Era veivuke tiko na iVakadinadina i Jiova vei ira na nodra lewe ni lotu kei na so tale era vakaleqai ena cava o Sarika (yacana ena Yatu Filipaini o Karen), kei na cava o Haima (yacana ena Yatu Filipaini o Lawin). Erau yaco veitaravi ga na cava qori ena yanuyanu o Luzon, ena vualiku ni Yatu Filipaini. Dua e vakacaca ena ika16 ni Okotova, 2016, dua tale ena ika19 ni Okotova. Ni oti na vakacaca ni cava vakadomobula o Haiyan (yacana ena Yatu Filipaini o Yolanda) ena 2013, sa qai bau dua tale na cava me kaukaua sara ga o Haima.

E sega ni dua e mate se mavoa levu vei ira na le 200,000 na iVakadinadina i Jiova ena Yatu Filipaini. Ia na cagi tataba, waluvu, kei na sisi ni qele e muria mai na cava o Haima, e vakacacana e rauta ni 1,058 na nodra vale na iVakadinadina, 43 na nodra Vale ni Soqoni se vanua ni sokalou.

Sa lesia na valenivolavola ni iVakadinadina i Jiova ena Yatu Filipaini e dua na komiti ni vakacoko ena korolevu o Tuguegarao, e Luzon. Na komiti qori me qarava na iyaya ni vakacoko me vaka na kakana kei na wai. E walu na lori ni iyaya ni vakacoko sa gole oti ina veivanua e vakaleqai. Sa tuvanaka tale tiko ga na valenivolavola ni iVakadinadina i Jiova me tara eso na vale mera toka kina vakawawa na lewe ni lotu, me vakavinakataki tale ga na vale era vakacacani kei na nodra Vale ni Soqoni.

E cicivaka tiko na cakacaka ni vakacoko na iLawalawa Dauvakatulewa ni iVakadinadina i Jiova ena nodra itikotiko liu, qai vakayagataki kina na ilavo e dau cautaki me baleta na nodra cakacaka na iVakadinadina e veiyasa i vuravura.

Gusunivosa:

Veiyasa i vuravura: David A. Semonian, Valenivolavola ni iTukutuku, 1-718-560-5000

Yatu Filipaini: Dean Jacek, 63-2-224-4444