Ena ika4-11 ni Okosita 1946, a vakayacori kina e dua nodra soqo ni lotu ni veimatanitu na iVakadinadina i Jiova e kena ulutaga, “Glad Nations.” A caka ena dua na raraniqito kei na dua na vanua ni sarasara e Cleveland, Ohio, mai Merika. Qori e imatai ni gauna mera tuvanaka kina na iVakadinadina i Jiova e dua na nodra soqo levu ni lotu. Ena ika4 ni Okosita 2021, me sa ika75 ni yabaki mai na kena vakayacori na soqo qo.

Oti ga na iKarua ni iValu Levu, era tuvanaka sara na tacida na soqo qori qai duatani sara mai na ivalu. Era gole yani kina e vica vata na udolu na mataveitacini mai na veiyasa i vuravura, e vakilai tale ga kina na duavata. Dina nira vakaduiduitaki tu na tamata yago loalola mai vei ira na tamata yago vulavula e Merika. Ia e sega ni laurai qori ena soqo qo, nira veimaliwai ena marau na duidui matatamata era gole mai ena duidui vanua.

Qo e imatai ni gauna mera soqo vata kina ena dua ga na vanua e 80,000 na iVakadinadina i Jiova. Dina nira sega ni sota tu na tacida ena vuku ni ivalu, ia era marau nira sa mai veimaliwai tale. Era tiko tale ga ena soqo e 302 na vulagi mai na 32 na vanua. A vosa ena iotioti ni vunau ena Sigatabu o Brother Nathan H. Knorr, e kena ulutaga “The Prince of Peace” (Na Turaga ni Sautu).

A vakayacori vinaka na soqo, ia e sega ni rawarawa. Kena ivakaraitaki, na imatai ni siga ni soqo, dua na ka na levu ni tamata era gole yani qai sega ni veirauti na vanua mera dabe kina. Era mani tuvanaka na tacida era cicivaka tiko na soqo, me vakayagataki na raraniqito e toka voleka ga. Me rawa nira dabe kina o ira na vakarorogo ena porokaramu ena yakavi ni vo e 15 na miniti me 8. Ia sa tuvanaki tu e rua na qito me caka ena raraniqito qo me yacova na veimama ni ono ena yakavi tiko ga ya.

Ni caka tiko na ikarua ni qito, e yaco e dua na draki ca ra mani biubiu totolo na sarasara. Oti ga vakalailai e vinaka tale na draki, ra qai tiko ena soqo ena yakavi e 50,000 na mataveitacini.

E sevutaki ena soqo qo na mekesini na Awake! (Yadra!), kei na ivola ni vuli “Let God Be True.” E kacivaka tale ga o Brother Knorr ni na vakalevutaki na vanua ni tabaivola e Brooklyn, Niu Yoka mai Merika, kei na valenivolavola ni tabana ena ono na vanua.

E marautaki nira papitaiso ena soqo qo e 903 na tagane, kei na 1,699 na yalewa ena Lake Erie. E vakatovotovotaki tale ga kina na Vulici ni Vale ni Vakatawa, kei na Koronivuli ni Vuli Vunau. E rogoci tale ga na nodra ivakatagi e 160 na daunivakatagi.

Na veika e caka ena soqo qo e sa muri tiko ena soqo sa vakayacori tiko nikua. Kena ivakaraitaki, e tauyavu kina eso na tabana me vaka na Dauveivuke, vanua me tiko kina na Jeameni ni Soqo, tabana ni Veivuke Taumada, tabana e qarava na Buturara kei na Veika Tale Eso, kei na tabana e qarava na iYaya e Yali.

O Brother Ron Little, sa qase ni ivavakoso tiko qo ena iVavakoso o McKeesport e Pennsylvania mai Merika. A tiko ena soqo qo kei tamana, o tacina tale ga. Gauna ya se qai yabaki 11 kina o koya. Na walu na siga ni soqo qori ratou moce tu ga ena lori nei tamana.

E nanuma lesu o Brother Little na sevutaki ni mekesini na Awake! E kaya: “Keimami taura na neimami Awake!, qai veiciciyaki wavoki. Keimami sa saga kece ga me keimami yadua na mekesini.”

Gauna qo sa yabaki 86 o Brother Little. Ni nanuma lesu na gauna oya, dua na ka nona qoroya nodra soqo vata yani vakalewelevu na mataveitacini. E kaya: “Au vinakata me caka tu ga na soqo. E gauna marautaki dina.”

Eda vakavinavinakataki Jiova ni dau vakalougatataka na noda “soqoni tabu.”—Vunau ni Soro 23:2.