Ena imatai ni Seviteba 2022, sa ika75 ni yabaki ni kena tabaki tiko na mekesini na Vale ni Vakatawa ena vosa vakaTagalog. Tekivu ena gauna qori, e tubu na veisoliyaki ni mekesini mai na 600 na ilavelave ina sivia e 1.2 na milioni. E tiko tale ga ena jw.org.

Tekivu mai na 1908, era sa rogoca eso na itukutuku vinaka ena Yatu Filipaini. Oti na tara ni valenivolavola ni tabana ena 1924, e tuvanaki vinaka sara na cakacaka vakavunau. E vakayagataki ga vakalevu na ivola vakaivolatabu ena vosa vakavalagi, ia era raica na tacida ni bibi me vakadewataki ena vosa vakaTagalog.

Ni oti na iKarua ni iValu Levu, ratou gole ena Yatu Filipaini ena ika14 ni June 1947, na daukaulotu mai Kiliati o Earl Stewart, Victor White, kei Lorenzo Alpiche. A lesi o Brother Stewart me liutaka na cakacaka ena yalava ni valenivolavola ni tabana. E mani tuvanaka sara eso na tacida mera vakadewataka na Vale ni Vakatawa ena vosa vakaTagalog. Ena Seviteba ni yabaki qori, era veisoliyaka e veivula na dautukutuku e rua na ilavelave ni Vale ni Vakatawa.

Levu na daunivakadewa ena gauna ya era cakacaka ena siga mera qarava nodra vuvale, ra qai vakadewataka na noda ivola ena bogi. Dua vei ira qori o Brother Hilarion Amores, e kaya: “Eso na gauna keimami na vakadewa me yacova na 2 na kaloko ena mataka lailai. Ia keimami marau ni yaga vakalevu vei ira na mataveitacini na ivola vakaivolatabu e vakadewataki.”

Gauna qo, era veiqaravi tiko e le 97,443 na dautukutuku ena 1,126 na ivavakoso vosa vakaTagalog ena Yatu Filipaini. E rauta ni 76.5 na milioni na lewenivanua era vosataka na vosa vakaTagalog ena vanua qori, qai sivia e le 115,000 na dautukutuku era vosataka na vosa qo e veiyasa i vuravura. Sa veisoliyaki ena levu na vanua na ivola vakaivolatabu vakaTagalog, ra qai wilika na dautukutuku kei ira na tataleitaki e veiyasa i vuravura.

Eda vakavinavinaka vei Jiova ni vakayagataka nona isoqosoqo, me vakarautaka na kakana vakayalo vei ira e vica vata na milioni ena nodra vosa ga.—Maciu 24:45, 46.