Ena ika29 ni Seviteba 2022, e duavata na Mataveilewai Cecere e Zimbabwe kei ratou na tacida o Brother Tobias Gabaza, Brother Wonder Muposheri, kei Brother Jabulani Sithole. E caka vei ratou na veika tawadodonu ni ratou sega ni via vakaitavi ena soqo vakalotu e vakaleqa nodratou lewaeloma.

Ena Okotova 2020, ratou vakaroti me ratou rairai ena mataveilewai e liutaka na turaganikoro, ni oti nona usuraka e dua na vakailesilesi me ratou vakaitavi ena soqo qori. E okati tiko kina na nodra kerei na mate me tau na uca, mera vakaitavi kece tale ga na lewenikoro. Ni vakavulici na nodratou lewaeloma na tacida, ratou vakatulewataka me ratou kua ni vakaitavi kina.

E kaya na turaganikoro ni cala na ka ratou cakava, qai vakaukauataki ratou me ratou vakaitavi kina. Ratou mani kerea na tacida me rogoci na nodratou kisi na Mataveilewai e Chipinge.

Ena ika5 ni Janueri 2021, e duavata na mataveilewai qori kei ratou na tacida. Ia era sega ni via muria na lewenikoro na vakatulewa qori, ra qai vakacacani ratou tiko ga na tacida. Era sega tale ga ni via vosa vei ratou, ra qai veitusaqati tiko ga.

Ratou mani rairai sara ena Mataveilewai Cecere, ni sa sega ni cegu nodratou tusaqati. E kaya na Mataveilewai nira beca na lewenikoro na nodratou dodonu na tacida, me ratou kua tale ga ni vakaukauataki me ratou vakaitavi ena soqo e vakaleqa nodratou lewaeloma. Mera sauma tale ga na lewenikoro na veika era vakacacana.

E dau caka ena veivanua kece e Zimbabwe na itovo vakavanua qori, ia eda kila ni na yaga vakalevu vei ira na tacida na vakatulewa ni mataveilewai. Eda vakavinavinakataki Jiova ena veika sa rawati qori.—Vosa Vakaibalebale 2:8.