Tekivu mai na ika13 ina ika27 ni Epereli 2024, era vakaitavi na iVakadinadina i Jiova ena cakacaka vakavunau lavotaki e Zimbabwe ena vosa vakaChitonga (Zimbabwe). E rauta ni 300,000 na lewe i Zimbabwe era vakayagataka na vosa qori, era tiko ena lomanivanua ena vuaira ni yasana o Binga. E dredre toka na vunau vei ira kece ena vanua qori, ni rauta e 300 ga na iVakadinadina era veiqaravi tiko ena walu na ivavakoso vosa vakaChitonga (Zimbabwe).

E vuavuaivinaka na cakacaka vakavunau. Ena dua na ivavakoso, e le 77 era tiko ena soqoni ena imatai ni muanimacawa e vakayacori kina na vunau lavotaki qori. Ena muanimacawa e tarava, e tubu na kedra iwiliwili na tataleitaki ina 126. E tekivutaki kina e sivia ni 2,000 na vuli iVolatabu.

Era lai vunau ena dua na itikotiko qori na tacida, era sotava sara e dua na marama kei ratou na luvena. Era kerea na tacida mera vosa vei tamadratou. Ni yaco yani, era veikilai sara qai kaya ni turaganikoro. E taleitaka nodra veidokai na tacida nira via veivosaki sara ga kei koya. E marau ni kauta mai nona iVolatabu vakaChitonga (Zimbabwe), ra qai vakaraitaka vua na tacida na cakacaka ni vuli iVolatabu. E tuvanaki me tomani nona vulica na iVolatabu. E vakadonuya tale ga mera vunau na tacida ena so tale na itikotiko e turaganikoro kina o koya.

Rau vunau tiko e rua na tacida tagane ena dua na tauni, rau sotava sara e dua na turaga e kaya ni iVakadinadina i Jiova. E vakamacalataka sara nira vunau vei tamana na iVakadinadina i Jiova ena 1993. A tekivu vulica na iVolatabu o tamana, ia sa sega ni sotavi ira tale na tacida ena vuku ni nodratou veitokiyaki vakavuvale. Rau vinakata sara ga na tacida qo me rau sotavi nona Ta, ena siga tarava ga rau mani taubale me dua veimama na aua ena nodratou itikotiko. Dua na ka nona marau ni raici rau na tacida, qai kaya ni rau masulaka tiko vakaveiwatini ena siga ya mera veisiko yani na iVakadinadina i Jiova. Ratou vakadonuya me ratou vulica vakavuvale na iVolatabu, ratou tiko tale ga ena soqoni ena lomanimacawa. A tomani ratou tale ga e dua eratou tiko veitikivi.

A vunau o Alicia vua e dua na marama itabaqase qai ciqoma na veisureti me gole ina soqoni. Ni gole o Alicia me lai kauti koya mai, sa wawa tu na marama qori kei na dua nona itokani a sureta tale ga. Oti na soqoni e kaya na marama qori: “Au kila ni tiko vata kei kemuni na Kalou. Na nomuni loloma kei na veikauaitaki e uqeti au meu gole tiko ga mai ena soqoni.”

Eda marautaka kei ira na tacida mai Zimbabwe na vuavuaivinaka ni cakacaka vakavunau qo. Ena yaga dina na noda sasaga nida ‘kaburaka tiko ga na sorenikau,’ ya na noda vunautaka tiko ga na itukutuku vinaka e veiyasa i vuravura.​—Dauvunau 11:6.