Au sucu e La Ceiba, e Honduras, au tagane duadua, qai itini vei keitou na le lima na veitacini. Au didivara duadua ena noqu vuvale. Keitou dravudravua, e vakarerevaki tale ga na vanua keitou tiko kina. Niu se yabaki va, sa takali o tamaqu, dua na ka na dredre ni bula keitou sotava.

 E solia nona vinaka kece o tinaqu me qaravi keitou vakaveitacini. Ia levu na gauna e sega ni veirauti na ilavo me volia kina noqu isulu. Ni tau na uca, au dau vakila na batabata ni sega noqu isulu katakata.

 Niu tubu cake tiko, au vulica na vosa vagalu ni Honduras (kilai me LESHO), me rawa niu veivosaki kina kei ira na vo ni galu. Ratou sega ni vulica na vosa qori o tinaqu kei ratou na ganequ, ia ratou matanataka se bulia ga eso na vosa me rawa ni keitou veivosaki. E dau lomani au vinaka o Na, e taqomaki au tale ga ena veika ca. Ena vica wale na vosa vagalu e kila toka o tinaqu, e vakasalataki au kina meu qarauna eso na ka ca, me vaka na vakatavako kei na vakayagataki sivia ni gunu. Au vakavinavinakataka gona niu sega ni bobula ena veika qori ena gauna au tubu cake tiko kina.

 E dau kauti au o Na ena lotu Katolika niu se gone, ia e sega ni dua na ka au kila ni sega ni dua e vakadewataka vei au ena vosa vagalu na ivunau. E vakavucesa na lako i lotu, au mani tinia noqu dau lai lotu niu yabaki 10. Ia au via kila e levu na ka me baleta na Kalou.

 Ena 1999, niu yabaki 23 au sotava e dua na marama ni Merika, e lotu Tawase. E vakavulici au ena iVolatabu kei na vosa vagalu ni Merika (ASL). Au taleitaka dina na ka au vulica ena iVolatabu, au mani nanuma meu dua na italatala. Au toki sara kina e Puerto Rico, meu lai vulica na cakacaka vakalotu ena vosa vagalu. Ena 2002, niu lesu mai Puerto Rico, au tauyavutaka e dua na lotu me baleti ira na galu, ra veitokoni tale ga kina eso noqu itokani. Dua gona noqu itokani qori o Patricia, keirau qai veiwatini.

 Niu italatala ni lotu, au dau vunau ena vosa vagalu na LESHO, vakaraitaka na itaba ena italanoa vakaivolatabu, matanataka tale ga eso na italanoa mera kila kina na galu na ka e tukuni tiko. Au dau sikovi ira na galu era tiko voleka e tauni meu vakayaloqaqataki ira, vukei ira tale ga ena nodra leqa. Au gole tale ga ena ilakolako vakaulotu e Merika kei Zambia. Ia se vovodea sara noqu kila na iVolatabu. Au dau tukuna ga vei ira na lewenilotu na ka au rogoca, kei na ka au vulica ena itaba ena ivola. E levu noqu taro, sega soti na ivakamacala.

 Dua na siga era vakatetea na lewe ni noqu lotu eso na itukutuku lasu me baleti au. Era kaya niu dau mateni, au lasa tale tiko ga e tuba. Dua na ka noqu sega ni taleitaka, au rarawa tale ga. Sega ni dede keirau sa biuta vakaveiwatini na lotu qori.

 Era dau sikovi keirau vakaveiwatini o ira na iVakadinadina i Jiova, ia keirau sega ni dau via vakarogoci ira. Ni keirau biubiu mai neirau lotu, e vakadonuya sara o Patricia me vulica na iVolatabu kei na dua na veiwatini iVakadinadina i Jiova—o Thomas kei Liccy. Au qoroya dina ni rau sega ni galu, ia rau kila na vosa vagalu. Au tomani Patricia sara ena vuli iVolatabu.

 Vica vata na vula neirau vuli tiko ena vidio ni vosa vagalu ni Merika (ASL). Ia na gauna rau beitaki ira kina na iVakadinadina i Jiova e rua neirau itokani nira dau muri tamata, sa cegu tale ga kina neirau vuli iVolatabu. E vakaraitaka vei au o Thomas na ivakadinadina nira sega ni dau muri tamata na iVakadinadina i Jiova, au sega ga ni vakabauti koya.

