Au cavutu mai Toga, qori na vanua e tiko kina e rauta ni 170 na yanuyanu ena ceva ni Pasifika. Keimami bula rawarawa ga, e sega na livaliva se na lori. Ia e vale keitou vakapaipo ni wai kei na vica na toa. Ni sereki na vuli keitou dau vukei Ta ena samaki ni neitou iteitei. Keitou tei jaina, uvi, dalo kei na tavioka. Keitou bula rawa tiko ena itei, kei na so tale na ka lalai e dau volitaka o Ta. Keitou dau lotu qai doka vakalevu na iVolatabu, qai gole wasoma i lotu. Ia keitou vakabauta ni sala vinaka ga ena rawati kina na bula vinaka, oya me keitou toki ina vanua vutuniyau.

 Niu sa yabaki 16, e veivosakitaka o noqu momo me keitou toki vakavuvale i Kalifonia, e Merika. Dua dina na veisau levu vei keitou ena ivakarau vakavanua! Sa vinaka sara neitou bula vakailavo, ia na vanua keitou tiko kina e levu era ivalavala voravora ra qai vakayagataka na wainimate gaga. Keitou rogoca e veibogi na veivanavanai, qai levu ena yalava era rerevaki ira na daubasulawa. Levu era dau vakadakai me itataqomaki se mera walia kina e dua na veiba. A lauvana na serequ ena dua na veiba.

 Niu se vuli ena sekeneri, dua na ka noqu vinakata meu vakai ira noqu icaba. Tekivu meu pati vakalialia, gunu vakasivia, ivalavala voravora, qai vakayagataka na wainimate gaga. Toso na gauna, au bobula ina wainimate gaga na cocaine, au butako tale ga me rawa niu volia kina. Dina ni ratou dau lotu noqu vuvale, au sega ga ni taleitaka na ivakasala meu biuta na veimurimuri. Levu na gauna au vesu ni voravora noqu itovo. Sa qai ca ga noqu ivakarau ni bula! Sega ni dede au bala sara e valeniveivesu.

 Dua na siga ena 1997 niu se tu e valeniveivesu, a vakaraici au toka e dua na kaivesu niu taura tu na iVolatabu. Qo donuya na Siganisucu na gauna era dau doka vakalevu na kai Toga. E tarogi au sara keu kila na ka dina ena iVolatabu me baleta nona sucu na Karisito, ia au sega sara ga ni kila e dua na ka va qori. E vakaraitaka sara vei au na itukutuku rawarawa ena iVolatabu me baleta na sucu i Jisu. Au liaca ni sega ni cavuti kina na ivakarau sa caka tu ena Kirisimasi. (Maciu 2:1-12; Luke 2:5-14) Au kurabui sara ga qai via kila e levu tale na ka me baleta na iVolatabu. Na turaga qori e dau tiko e veimacawa ena nodra soqoni na iVakadinadina i Jiova e vakayacori tiko e valeniveivesu, au mani nanuma meu tomani koya tu. Era veitalanoataka tiko na Vakatakila. E sega ni levu na ka au kila, ia au raica ni ka kece era vakavulica e yavutaki ena iVolatabu.

 Era sureti au na iVakadinadina i Jiova meu vulica na iVolatabu, au mani vakadonuya. Se qai vakadua meu vulica kina na yalayala ni iVolatabu ena vuravura parataisi se bera mai. (Aisea 35:5-8) Ena vinakati gona meu veisautaka na noqu ivakarau ni bula meu vakamarautaka na Kalou. Keu tomana tiko ga noqu ivakarau ca ena sega ni vakadonui au na Kalou o Jiova ena Parataisi sa yalataka tu. (1 Korinica 6:9, 10) Au mani saga meu lewa vinaka noqu cudru, muduka noqu vakatavako, au tinia tale ga na gunu sivia kei na vakayagataki vakasivia ni wainimate gaga.

 Ena 1999, ni voleka na gauna meu sere kina, au tokitaki ina dua tale na valeniveivesu. E sivia e dua na yabaki noqu sega tu ni veivosaki se raica e dua na iVakadinadina i Jiova. Ia dua na ka noqu sasaga tiko ga meu veisau. Ena 2000, e bokoca na matanitu noqu ivolatara ni tiko e Merika, au qai vakatalai i Toga.

 Niu yaco i Toga, au vaqarai ira na iVakadinadina i Jiova, me tomani tale ga noqu vuli. Au taleitaka na ka au vulica tiko, au qoroya tale ga nodra dau vakayagataka na iVolatabu mera yavutaka kina nodra ivakavuvuli, me vakai ira ga na iVakadinadina i Jiova e Merika.

 E kilai levu o tamaqu ena neitou itikotiko ni vakaitutu ena lotu. Ia ratou kurabui qai cata noqu vuvale noqu veimaliwai tiko kei ira na iVakadinadina i Jiova. E muri rau qai taleitaka noqu itubutubu na kena vukei au na ivakavuvuli vakaivolatabu meu veisautaka kina noqu ivakarau ni bula.

 Dua na ka dredre meu veisautaka na kena gunuvi e dua na gunu e vakayagataki vakasivia ena noqu vanua, oya na yaqona. Levu na tagane e Toga era vakayagataka vakalevu nodra gauna e lomanimacawa ena gunu yaqona. Au dau lako gona ena kena vale e veibogi meu gunu yaqona tiko me yacova niu mateni. Dua tale ga na ka e vakavuna me dredre noqu toso vakayalo, oya noqu vakailala tiko kei ira na sega ni doka na ivakatagedegede vakaivolatabu. Au vukei meu raica vakabibi na itovo e cata na Kalou. Au mani vakayacora eso na veisau me vakalougatataki au na Kalou, me vakadonui au tale ga.

 Au tekivu gole ena nodra soqoni na iVakadinadina i Jiova. Noqu vakasosoqoni kei ira e vukei au meu vorata na veitemaki. Au papitaiso sara ena 2002 meu iVakadinadina i Jiova.

 E yaga dina vei au nona vosovoso na Kalou me vaka e tukuni ena iVolatabu: “O Jiova . . . e vosoti kemuni ga ni sega ni vinakata me rusa e dua, e vinakata ga moni veivutuni kece.” (2 Pita 3:9) E rawa sara ga ni vakaotia na ituvaki dredre eda bula tu kina nikua, ia e vakatara me soli tale na gauna vei ira na vakataki au mera veiwekani voleka. Au dau nuitaka tu ni na vakayagataki au tale ga na Kalou meu vukei ira eso tale mera veisautaka nodra ivakarau ni bula.

 Ena veivuke i Jiova au lewa matau noqu bula, tinia tale ga noqu dau butako. Au sa saga ga meu vukei ira na tiko wavoliti au mera itokani tale ga i Jiova. Au sotavi watiqu gona o Tea, ena noqu sosoqoni tiko kei ira na iVakadinadina i Jiova. Sa dua tale ga na luve i keirau, e marautaki dina neitou bula vakavuvale. Keitou vakaitavi ena nodra vakavulici eso tale ena inuinui e yalataka tu na Kalou me baleta na gauna se bera mai, nida na bula tawamudu ena parataisi ena vakilai kina na sautu.