Ena ika20 ni June 2021, e sevutaki ena iyaya vakalivaliva na New World Translation of the Holy Scriptures ena vosa vakaBicol. E sevutaka qori o Brother Denton Hopkinson, e lewe ni Komiti ni Tabana ena Yatu Filipaini. Era sarava na porokaramu na tacida mai na 97 na ivavakoso nira sema ena internet.

• Era vosataka na vosa vakaBicol e 5.8 na lewenivanua, ra qai tiko ena 5 na yasana ena Yatu Filipaini, ya o Albay, Camarines Norte, Camarines Sur, Catanduanes, kei Sorsogon

• Qo na ikalima ni vosa e vosataki ena Yatu Filipaini

• Sivia ni 5,800 na dautukutuku era veiqaravi tiko ena ivavakoso vakaBicol

• Era vakadewataka na iVolatabu qo e 2 na timi ni vakadewa ena loma ni vitu veimama na yabaki

E kaya e dua e vakaitavi ena vakadewa qo: “E levu tu na vosanivanua vakaBicol. E ka ni sasaga gona me vakayagataki na vosa era kila kece na lewenivanua era vosa vakaBicol.”

E kaya e dua tale na daunivakadewa: “Keitou nuidei ni vakayagataki ena iVolatabu qo na vosa e kilai rawarawa, e vosataki tale ga vakalevu nikua. Ena rawa kina vei ira na dauwiliwili mera kila na ibalebale ni tikinivolatabu.”

Sa vakadewataki oti ena Yatu Filipaini e ono na New World Translation ena vosa vakaCebuano, Hiligaynon, Iloko, Pangasinan, Tagalog, kei na vosa vakaWaray-Waray.

Eda marautaka kei ira na tacida era vosa vakaBicol na sevutaki ni iVolatabu qo. Eda nuidei ni na vukei ira e levu mera lagiti Jiova, qai “marautaka na bula tawamudu.”—Same 22:26.