Ena ika5 ni Noveba, 2022 e sevutaka o Brother Cephas Kalinda, e lewe ni Komiti ni Tabana e Zambia, na New World Translation of the Christian Greek Scriptures ena vosa vakaMbunda. Era sarava ena Internet e sivia e 1,500 na kena porokaramu katoni. E sevutaki ena iyaya vakalivaliva na iVolatabu qori, ena qai veisoliyaki ena Janueri 2023 na kena ilavelave tabaki.

E vosataki vakalevu e Angola kei Zambia na vosa vakaMbunda. Ena veiyabaki ni 1930, era tekivu vunau na iVakadinadina i Jiova vei ira na lewenivanua era vosa vakaMbunda e Northern Rhodesia (e kilai nikua me o Zambia). Ena 2014, e tauyavu na timi ni vakadewa ena vosa vakaMbunda. E tiko na ofisi ni vakadewa tu yawa ena tauni o Mongu, qori ena ra kei Zambia.

Na New World Translation of the Christian Greek Scriptures, e ikarua ni iVolatabu ena vosa vakaMbunda. E saulevu na imatai ni iVolatabu qai dredre ni kilai. Ni bera ni sevutaki na iVolatabu vou qo, era dau vakayagataka na iVakadinadina i Jiova era vosa vakaMbunda na New World Translation ena so tale na vosa.

E kaya e dua na daunivakadewa me baleta na iVolatabu vou qo: “E rogo matau qai matata, ia koya e bibi sara ni vakamacalataka donu na veika dina ena iVolatabu.”

E kaya e dua tale na daunivakadewa ni dredre na vakayagataki ni iVolatabu makawa: “E sega vakadua ni volai kina na yaca i Jiova. E volai ga kina na icavuti ‘Neimami Kalou Levu’ me vakaibalebaletaki Jiova. Qori e vakadredretaka na kilai ni yaca ni Kalou. Ia e volai vaka237 na yaca i Jiova ena iVolatabu e se qai sevutaki qo.”

Eda nuidei ni na vukei ira na tacida era vosa vakaMbunda mera toro voleka vei Jiova qai vaqaqacotaka nodra vakabauti koya.—Jemesa 4:8.