 Oti e vica na vuli e lomabibi vakalevu o Patricia, mani masuta na Kalou mera sikovi koya tale na iVakadinadina i Jiova. Sega ni dede e sikovi Patricia sara e dua na iVakadinadina i Jiova e toka voleka ga. E kaya sara vei Patricia ni na kerei Liccy me sikovi koya. E itokani dina o Liccy, e sikovi Patricia e veimacawa me vakayaloqaqataki koya, rau vuli iVolatabu tale ga. Ia au se vakatitiqataki ira tiko ga na iVakadinadina i Jiova.

 Ena 2012, era vakaitavi na iVakadinadina i Jiova ena dua na cakacaka vakavunau lavotaki, era vakaraitaka kina na vidio O Via Kila na ka Dina? ena vosa vagalu na LESHO. Kauta sara mai o Liccy vei keirau e dua na vidio qori. Au kidroa na gauna au sarava kina, ni so sara ga na ivakavuvuli au dau vakavulica me vaka na eli kei na tawamate ni yalo e sega ni vakaivolatabu.

 Na macawa ga e tarava au lako ena nodra Vale ni Soqoni na iVakadinadina i Jiova meu lai raici Thomas. Au tukuna vua niu via vakavulici ira na galu ena ka dina, ia meu kua ni iVakadinadina i Jiova. E noqu inaki meu tauyavutaka ga e dua noqu lotu vou ni galu. E vakacaucautaka o Thomas noqu yalogu, ia e vakaraitaka sara vei au na Efeso 4:5, e vakabibitaka ni vinakati na duavata ena ivavakoso ni lotu vaKarisito dina.

 E solia tale ga vei au o Thomas na vidio Jehovah’s Witnesses—Faith in Action, Part 1: Out of Darkness ena vosa vagalu (ASL). E vakaraitaki ena vidio qori nodra vakadikeva vakavinaka eso na tagane na iVolatabu mera kila na ka dina, kei na yavu ni kena ivakavuvuli. Niu sarava na vidio, au kila sara ga na ka ratou vakasamataka tiko na turaga qori. Me vakataki ratou ga au vaqara tiko na ka dina. E vakadeitaka vei au na vidio qori nira vakavulica tiko na iVakadinadina i Jiova na ka dina, ra yavutaka tale ga nodra vakabauta ena iVolatabu. Au tomana tale noqu vuli iVolatabu, keirau qai papitaiso kei Patricia ena 2014 me keirau iVakadinadina i Jiova.

 Au taleitaka na ivavakoso ni iVakadinadina i Jiova ni savasava, me vaka ga nona savasava na Kalou. O ira na sokalou kina e savasava nodra ivakarau ni vosa kei na nodra veimaliwai. Era dau veiyaloni, ra veivakayaloqaqataki tale ga. Se vanua cava era cavutu mai kina, se duidui vosa era vakayagataka, e laurai nira duavata, e tautauvata tale ga na ivakavuvuli dina vakaivolatabu era vakavulica.

 Au taleitaka na veika e vakavulica na iVolatabu. Kena ivakaraitaki, au vulica ni Kalou Kaukaua Duadua o Jiova, e Cecere sara e vuravura taucoko. E lomani ira na galu kei ira na sega ni galu. Au vakamareqeta nona lomani au na Kalou. Au vulica tale ga ni na veisau na vuravura qo me dua na parataisi totoka eda na qai bula uasivi kina me tawamudu. Au rai vakanamata ena gauna sa na vakayacori dina kina qori!

 Keirau taleitaka kei Patricia na veitalanoataka na iVolatabu kei ira na galu. Gauna qo keirau sa veivakavulici tiko ena iVolatabu kei ira eso na lewe ni neirau lotu makawa. Ia sa sega ni levu noqu taro me baleta na ka au vakavulica tiko, me vaka na gauna au italatala tu kina. E saumi sara ga noqu taro niu sa vuli iVolatabu kei ira na iVakadinadina i Jiova.