Ena Janueri 2019, e sevutaka kina e vica na iVolatabu ena soqo lavotaki o Brother Mark Sanderson, e lewe ni iLawalawa Dauvakatulewa. E okati kina na iVolatabu vakaCebuano, vakaTagalog, kei na vakaWaray-Waray. Ena ika12 ni Janueri e sevutaki mai Hoops Dome ena siti o Lapu-Lapu na iVolatabu vakaCebuano. Ena siga ga e tarava, e sevutaki na iVolatabu vakaWaray-Waray ena Leyte Academic Center e Palo mai Leyte. Ena ika20 ni Janueri, e sevutaki na iVolatabu vakaTagalog ena Metro Manila Assembly Hall ena siti o Quezon.

Era marautaka tale ga e vicavata na drau na Vale ni Soqoni na kena saravi se rogoci na porokaramu qori, e veisoliyaki tale ga e sivia na 163,000 na iVolatabu na New World Translation.

E kaya o Brother Dean Jacek mai na valenivolavola ni tabana ena Yatu Filipaini: “Na iVolatabu e sevutaki ena vosa vakaCebuano kei na Tagalog e ilavelave vakavoutaki ni New World Translation. E rauta ni tolu na yabaki na kena vakadewataki tiko. E tiko ga na iVolatabu vaKirisi vaKarisito ena vosa vakaWaray-Waray, ia qo e imatai ni gauna mera taukena kina na iVolatabu taucoko na New World Translation. E sivia e lima na yabaki na kena vakadewataki.”

E sivia e 60 na pasede na iwiliwili ni lewenivanua ena yatu Filipaini era vosa vakaCebuano, vakaTagalog, se vakaWaray-Waray. Era wili kina na rauta ni 160,000 na tacida kei ira tale ga na sivia na 197,000 na vuli iVolatabu. Era marautaka tale ga na tini vakacaca na udolu era vosa vakaFilipaini ena veiyasa i vuravura na iVolatabu qo na New World Translation ena vosa qori.

O Sister Donica Jansuy, e veivuke tiko ena ivavakoso vakaTagalog mai Merika, e kaya ena gauna sa download kina nona iVolatabu vou: “E rawarawa qai matata na vosa era vakayagataki ena vakadewa ni iVolatabu vou qo, e kilai rawarawa tale ga. Na kena vakayagataki na vosa rawarawa va qori e vukei keda meda kila na ka e tukuna tiko mai o Jiova, vaka ga e vosa tiko vei keda, e rawarawa tale ga ni uqeta na lomada na kena itukutuku.”

Me yacova mai nikua era sa vakadewataka taucoko se vakatikina na iVakadinadina i Jiova na New World Translation ena 179 na vosa. Eda vakavinavinakataki Jiova ena nona vakarautaka mai vakamatata nona Vosa vei ira na tacida kei ira na via rogoca na itukutuku e tu kina.—Cakacaka 13:48.