Era sotava na tacida mai Venezuela e levu na veika dredre me vaka na leqa vakailavo, na tikoyavavala, kei na matedewa na COVID-19. Ia era qara na sala mera tiko ena iVakananumi, ra veisureti tale ga.

Kena ivakaraitaki, ni vo e rua na macawa me caka na iVakananumi e tekivu na veivala kei na veivana e La Victoria mai Apure State, volekata na iyala kei Colombia. Era dro kece na dautukutuku i Colombia. Era veivuke na mataveitacini ena iVavakoso o Arauquita vei ira na tacida mai Venezuela me rawa nira tiko ena iVakananumi.

Dua na ivavakoso e tiko e Falcón State e dredre kina na veitaratara ena talevoni kei na internet. Cava era qai cakava na 70 na dautukutuku era tiko kina? Era vakayagataka na talevoni (walkie-talkie) mera rogoca kina na ivunau ni iVakananumi.

E kaya e dua na tacida yalewa: “Dina ni keimami sega ni rawa ni veiraici, ia keimami rogoca na domodra na tacida. Vaka ga ni keimami tu vata tu.”

Ni vo e dua na siga me caka na iVakananumi, era sasaga na ivavakoso mera sureti ira na tiko ena vanua yawa mera rogoca tale ga na porokaramu. E vakarautaki kina e vica na iwalewale me rawa nira rogoca na ivunau ni iVakananumi. E sivia ni 3,000 na ivola ni veisureti e vakau vei ira, qai vuavuaivinaka na sasaga qori. Kena ivakaraitaki, ena tauni ena baravi o Araya, e sivia ni duanadrau na lewenivanua era vakarorogo ena iVakananumi ni vakayagataki na talevoni.

E tuvanaka tale ga na valenivolavola ni tabana e Venezuela, me kaburaki na iVakananumi ena 82 na siteseni ni retio kei na ciwa na siteseni ni tivi. E rauta ni 8,000 na tacida, kei ira na sureti era rogoca na iVakananumi ena iwalewale qo. E kaburaki tale ga na porokaramu ena so tale na vosa me vaka na vosa vakaGuahibo, vakaPemon, vakaPiaroa, vakaPumé, vakaWarao, vakaWayuunaiki, kei na vakaYekuana.

Mai Guasipati e Bolívar State, e tuvanaki me kaburaki ga vakadua ena veimama ni ono ena yakavi na ivunau ni iVakananumi ena siteseni ni retio. Ia e levu vei ira na tiko i kea sa boko tu nodra livaliva. Eso gona vei ira era na sega ni rogoca kece na ivunau. Ia e dua na leqa vakalivaliva e laurai ena siteseni ni retio, vakavuna me kaburaki tiko ga na ivunau ni iVakananumi ena bogi taucoko. Rawa kina vei ira na vakarorogo mera rogoca kece na ivunau ena duidui gauna. E sivia ni 600 na lewenivanua era vakarorogo. E kaya e dua na tacida tagane: “O Jiova e sega ni vinakata e dua me calata na ivunau lavotaki qo!”

Dina nira ‘vakararawataki na tacida ena veimataqali veivakatovolei.’ Ia era ‘marau tiko ga vakalevu’ ni vakalougatataka o Jiova nodra sasaga mera tiko ena iVakananumi, ra veisureti tale ga.—1 Pita 1:6, 7.