O Mike Jalal kei Natali Sa’ad erau iVakadinadina i Jiova ena yasayasa vakaPalesitaina. Rau sa vakamau, ia e sega ni soli na nodrau ivola ni vakamau. Dua na gauna tiko ga qo, rau saga na ivolanisucu nei luvedrau tagane o Andrae. Sa rawa, ia e dredre toka na kena sagai. E eso tale na veiwatini iVakadinadina i Jiova era sotava tale ga qori. Nira sega ni kilai vakalawa ena yasayasa vakaPalesitaina o ira na iVakadinadina i Jiova, era sega kina ni vakadonuya na vakailesilesi ni matanitu na nodra dodonu vakalewenivanua.

Rau vakamau na Sa’ad e Isireli, e vakamautaki rau e dua na italatala ni iVakadinadina i Jiova. Ia e sega ni via vakaivolataka na nodrau vakamau na Tabacakacaka ni Vanua ena yasayasa vakaPalesitaina, nira sega ni kilai vakalawa ena vanua qori o ira na iVakadinadina i Jiova. Nira sega ni vakaivolataka na vakamau na vakailesilesi ni matanitu, era okata tale ga na gone era sucu mera luvenisala, e sega kina ni via vola na yacadra na Tabacakacaka ni Vanua. Rau sasaga na Sa’ad, kei na vica tale na itubutubu iVakadinadina i Jiova mera vakadodonutaka na ituvaki tawadodonu qori.

Ena 2014, e rogoca na Tabacakacaka ni Vanua na nodra kerekere e levu mera volai na gone. Rau marau na Sa’ad ni sa volai rawa na luvedrau o Andrae (e sucu ena 30 ni Janueri, 2012). Ratou marau tale ga na itubutubu nei Maya Jasmin, Laura, kei Cristian, ratou laurai tiko ena itaba, ni vakarautaka na nodratou ivolanisucu na Tabacakacaka ni Vanua. Ratou sa kilai tale ga ni ratou “lotu vaKarisito.”

Ratou sa qai volai na gone qo, sa tiko tale ga na nodratou dodonu me vakai ira ga na vo ni lewenivanua. Sa rawa ni ratou tomani ratou na itubutubu e vanuatani, rawa tale ga ni ratou vuli.

Sa rawa na ivolanisucu, ia era se vakadredretaka tiko ga na vakailesilesi ni matanitu na nodrau ivola ni vakamau na Sa’ad, kei na vica tale na veiwatini i Vakadinadina i Jiova. Na cava e yaco? Ratou vosota tiko ga na nodratou vakaduiduitaki vei ira na lewenivanua e kea, kei na nodratou raicalataki ni ratou veibutakoci tiko.

Ni sega ni kauaitaka na matanitu na nodra kilai vakalawa na iVakadinadina i Jiova, e vakarota kina mera vakalewena yadudua na veiwatini na nodra ivakacavacava e musu, me duidui tale ga na nodra akaude ni baqe. Ni qaravi totolo vakavuniwai e dua, ena sega ni vakadonui me digia o watina na veiqaravi me caka vua. Ke mate e dua vei rau na veiwatini, ena sega ni taukena o watina kei ratou na gone na nona iyau. Era na sega ni muria na lewenivuvale na ivakarau ni veibulu vaKarisito nira buluta na wekadra. E dodonu mera bulu ga ena nodra ibulubulu na Musolomani ena vanua sa vakatikitikitaki tu me baleti ira na sega ni Musolomani.

Ena Seviteba 2010, era vakauta na iVakadinadina i Jiova na nodra kerekere vei ira na vakailesilesi ni matanitu ena yasayasa vakaPalesitaina mera vakadonui vakalawa. Oti e sivia ni rua na yabaki, e sega ni macala e dua na ka. Era vakarautaka tale na iVakadinadina i Jiova na nodra kerekere ina Mataveilewai Levu e Ramallah, era kerea mera volai vakalawa. Ena Okotova 2013, e sega ni vakadonuya na mataveilewai na nodra kerekere ni yavutaki ena so tale na ka e kovuta na tikina qori.

Tekivu ena gauna qori, era sasaga tale na iVakadinadina i Jiova vei ira na vakailesilesi ni matanitu me wali na leqa qori. Ia nira sega ni qarava na nodra itavi na vakailesilesi, e vakabera kina na nodra sasaga na iVakadinadina i Jiova.

E kaya o Philip Brumley, na daunivakasala ni iVakadinadina i Jiova ena veika vakalawa: “Sa voleka ni 100 na yabaki nodra tiko na iVakadinadina i Jiova e Ramallah kei na veivanua voleka. Era marau ni vakadonuya na matanitu na galala mera sokalou. Ia me kua ni tarova na nodra dodonu vakalewenivanua na iVakadinadina i Jiova na nodra sega ni kilai vakalawa.”

Era kaya na iVakadinadina i Jiova ni dua na ka vinaka era vakayacora na vakailesilesi e Palesitaina ya ni vakarautaka na ivolanisucu, e kilai kina na nodra dodonu. Era nuidei na veiwatini e se bera ni soli na nodra ivola ni vakamau ni na vakadonuya na matanitu eso tale na ka e vauca na nodra dodonu yadua, kei na nodra sokalou.