Ena ika16 ni Okotova, 2021, e sevutaki ena iyaya vakalivaliva na New World Translation of the Holy Scriptures ena vosa vakaLunda. E caka qori nira sema ena Internet na dautukutuku mai na tolu na vanua e Aferika. Ena qai veisoliyaki na kena e tabaki ena itekitekivu ni Feperueri 2022.

E sevutaka o Brother Emmanuel Chiposa, e lewe ni Komiti ni Tabana e Zambia, ena dua na vunau katoni. Era sarava na kena porokaramu mai Angola, Democratic Republic of the Congo, kei Zambia.

O ira na vosa vakaLunda era dau tei sila, tavioka kei na kumala mera vakani ira na lewe ni nodra vuvale. O ira mai Zambia era tiko volekata na ivurevure ni uciwai kilai levu na Zambezi River, e ikava ni uciwai levu e Aferika tarava na Nile, Congo, kei na Niger. Era tekivu vunau na iVakadinadina i Jiova vei ira na lewenivanua vosa vakaLunda ena veiyabaki ni 1930 qai vakadewataki na noda ivola ina vosa vakaLunda ena 2003.

Ena Seviteba 2019, ratou toki na timi ni ivakadewa vosa vakaLunda ina ofisi ni ivakadewa vou. E yaga vakalevu qori ina nodratou cakacaka e totolo tale ga kina na Internet.

Vicavata na yabaki nodra vakayagataka tiko na dautukutuku na iVolatabu e saulevu, dredre me kunei qai vakayagataki kina na vosa makawa. Ia e matata qai kilai rawarawa na New World Translation vakaLunda. Kena ivakaraitaki, ena iVolatabu makawa vakaLunda na vosa “kawa” ena Vakatekivu 3:15 e dusi ira e le levu. Qori e vakadredretaka vei ira na dautukutuku mera vakamacalataka ni parofisai qori e dusi Jisu ga. Ia e donu vinaka na vosa e vakayagataki ena New World Translation vakaLunda.

Era marautaka na daunivakadewa na sevutaki ni iVolatabu vou. E kaya e dua vei ira: “Au kila ni gauna era na wilika kina na lewenivanua na iVolatabu qo, era na via toro voleka sara ga vua na Dauveibuli o Jiova.”

E vakadinadinataki ena sevutaki ni New World Translation vakaLunda ni o Jiova e kauaitaki ira na tamata mai na veivanua kece. Ena vukei ira sara ga na tamata i Jiova mera kacivaka na itukutuku vinaka ni Matanitu ni Kalou me “yacova yani na iyalayala kece kei vuravura.”—Roma 10:18.