Ena ika25 ina 29 ni Epereli 2023, era sureti na tacida ena dua soqo ena siti o Bulawayo e Zimbabwe. Era dau gole ena soqo qo na daunibisinisi kei na so tale mera vakaraitaka kina na nodra ivoli se na cakacaka era qarava. E vakatokai na Zimbabwe International Trade Fair (ZITF). E soqo levu duadua me vakayacori e Zimbabwe, qai vakarautaki kina e 500 na vanua ni sarasara. O ira na sureti mera vakaitavi kina era gole mai na 22 na vanua ra qai sarasara kina e sivia na le 60,000. E dua tale ga kina na nodra vanua ni sarasara na tacida qai okati ena iwasewase me baleta na vuli kei na veivakavulici.

Era gole mai ena soqo na duidui na nodra vosa, ra mani vakarautaka gona na tacida na ivola vakaivolatabu ena 10 na vosa, wili kina na vosa vagalu ni Zimbabwe. E vakaraitaki tale ga na sala e dau caka kina na vuli iVolatabu. E veisoliyaki e sivia na 12,000 na noda ivola ra qai kerea e sivia na le 450 mera vuli iVolatabu. E vakaitavi kina o Sister Eucebiah Mukura, e kaya “Levu era taleitaka ni sega ni saumi na noda dau caka vuli iVolatabu. Au marau sara nira kaya e levu nira rai vakanamata me sikovi ira yani na iVakadinadina i Jiova.”

E vakaraitaki tale ga ena soqo na noda iVolatabu na New World Translation of the Holy Scriptures. E rogoca e dua na marama na kena wiliki na iVolatabu ena vosa vakaNdebele, e qoroya ni matata qai vinakata me dua na nona ilavelave. E kaya e dua na goneyalewa vei dua na tacida ni sa download ena nona talevoni na JW Library. E cakava qori ni vinakata me wilika na New World Translation.

E veivuke tale ga kina o Sister Gillian Ellerman, e kaya: “Au marautaka sara ga ni sega ni cegu nodra gole mai ena noda vanua ni sarasara na vulagi. E lagiti sara ga kina o Jiova!”

E veiuqeti dina noda raica nira vakayagataka na gauna veiganiti kece na tacida e Zimbabwe mera vukei ira eso tale mera “kila vinaka na ka dina.”—1 Timoci 2:4.