Ena ika21 ni Epereli 2024, e caka e dua na soqo lavotaki ena valenivolavola ni tabana ena Yatu Filipaini ena siti o Quezon. E sevutaka kina o Brother Dean Jacek, e lewe ni Komiti ni Tabana e kea na ivola i Maciu ena vosa vagalu ni Filipaini. Era tiko kina e 413 na mataveitacini, era sema tale ga kina ena videoconference e rauta ni le 3,998 mai na veivanua ena Yatu Filipaini. Ni sevutaki oti ga sa rawa ni download ena jw.org, kei na JW Library Sign Language.

E rauta ni le 500,000 era vakayagataka na vosa vagalu ni Filipaini. Ena 1999, e tauyavu na imatai ni ivavakoso vosa vagalu ni Filipaini. Ena 2011, e vakadewataki na imatai ni ivola vakaivolatabu ena vosa qori. Nikua sa sivia ni 3,000 na mataveitacini era veiqaravi ena 72 na ivavakoso, kei na iwasewase lalai ena veivanua ena Yatu Filipaini.

Qo na imatai ni iVolatabu me vakadewataki taucoko ena vosa vagalu ni Filipaini. E kaya e dua na tacida tagane didivara: “Ni bera ni sevutaki na ivola qo, e vica ga na tikinivolatabu mai na Maciu sa vakadewataki ena neimami vosa, vaka e sega ni taucoko sara tu. Ia qo sa qai matata sara ga ni sa vakadewataki taucoko!” E kaya tale ga e dua na qase ni ivavakoso e veiqaravi tiko ena ivavakoso vagalu ni Filipaini: “E levu na ivakavuvuli e tiko ena ivola i Maciu e yaga ena veivakatawani kei na nodra vakayaloqaqataki na lewe ni ivavakoso. Kena ivakaraitaki, na Maciu 5:​23, 24 e uqeti keda ke yaco na duidui meda saga na veiyaloni kei ira na tacida. Au vakavinavinakataka ni vakarautaki na ivakasala bibi qo ena neimami vosa.”

Eda marau ni sevutaki na ivola qo ena vosa vagalu ni Filipaini. Ena vukei ira e levu na yalomalumalumu mera vakila na yaga ni Vosa ni Kalou.​—⁠Maciu 7:​24, 25.