O Yanmei e dua na iVakadinadina i Jiova e Esia, a vukei Mingjie e dua na yalewa mataboko me takoso e gaunisala. a E kaya sara vua o Mingjie: “Vinaka. Me vakalougatataki iko na Kalou!” E tarogi koya sara o Yanmei ke taleitaka me rau veitalanoataka na iVolatabu. E kaya o Mingjie ni masulaka tiko e dua me dusimaki koya ina ivavakoso dina ni Kalou. Cava e masuta kina qori o Mingjie?

E kaya o Mingjie ni sureti koya ena 2008 e dua nona itokani mataboko me rau lai lotu ena nodra valenilotu na lokiloki. Oti na ivunau, e taroga vei bete na vanua e yavutaka kina nona ivunau. E kaya sara o bete ni yavutaka ena iVolatabu, na vosa dina ni Kalou. Dua na ka nona vinakata o Mingjie me wilika na iVolatabu. A dua sara nona iVolatabu vakaJaina ena nodra matanivola na mataboko (braille). Ena loma ga ni ono na vula e wilika kina e 32 na kena itabataba. Toso tiko nona wiliwili, e liaca ni sega ni dina na ivakavuvuli ni letoluvakalou e vakavulica tiko na lotu qori. E tiko tale ga na yaca ni Kalou, o Jiova.

Dua na ka nona yalolailai ni raica nodra itovo na lewenilotu. E siqema ni sega ni salavata nodra ivakarau ni bula kei na ka e wilika ena iVolatabu. Kena ivakaraitaki, ena soli vei ira eso tale na kakana vinaka, ia era na kania na ivovo ni kakana na mataboko. E mositi Mingjie sara ga na veika tawadodonu qori, mani qara kina eso tale na lotu ena nona yasayasa. Qori na vuna e masuta kina me raica e dua na ivavakoso dina vakarisito.

E uqeti koya nona ivakaraitaki ni veikauaitaki o Yanmei, e vakadonuya sara me vulica na iVolatabu. Toso na gauna, e gole sara ena nodra soqoni na iVakadinadina i Jiova. E nanuma lesu o Mingjie: “Au na sega vakadua ni guilecava na imatai ni gauna au soqoni kina. E uqeti au dina nodra kauaitaki au na mataveitacini kece. Au mataboko, ia au vakila na loloma dina.”

E toso vinaka sara nona vuli o Mingjie, e tiko wasoma tale ga ena soqoni. E dau taleitaka me lagata na sere ni soqoni, ia e dredre me cakava qori ni sega tu na ivolanisere ni mataboko. Nodra veivuke na ivavakoso e dua kina nona ivolanisere. Ena loma ga ni 22 na aua e lavetaka kina o Mingjie e 151 na sere! Ena Epereli 2018, e tekivu vunau sara e matanalevu, e vakayagataka tale ga e veivula e 30 na aua me vunau kina.

Me vakarautaki Mingjie ena papitaiso, e katona o Yanmei na taro kei na tikinivolatabu ena ivola, Soqosoqo e Cakava na Loma i Jiova. E papitaiso sara o Mingjie ena Julai 2018. E kaya: “E uqeti au dina nodra loloma na mataveitacini ena soqo qori. Dua na ka noqu luluvu niu sa lewena na ivavakoso dina ni Kalou.” (Joni 13:34, 35) Gauna qo, sa veiqaravi tiko vakatabakidua o Mingjie. E vakadeitaka tiko ga me vakaraitaka vei ira eso tale na loloma a vakaraitaki vua ena imatai ni gauna.