Au susu ena vanua drokadroka ena saula kei Tampere, e Finiladi. Keitou sega ni dau lotu vakavuvale, ia e vakabibitaki na vuli kei na itovo vinaka. E marama ni Jamani o tinaqu, au dau gade gona ena so na gauna ena Ra kei Jamani rau tiko kina na nona itubutubu.

 Au dau taleitaka na qito niu se gonelailai. Levu na qito au vakaitavi kina, ia niu yabaki 14 au vakatulewataka meu qito tenisi ga vakatabakidua. Niu sa yabaki 16 au dau tereni vakarua se vakatolu ena dua na siga, dau vakarua kei koya e dauveivakavulici ena qito qo. Ena yakavi au dau saga meu vakatovotovo vakataki au. E talei dina na qito qo, e vinakati kina na vakasama kei na kaukaua vakayago. Au dau taleitaka na veimaliwai kei ira na noqu ilala, ia niu sega ni vakayagataka na wainimate gaga se meu dau gunu, e sega niu sotava kina eso na leqa. Au vakaliuca vakalevu na qito tenisi, e noqu bula sara ga qori.

 Niu yabaki 17 au sa tekivu vakaitavi ena so na qito lelevu me vaka na ATP. a Ni oti noqu qaqa ena so na qito lelevu qori, au kilai levu sara ga. Niu se qai yabaki 22, au dua vei ira na le 50 na dau qito tenisi rogo e vuravura.

 Au dau qito tenisi e veiyasa i vuravura me vica vata na yabaki. Levu sara na vanua totoka au butuka, au raica tale ga na leqa e yaco tu e vuravura, me vaka na basulawa, vakayagataki vakasivia na wainimate gaga, kei na veika e vauca na veikabula. Kena ivakaraitaki, niu tiko e Merika, keimami qai vakasalataki me kua ni lakovi eso na vanua ni levu kina na basulawa. E vakavuna noqu kauai na veika kece qori. Au taleitaka na ka au cakava tiko, ia ni oti e dua na siga vaka me sega ni vakainaki tu na noqu bula.

 Tekivu vuli iVolatabu kei ira na iVakadinadina i Jiova o Sanna na noqu itau. E lasa vei au niu raica nona taleitaka va qori na lotu, au sega ga ni saqata nona vuli. Keirau vakamau ena 1990, na yabaki ga e tarava e papitaiso sara me iVakadinadina i Jiova. Au sega ni dau lotu, ia au vakabauta ni bula tiko na Kalou. Au se nanuma tiko nona dau wili iVolatabu o buqu na marama ni Jamani, bau vakavulici au tale ga ena masu.

 Dua na siga ni keirau gade tiko vakaveiwatini kei na dua tale na veiwatini iVakadinadina i Jiova, e vakaraitaka sara vei au o Kari na wati yalewa, na parofisai vakaivolatabu me baleta na “iotioti ni veisiga.” (2 Timoci 3:​1-5) E vakavure vakasama sara ga, au liaca kina ni qo sara ga na vuna sa qai levu tiko ga kina na veika ca e vuravura. Keitou sega ni veivosakitaka sara e levu na ka me baleta na lotu ena siga qori. Ia me tekivu ena gauna qori keirau sa dau veivosakitaka tiko kei Kari na iVolatabu, e vakaibalebale kina vei au na ka au vulica. Dau dredre tale ga me keitou sota wasoma ena vuku ni osooso, ia e sega ni soro o Kari. E dau volavola ga mai me sauma kina noqu taro ni keirau vuli tiko. E saumi sara ga vakamatata ena iVolatabu na taro kece au dau vaqaqa. Au sa qai tekivu raica na usutu bibi, oya ni Matanitu ni Kalou duadua ga ena mai vakayacora na nona inaki. Noqu vulica ni yaca ni Kalou o Jiova, kei na veika sa cakava ena vukuda, au taleitaki koya kina vakalevu. (Same 83:18) E uqeti au tale ga na isoro ni veivoli, ni sega ni caka tu ga me rawa se me vakalawataki sara, e yavutaki ga ena loloma ni Kalou. (Joni 3:​16) Au vulica tale ga niu rawa ni itokani ni Kalou qai bula tawamudu ena parataisi e vuravura. (Jemesa 4:8) Au mani vaqaqa, “Au na vakaraitaka cava noqu vakavinavinaka?”

 Au vakasamataka tale vakavinaka na noqu bula. Au vulica tiko ena iVolatabu ni marau levu duadua na noda dau soli ka, au vinakata sara tiko ga meu tukuna vei ira eso tale na noqu vakabauta. (Cakacaka 20:35) Niu dau qito, au sega ni tiko e vale ena loma ni 200 na siga e veiyabaki niu vakaitavi tiko ena qito. E vakaliuci e vale na noqu bula me vaka na noqu tereni, ituvatuva, kei na noqu qito. Au liaca ni dodonu ga meu veisau.

 Au kila keu tinia na qito rogo va qori meu sauva na veika vakayalo, e levu era na lomatarotarotaka. Ia e talei sara mai na icocovi kece na noqu kilai Jiova, kei na noqu rawata na bula tawamudu. E rawarawa ga noqu qaqa ena qito, e va tale ga qori noqu vakatulewa. Au sega ni via kauaitaka na ka era kaya eso, qo na noqu vakatulewa. E uqeti au vakalevu na Same 118:6 meu dau vorata kina na ituvaki qori, ni kaya: “E tu e yasaqu o Jiova, au na sega ni rere. Cava ena cakava rawa vei au na tamata?”

 Ena gauna vata qori era via saumi au eso era dau cicivaka na qito, me toso cake tale ga na ivakatagedegede ni noqu qito, sega ni dua na ka meu leqataka ena veiyabaki se bera mai. Ia au sa vakatulewa oti, au mani vakasuka na veisureti qori au tinia tale ga noqu vakaitavi tu ena qito e tuvanaka na ATP. Au tomana na noqu vuli iVolatabu, au qai papitaiso meu iVakadinadina i Jiova ena ika2 ni Julai, 1994.

 Au sega ni sotava e dua na ka rarawa meu qai nanuma kina na Kalou. Au sega tale ga ni vaqara tiko na ka dina. Sa vinaka tu vei au na bula, e sega tale ni dua na ka au vinakata. Ia e vaka ga e nakiti noqu sa mai kila na veika dina vakaivolatabu, au vulica ni dodonu me vakainaki na bula, sa veisau tale ga na noqu bula me vinaka cake! E qaqaco neitou bula vakavuvale keitou veivolekati tale ga vakalevu. Au marautaka tale ga ni ratou muria na we ni yavaqu na tolu na luvequ tagane me ratou lotu vaKarisito, sega ni dau qito.

 Au se taleitaka tiko ga na qito tenisi. Ena veiyabaki sa sivi au dau cakava tiko eso na cakacaka e sema ina qito qori me rawa kina neitou bula. Kena ivakaraitaki, au dauveivakavulici, au manidia tale ga ni dua na vanua ni qito tenisi. Ia au sa sega ni vakaliuca na qito qori. Au dau tereni vakalevu e liu ena veimacawa meu dua na dau qito tenisi vinaka, meu kenadau tale ga. Ia qo au sa veiqaravi tiko vakatabakidua, au vakayagataka tale ga noqu gauna meu vakavulici ira kina eso tale mera muria na ivakavuvuli vakaivolatabu a veisautaka noqu bula. Au marautaka vakalevu noqu vakaliuca neirau veiwekani kei na Kalou o Jiova, kei na noqu dau vunautaka na inuinui ni veigauna vinaka se bera mai.​—1 Timoci 6:​19.