Au susu ena dua na siti o Rochester e Niu Yoka ena dua na vuvale Katolika. Rau veibiu noqu itubutubu niu yabaki walu. Ena lomanimacawa, au dau tiko vata kei Na ena bareki era tu ga kina na dravudravua. Ia ena muanimacawa, au na dau lai tiko kei Ta ena vanua era tu kina vutuniyau. Na veika dredre e sotava qori o Na ena nona susugi keitou na le ono na veitacini, au vinakata sara ga meu vutuniyau meu vukea na noqu vuvale.

 E vinakata o Ta meu rawaka, sa qai kauti au meu lai raica e dua na koronivuli era dau vuli kina na manidia ni otela. Au taleitaka sara ga, au mani tekivu vuli sara. Au nanuma ni sa sauma sara tiko ga na Kalou na noqu masu meu vutuniyau qai marau. Lima na yabaki noqu vuli tiko meu manidia ni otela, au vulica na lawa ni bisinisi, kei na kena cicivaki vakailavo na kabani. Ena gauna vata qori, au cakacaka tale tiko ga ena dua na casino e Las Vegas, Nevada.

 Niu yabaki 22, sa dua sara tu ga na noqu itutu levu ena casino. E kilai niu vakailavo qai tamata rawaka, au dau kania na kakana saulevu, gunuva tale ga na waini kei na alakaolo saulevu. Era dau kaya na noqu itokani daunibisinisi, “Nanuma tiko ni ka bibi duadua ga ena vuravura qo na ilavo.” Era nanuma ni rawati ga na marau dina ena ilavo.

 E noqu cakacaka meu dau qarava na ka era vinakata na tamata vutuniyau era dau mai veimauilavo e Las Vegas. Dina nira vutuniyau, ia era sega ni marau. Au sa vakila tale ga mai qori. Na levu ga ni ka au rawata, na levu tale ga ni noqu lomaocaoca kei na noqu sega ni moce vinaka ena bogi. Au sa via vakamatei au ga. Niu sa sega ni marautaka na noqu bula, au mani taroga vua na Kalou, “Au na rawata vakacava na marau dina?”

 Ena gauna qori, rau toki mai kina e Las Vegas e rua na ganequ erau iVakadinadina i Jiova. Au sega ni via wilika na nodra ivola ni lotu era dau solia mai, ia au taleitaka ga meu wilika vata kei ira na noqu iVolatabu. Au dau makataka ena peni damudamu ena noqu iVolatabu na ka kece e tukuna o Jisu. Niu dau taleitaka na ka ga e tukuna o Jisu, rau sa qai dau yavutaka ikeri na ganequ na nodrau ivakamacala. Niu dau tiko taudua, au dau wilika na noqu iVolatabu.

 Au kurabuitaka dina e levu na ka au mai wilika ena iVolatabu. Kena ivakaraitaki e kaya o Jisu: “Ia ni dou sa masu, kakua ni vosa balabalavu walega, me vakataki ira na tawa lotu; ni ra sa nanuma era na rogoci ni ra sa vosa balabalavu.” (Maciu 6:7, The New American Bible) Ia e qai solia vei au e dua na bete na itaba kei Jisu, e qai kaya o koya keu dau masu tiko ena itaba qori au qai cavuta tiko vakatini na Yaca i Meri kei na Tamai Keimami, ena vakavutuniyautaki au na Kalou. Ia au liaca keu cavuta tiko vakavica e dua vata ga na vosa, au sa vosa balabalavu tiko. Au wilika ni tukuna o Jisu: “Dou kakua talega ni vakatoka e dua me tamamudou e vuravura; ni sa dua bauga na Tamamudou, ko koya mai lomalagi.” (Maciu 23:9, NAB) Au mani vakasamataka sara, ‘Ia na cava ga na vuna me keimami dau kacivi bete kina na “Father”?’

