Ena itekitekivu ni yabaki qo, e ciqoma e rua na ivola na valenivolavola ni tabana e Zimbabwe. Rau volavola yani na isoqosoqo na Dorothy Duncan Centre for the Blind and Physically Handicapped, kei na University of Zimbabwe. Na ivola e vakau qori, e vakavinavinakataki kina na valenivolavola ni tabana ni a lolomataka ina rua na isoqosoqo qori na ilavelave ni New World Translation, kei na so tale na ivola vakaivolatabu era dau wilika na mataboko. E vola na University of Zimbabwe: “Ena yaga vakalevu na nomudou ivola mera vukei kina na gonevuli me vinaka na nodra itovo. Keitou vakavinavinakataka vakalevu na nomudou sasaga ni vukei ira eso tale.”

E levu na ka e sa cakava na valenivolavola ni tabana me vukei ira kina na sivia na le 10,000 na mataboko kei ira na sega ni rai vinaka e Zimbabwe. Kena ivakaraitaki ena 2017, e tuvanaki e dua na cakacaka vakavunau lavotaki me baleti ira ga na mataboko. E okati kina na nodratou lesi e rua na veiwatini ratou painia lavotaki. Ratou vukei ira na dautukutuku me vuavuaivinaka na nodra vunau vei ira na mataboko se sega ni rai vinaka. Me yacova mai nikua, e sa le 46 na vuli iVolatabu qai papitaiso e le tolu.

E dua vei ratou o Sister Mavies Chaya. E vunau vei koya ena talevoni e dua na tacida ena 2021. E nanuma o Mavies ni na rai tale ke ra masulaki koya na dauveivakabulai, ia e yalolailai ni sega ni yaco qori. E qai vulica ena iVolatabu nira na rai tale na mataboko ena vuravura vou. Qori e vakayaloqaqataki koya. E vuli vakarua ena dua na macawa qai papitaiso ena Epereli 2022.

Dina ga nida waraka tiko na gauna mera na rai tale kina na mataboko, ia ena gauna mada ga qo eda marau ni o Jiova e ‘veivakararamataki qai solia na yalomatua’ vei ira kece na vakasaqarai koya.—Same 119:130.