Au sucu e San Juan Chancalaito, dua na tauni ena yasayasa o Chiapas, Mexico. Keitou cavutu vakavuvale mai na matatamata na Chol, era nodra kawa na yavusa na Maya. Keitou le 12 na veitacini, au ikalima. Au se gone keitou sa tekivu vulica vakaveitacini na iVolatabu kei ira na iVakadinadina i Jiova. Na leqa ga niu sega ni muria sara na ivakasala vakaivolatabu ena gauna ya.

 Gauna au yabaki 13 kina, au sa vakayagataka na wainimategaga, au butako tale ga. Au biubiu mai vale, au sa qai veitokiyaki voli. Au tekivu cakacaka ena dua na loga ni mariwana niu se yabaki 16. Oti e dua na yabaki noqu cakacaka e kea, keitou sotava na leqa ena dua na bogi ni keitou usana tiko ena waqa na mariwana. Eratou vanavana e dua na ilala ratou dau bisinisitaka tale ga na wainimategaga. Au dro bula ga niu lade i wai au qalova sobu na uciwai. Oti vakalailai ga qori, au dro sara i Merika.

 Au lai sotava e levu tale na leqa e Merika ena vuku ni noqu volitaki wainimategaga. Au bala e valeniveivesu niu yabaki 19 niu beitaki ena butako kei na laba. Gauna au tu kina e valeniveivesu, au lewena e dua na ilala qai cakava e levu tale na ka ca. Au mani kau i Lewisburg, Pennsylvania, nodra valeniveivesu na kaivesu rerevaki.

 Sa qai torosobu ga noqu itovo niu vesu tu e Lewisburg. Sega ni dredre noqu lai lewena e kea na ilala vata ga au lewena tu e liu ni sa toka rawa vei au na kena tatu. E laurai na mawe ni noqu voravora ena levu ni veibuturaki au vakaitavi kina. Dua na gauna e veibuturaki na neitou ilala kei na dua tale na ilala e valeniveivesu. Dua na veibuturaki vinaka keitou cakava, e vakayagataki kina na itavi ni baseball kei na ivakabibi era dau vakayagataka na lave ka bi. Era qai vakayagataka na ovisa ni valeniveivesu e dua na mataqali kasi mera tarova kina na veibuturaki. Oti na veibuturaki qori, au tokitaki ina dua na yasa ni valeniveivesu e vakarautaki me baleti ira na kaivesu e vakadomobula nodra itovo. Au dau yalokatakata, qai kaukaua noqu itautau ni vosa. Sega ni dua na ka e tarovi au keu sa via buturaka e dua. Au dau marautaka na veibuturaki, au sega ni bau veivutunitaka na ka au cakava.

 Niu vesu tu ga ena noqu sela ena levu na gauna, au tekivu wilika na iVolatabu me bau dua mada ga na ka au cakava tu. A solia vei au e dua na ovisa yalewa na ivola, E Rawa Mo Bula Tawamudu ena Parataisi e Vuravura. a Na ivola vakaivolatabu qori e vakalesuya mai noqu vakasama e levu na ka au vulica ena iVolatabu kei ira na iVakadinadina i Jiova. Au vakasamataka na ituvaki torosobu au tu kina ena vuku ni noqu itovo voravora. Au vakasamataki ratou noqu vuvale. Erau sa iVakadinadina i Jiova e rua na ganequ, au mani veinanuyaka, ‘Rau na bula tawamudu.’ Au vakadeitaka meu veisautaka noqu ivakarau ni bula niu vakabauta au rawa tale ga ni bula tawamudu.

 Au kila ena vinakati meu vukei meu rawa ni cakava na veiveisau e gadrevi. Au mani masu vua na Kalou o Jiova, au kerei koya me vukei au. Oti au volavola ina valenivolavola ni iVakadinadina i Jiova e Merika, au kerea meu vulica na iVolatabu. E veivosaki sara na valenivolavola kei ira na iVakadinadina i Jiova era toka voleka ga. Ia ni vakatarai ga mera veisiko na noqu vuvale, sa dau volavola ga yani e dua na tagane iVakadinadina i Jiova me uqeti au, vakauta vata yani kei na ivola vakaivolatabu. Qori e sa qai gu ga kina na lomaqu meu veisau.

 E okati ena veisau meu vakayacora na noqu biuta na ilala au sa lewena tu me vica na yabaki. Keirau vesu vata toka ena dua na yasana kei na iliuliu ni ilala ya. Au lai raici koya sara ena dua na siga, au kaya vua niu sa vinakata meu iVakadinadina i Jiova. Au kurabui ni tukuna vei au: “Ke sa lomamu dina qori, cakava sara. Au sega ni rawa ni vala kei na Kalou. Ia ke o via biuta wale ga na ilala, o sa kila tiko na ka ena yaco.”

 Era raica vei au na veisau na ovisa ni valeniveivesu ena rua na yabaki veitaravi. Qori e veisau kina nodra ivakarau vei au. Kena ivakaraitaki, sa sega ni dau vesu na ligaqu nira kauti au meu lai sili. E bau uqeti au mada ga e dua na ovisa meu kua ni soro, meu sasaga tiko ga. Ena noqu iotioti ni yabaki e valeniveivesu, au lai vakaotia na kequ itotogi ena vanua era vesu kina o ira e sega ni vakadomobula nodra itovo. Oti e tini na yabaki noqu vesu tu, au sere ena 2004 qai vakavodoki lesu i Mexico ena basi ni valeniveivesu.

 Au lai vaqara nodra vale ni soqoni na iVakadinadina i Jiova niu yaco i Mexico. Ni isulu vinaka ga e bau tu vei au na noqu isulu ni valeniveivesu, au mani dara ya ina imatai ni soqoni au tiko kina. Era marautaki au na iVakadinadina, era sega ni kauaitaka na kequ irairai. Au kila nira lotu vaKarisito dina niu raica nodra veikauaitaki. (Joni 13:35) A veivosakitaki me vakavulici au e dua ena iVolatabu. Oti e dua na yabaki noqu vuli, au papitaiso meu iVakadinadina i Jiova ena ika3 ni Seviteba, 2005.

 Ena Janueri 2007, au vakatulewataka meu vakayagataka vakalevu noqu gauna ena cakacaka vakavunau. Au dau vakayagataka e veivula e 70 na aua meu veivakavulici kina ena iVolatabu. Au tauri ivola ena 2011 mai na Koronivuli ni Vuli iVolatabu ni Tagane Dawai (sa kilai nikua me Koronivuli ni iTalatala ni Matanitu). E vukei au vakalevu na vuli qori meu qarava noqu itavi vaKarisito.

 Keirau vakamau kei na noqu daulomani o Pilar ena 2013. E dau veiwalitaka vei au ni dredre me vakabauta na veika au talanoataka vua me baleta noqu bula e liu. Au sega ni lesuva tale noqu ivakarau makawa. Keirau vakabauta vakaveiwatini ni veisautaka rawa ga noqu bula na iVolatabu.—Roma 12:2.

 Au vakabauta ni cavuti tale ga vei au na Luke 19:10. E kaya kina o Jisu ni “lako mai . . . me vakasaqara na ka e yali, me vakabulai ira tale ga.” Sa sega ni veilecayaki noqu bula me vaka e liu. Au sa vulica tale ga meu dauloloma. Ke sega na iVolatabu, ena sega ni vakainaki noqu bula, sega ni veimaliwai vinaka kei ira eso tale, e bibi sara ni na sega ni vinaka noqu veiwekani kei na Dauveibuli o Jiova.