NIU YOKA—A mai takali ena Tusiti na ika18 ni Maji, o Guy H. Pierce, e lewe ni iLawalawa Dauvakatulewa ni iVakadinadina i Jiova ena itikotiko liu e Brooklyn, Niu Yoka. Sa yabaki 79 toka ena gauna qori.

E veiqaravi o Mr. Pierce ena vica na komiti e qarava na nodra cakacaka na iVakadinadina wili kina na nodra veivakavulici ena iVolatabu e veiyasa i vuravura. E okati ena nona itavi me dau lako e veiyasa i vuravura me lai veivakayaloqaqataki vei ira na iVakadinadina i Jiova. Se mani vakacava na levu ni nona itavi, e kilai ni dau tu vakarau me veivuke, matadredredre qai turaga dau veiwali. Era tukuna na kilai koya vinaka ni dau veikauaitaki qai torovi rawarawa. Ena dua na tuvaitutu vei ira na veiqaravi vakatabakidua, e veivakauqeti o Guy Pierce ena ka sara ga e dau cakava: “Mo dei ena ivakavuvuli dodonu, ia dau yalorawarawa tale ga. Kua ni beci ira oni veiqaravi vata ke duidui na vanua era cavutu mai kina.”

E sucu o Guy Hollis Pierce e Auburn, Kalifonia, ena ika6 ni Noveba, 1934. E papitaiso ena ika14 ni Okosita 1955, ni sa yabaki 20. E vakawatitaka e dua rau vakabauta vata o Penelope (Penny) Wong, ena ika30 ni Me 1977, rau qai vakaluveni ni toso na gauna. E nodrau cakacaka vakatabakidua na Pierce na veivakavulici ena iVolatabu (e kilai me painia tudei vei ira na iVakadinadina i Jiova). Yaco sara me dua na ivakatawa dauveilakoyaki ni iVakadinadina i Jiova, sikova na ivavakoso e Merika qai vakayaloqaqataki ira na veiqaravi vakatabakidua kei ira na lewe ni ivavakoso. Ena 1997, erau sureti vakaveiwatini me rau veiqaravi vakatabakidua ena valenivolavola ni tabana ni iVakadinadina i Jiova e Merika. A qai lewe ni iLawalawa Dauvakatulewa o Guy Pierce ena ika2 ni Okotova, 1999.

E jeameni o Guy Pierce ena ika129 ni bose vakayabaki ni Watch Tower Bible and Tract Society of Pennsylvania, ena muanimacawa ni ika5 kei na ika6 ni Okotova, 2013. Era sarava na bose e le 1,413,676 mai na 31 na vanua, eso era tiko sara ga ena vanua ni bose eso tale era sema yani ena internet. Qo e bau dua nodra soqo levu duadua na iVakadinadina i Jiova.

E se bula tiko na watina o Penny, ratou na ono na luvedrau, vica na makubudrau kei na makubudrau vakarua. Era nanumi koya na iVakadinadina i Jiova e veiyasa i vuravura, e dau okati ira tale ga qori mera nona vuvale.

Eratou tukuna na itokani i Guy Pierce eratou lewe ni iLawalawa Dauvakatulewa ni dei na nona vakabauta kei na nona muria na ivakavuvuli kei na lawa i Jiova. Eratou kaya tale ga: “Na nona ivakaraitaki ni yaloqaqa kei na yalodina e vuravura ena dau vakaukauataki keitou ena veiyabaki se bera mai.”

Gusunivosa:

Veiyasa i Vuravura: J. R. Brown, Valenivolavola ni iTukutuku, talv. +1 718 560 5000