Ena ika 30 ni Okotova, 2021, e sevutaki na ivola vakaivolatabu na Maciu kei na Joni ena vosa vagalu vakaVenezuela. Era sema ena Internet e sivia na 2,200 na mataveitacini mera rogoca na kena ivunau katoni. E sevutaka o Brother Miguel Guillén, e lewe ni Komiti ni Tabana e Venezuela. Me tekivu ena 2006 sa vakadewataka na vale ni volavola ni tabana e rauta ni 7,000 na tikinivolatabu ina vosa vagalu vakaVenezuela, ia qo se qai matai ni gauna me vakadewataki kina e dua taucoko na ivola vakaivolatabu.

E tekivu ni vakadewataki na Kosipeli i Maciu kei na Joni. E rawarawa na vakadewataka ni kilai levu na italanoa i Jisu, qai vaka ga e dua e talanoa tiko.

E tauyavu ena 2003 na imatai ni vavakoso vosa vagalu ena siti o Cabimas, ena ra kei Venezuela. Nikua era veiqaravi tiko ena 53 na ivavakoso vosa vagalu e 1,204 na dautukutuku. Era via vulica na iVolatabu e levu na galu e Venezuela ia e dredre vei ira na vosa vagalu vakaSipeni.

E kaya e dua na ivakatawa ni tabacakacaka, “E kunea e dua na turaga e galu na iVolatabu vakaSipeni, ia na gauna e wilika kina e sega sara ga ni taura rawa e dua na ka. E mani kerea na veivuke ni Kalou. . . . Qai vakamacalataki vua ni rawa ni vulica na iVolatabu ena Vosa Vagalu vakaVenezuela, e mani tekivu vulica sara na iVolatabu.”

Ratou vakadewataka na rua na ivola vakaivolatabu qo me tini na vula e ono na daunivakadewa. Ratou kerea na nodratou veivuke e vitu na tacida galu e Venezuela me rawa ni matata kina na ivakadewa vei ira kece na vosa vagalu ena vanua qo.

Ena vuku ni matedewa na COVID-19, era duitutu na daunivakadewa, ra qai cakacaka vata nira sema ena Internet. Ia e sega ni rawarawa qori, ni dau berabera ena so na gauna na Internet. E kaya e dua vei ira: “E dau dredre ena so na gauna, ia e tokoni keitou o Jiova.”

Me yaga mada ga vei ira na tacida e Venezuela na iloloma qo e vaka na ‘siliva’, ya ni vakadewataki na vosa i Jiova ina nodra vosa.—Same 12:6.