Ena gauna ni COVID-19, era veisautaka na tacida na sala era wasea kina vei ira eso tale na itukutuku veivakacegui mai na iVolatabu. Era sega ni vunau e matanalevu se veivale, era sa qiri ga se vola ivola. a Levu na lewenivanua era marautaka qori, e vakadinadinataki tale ga kina na veivakalougatataki i Jiova. (Vosa Vakaibalebale 16:3, 4) Raica mada qo na irogo mai vei ira eso na tacida ena dua na yanuyanu.

 O Helen e dua na tacida yalewa, e dau sikova tiko e dua na goneyalewa mani sureti koya me vulica na iVolatabu, ia e sega ni vinakata. Ni vo e dua na siga me caka na vakatatabu ni COVID-19, e solia o Helen na nona iVolatabu, kei na ivola Na Cava Eda na Vulica ena iVolatabu? Ni caka tiko na vakatatabu, e kerei koya tale o Helen me rau vulica na iVolatabu. E vakamacalataka vua ni rau na vuli ga ena talevoni. E mani vakadonuya sara o goneyalewa me vuli. Dua na ka na nona marautaka, mani kerei Helen me rau vuli e veisiga! Sa dau tiko tale ga ena soqoni ni sema ena talevoni. Sa bulataka tiko qai wasea tale ga vei ira eso tale na ka e vulica.

 Ena dua na ivavakoso eso na tacida era volavola vei ira na ovisa, mera vakavinavinakataka na yaga ni nodra veiqaravi ena itikotiko. Era kurabuitaka na ovisa na ka era cakava qo na tacida. E kaya e dua na ovisa vei Jefferson e dua na qase ni ivavakoso: “Au nanuma ni o kemuni na iVakadinadina i Jiova oni dau sevaki keimami na ovisa.” E kaya vua o Jefferson ni sega ni dina qori. Era kauta na tacida na nodra ivola ra qai biuta ena mata ni siteseni. Dua na ka nodra marautaka na ovisa na vosa ni veivakayaloqaqataki era vola na tacida. E kaya e dua tale na ovisa: “Qo ena rawa ni vukei ira eso tale me donu nodra rai me baleti keimami.”

 Rau painia tudei tiko o Edna kei Ednalyn b, ia rau sega ni rawa ni sema ina soqoni ni sega na nodrau internet. Rau mani kerea e dua na marama e tiko volekati rau me rau vakayagataka na nona internet, rau na sauma tale ga. E vakadonuya na marama qori, qai kaya me rau kua ni sauma e dua na ka. Rau mani sureti koya sara me tiko ena soqoni. Gauna qo, sa vulica tiko na iVolatabu, wili kina e dua na luvena kei na rua na makubuna yalewa. Ratou sa tiko wasoma tale ga ena soqoni.

 Eso na tacida era sureti ira na tiko voleka, nodra itokani vakacakacaka, kei na so tale mera rogoca e dua na vunau nira sema ena internet. Dua na tacida yalewa o Ellaine, e cakacaka e valenibula qai dredre vua me sureti ira nona itokani vakacakacaka. E nanuma nira na sega ni taleitaki keda eso na vuniwai. E mani text vakayalovinaka vei ira na vuniwai qai sureti ira mera rogoca na vunau. A lomalomarua ni sureta e dua na veiwatini rau vuniwai, ia oti nona vakasamataka qai masulaka e text sara vei rau. E sauma mai o yalewa: “Kena ibalebale, o vinakata meu lewena nomu lotu?” E kaya sara o Ellaine ni veisureti qo e dola raraba. Ena siga tarava, e kurabui o Ellaine ni rau sema totolo yani na veiwatini qori ena soqoni! E kaya: “Ni bera ni oti na soqoni e text mai o yalewa, qai kaya: ‘Se qai imatai ni gauna meu tiko kina ena nomuni soqoni na iVakadinadina i Jiova. E totoka, au taleitaka sara ga, vinaka vakalevu na veisureti.’”

 E sureta o Ellaine e 20 na vuniwai ena soqoni, ia e marau nira tiko rawa e 16 na vuniwai. E cavuta na ka e tukuna na yapositolo o Paula: “Au marau niu ‘doudou niu wasea na itukutuku vinaka ni Kalou’ vei ira noqu itokani vakacakacaka.”—1 Cesalonaika 2:2

 Eda sotava kece na ituvaki dredre ena vuku ni COVID-19. Ia era marau qai donu tiko ga na nodra rai na tacida ena yanuyanu qo, kei na so tale na vanua nira gumatua ni vukei qai vakacegui ira eso tale.—Cakacaka 20:35.