou o Jiova!”

E kaya e dua tale na tacida yalewa: “Niu rogoca na kena kaburaki ena tivi ni na saravi tiko na ivunau ni iVakananumi, au kaya ga, ‘Qori e sosomitaka sara ga na veisureti keimami sega ni cakava ena vuku ni COVID-19.’ Au qiriti ira sara noqu vuli iVolatabu, veisikovi lesu, kei ira na noqu itokani era sega ni tiko ena dina, mera kila ni na saravi tiko ena tivi na ivunau ni iVakananumi. Era sarava e ciwa noqu vuli iVolatabu kei na nodra dui vuvale. E kerea e dua na wekaqu e sarava na ivunau ena vosa vakaZiguinchor me keirau qai veitalanoataka eso tale na ka me baleta na ivunau, au mani vakadonuya.”

Na ituvatuva lavotaki qori e vakaraitaka ni ‘rawarawa na ka kece’ vei Jiova.—Maciu 19:26.