Ena Epereli 2024 me sa ika75 ni yabaki na kena tabaki na ivola vakaivolatabu ena Yatu Filipaini. Tekivu mai na Epereli 1949, a tabaki kina na imatai ni Vale ni Vakatawa ena vosa vakaCebuano kei na vosa vakaPangasinan.

Ena itekitekivu ni 1900 sa vunautaki na itukutuku vinaka ena Yatu Filipaini. Na gauna qori era vakayagataka na tacida ena cakacaka vakaitalatala na ivola vakaivolatabu ena vosa vakavalagi, ia e vinakati na ivola ena nodra vosa ni sucu. Tekivu ena 1947, sa tabaki na Vale ni Vakatawa ena vosa vakaTagalog, qori na vosa e vakayagataki vakalevu ena Yatu Filipaini. Oti ena 1948, e tuvanaki me vakadewataki na Vale ni Vakatawa ena vosa vakaCebuano kei na vosa vakaPangasinan. Oti e vica na vula, e tabaki na imatai ni kena ilavelave.

Oti e rua na yabaki, era vakayagataka na tacida ena valenitabana na misini ni tabaivola na mimeograph me tabaki kina na mekesini. Me vaka ni levu era wilika na Vale ni Vakatawa ena vosa vakaCebuano kei na vosa vakaPangasinan, sa lai tabaki mai kina ena iTikotiko Liu ni iVakadinadina i Jiova a tiko ena gauna ya e Brooklyn, Niu Yoka, Merika. a

E levu era vakaitavi ena vakadewataki ni Vale ni Vakatawa qori era raica me ka dokai nodra vakaitavi kina. O Brother Juan Landicho, a tiko ena timi ni vakadewa ena vosa vakaPangasinan ena veiyabaki ni 1980, e kaya: “Oti e ono na vula na kena sevutaki na Vale ni Vakatawa ena vosa vakavalagi sa qai dau vakadewataki oti na kena ena vosa vakaPangasinan. Ia ena 1986 keimami marau ni vakavinakataki na iwalewale ni vakadewa sa rawa kina ni rau sevutaki vata ga ena dua na gauna. Keimami vakila sara ga ena veitokoni ni yalo tabu i Jiova ena neimami sasaga.”

E va tale ga qori o Sister Belen Cañete, a veiqaravi ena valenitabana ena Yatu Filipaini qai veivuke ena vakadewa ena vosa vakaCebuano me 46 na yabaki. E kaya: “Gauna ya e le lailai ga na daunivakadewa qai levu na ka me caka. E gauna dredre dina, ia gauna qo era sa tu na timi ni vakadewa era vakavulici vinaka, na iyaya vakalivaliva kei na ivukevuke ni vakadewa. Au vakadinadinataka sara ga nona vukica o Jiova na kopa me koula qai vakadeitaka mera qaravi vinaka nona dauveiqaravi.”

E sivia ni 26 na milioni ena Yatu Filipaini era vosataka na vosa vakaCebuano, wili kina e sivia ni le 76,000 na tacida era veiqaravi ena 1,150 na ivavakoso vosa vakaCebuano. E voleka ni rua na milioni era vosataka na vosa vakaPangasinan, qai rauta ni le 6,000 na tacida era veiqaravi ena 68 na ivavakoso e vosataka na vosa qori. Gauna qo sa vakadewataki tiko na ivola vakaivolatabu ena 24 na vosa ena valenitabana ena Yatu Filipaini. E veivula e tabaki na Vale ni Vakatawa ena tini na vosa. Gauna qo e qarava tiko na valenitabana o Japani na kena tabaki na ivola vakaivolatabu ena vosa vakaCebuano kei na vosa vakaPangasinan.

Eda vakavinavinakataki Jiova ni vakalougatataka na cakacaka ni vakadewa. E vakatakila tale ga na ka dina ena iVolatabu vei ira na karamaca vakayalo ena vosa vakaCebuano kei na vosa vakaPangasinan!​—Aisea 55:1.