 Ena gauna sara ga au wilika kina ena iVolatabu na ka e tukuna o Jemesa, au sa qai vakasamataka mai na ka au vakabibitaka tiko ena noqu bula. E tukuni ena Jemesa wase 4: “Dou sa sega beka ni kila, ni sa veicati kei na Kalou na veivinakati kei vuravura? ia sa veimecaki kei na Kalou ko koya sa via veiwekani kei vuravura.” (Jemesa 4:4, NAB) E tara sara vakalevu na lomaqu na ka e tukuna na tikina e 17: “Ke dua e kila na ka e dodonu, qai sega ni cakava, sa ivalavala ca.” Au mani qiriti rau sara na ganequ, au qai tukuna vei rau niu sa na sega ni qai cakacaka tale ena casino, baleta niu dau cakava tu na ka e sega ni vakadonuya na iVolatabu, me vaka na veimauilavo, au dau kocokoco tale ga.

 Au vinakata meu vakavinakataka noqu veiwekani kei na Kalou, rau na noqu itubutubu kei ira na wekaqu. Me levu na noqu gauna meu cakava kina qori, au vakatulewataka meu bula rawarawa ga. Ia e sega ni rawarawa dina na veisau, baleta ni levu tale mai na veitemaki. Kena ivakaraitaki, e tukuni vei au me tosoi cake tale na noqu itutu ena casino, me vakaruataki se vakatolutaki tale na kequ isau. Niu masulaka oti na ituvaki qori, au sa qai vakatulewataka ni sega ni ganiti au na ivakarau ni bula qori. Au mani biuta na noqu cakacaka, au toki vei Na, au sa qai tekivutaka e dua noqu bisinisi lailai me dau laminate na menu ni valenikana.

 Dina ni vukei au na iVolatabu meu kila na ka meu vakabibitaka ena noqu bula, ia au sega ga ni via gole ena nodra soqoni na iVakadinadina i Jiova. Rau mani tarogi au na ganequ, “Na cava mada e leqa tiko vei keimami na iVakadinadina i Jiova?” Au kaya sara: “Na nomuni Kalou o Jiova, e dau tawasea na vuvale. Na gauna ga au rawa ni sota kina kei kemudou vakavuvale, oya na siganisucu kei na Kirisimasi. Ia oni sega ni dau cakava ya.” E mani tagi e dua na ganequ, qai tarogi au: “Ia o dau tu e vei ena vo ni gauna? Keirau vinakata me datou na veimaliwai vakalevu, sega ena gauna ga ni siganisucu kei na Kirisimasi.” E tarai au sara ga na ka e tukuna, keirau sa qai veitagicaki.

 Na gauna au mai kila kina nira dau lomani ira na wekadra na iVakadinadina i Jiova, au sa qai liaca ni cala sara tu ga na noqu rai. Au mani vakatulewataka meu na tiko ena dua na nodra soqoni na iVakadinadina i Jiova. Au mani sotavi Kevin, e dua e kenadau ena veivakavulici ena iVolatabu, e vakavulici au sara.

 Erau dau bula rawarawa ga o Kevin kei watina, e levu kina na gauna erau dau vakayagataka ena nodra vakavulici eso tale mera mai kila na ka dina ena iVolatabu. E veirauti tale ga nodrau ilavo me rau dau lai veitokoni ena kena taravaki na valenivolavola ni tabana ni iVakadinadina i Jiova e Merika e Loma, kei Aferika. Rau dau mamarau qai veilomani. Au kaya ga, ‘Qo ga na bula au dau vinakata tu.’

 E vakaraitaka vei au o Kevin e dua na vidio me baleta na marau e vakilai ena veiqaravi vakadaukaulotu, au vakatulewataka sara meu cakava tale ga qori. Ena 1995, ni oti e ono na vula noqu vulica vagumatua na iVolatabu, au papitaiso sara meu iVakadinadina i Jiova. Au sa sega ni kerea vua na Kalou meu vutuniyau, ia qo ga na ka au kerea: “Moni kua ni soli au meu dravudravua se vutuniyau.”—Vosa Vakaibalebale 30:8.

 Au sa qai vutuniyau dina ena gauna qo. Sega ni baleta ni levu na noqu iyau, ia ni dei na noqu veiwekani kei Jiova. Au vakila tale ga na marau dina. Au sotavi watiqu o Nuria, e Honduras, keirau daukaulotu e Panama kei Mexico. E dina vakalevu na ka e tukuna na iVolatabu: “Na veivakalougatataki i Jiova e veivakavutuniyautaki, e sega ni kuria o koya ena ka rarawa”!—⁠Vosa Vakaibalebale 10:22.