Au sucu ena siti o Calgary e Alberta, e Kenada. Rau veibiu noqu itubutubu niu se gonedramidrami, keirau mani toki kei Na e nodrau vale nona itubutubu. Rau dau lomani keirau vakaveitinani o tutu kei bubu, au gone mamarau tale ga. Au se nanuma vinaka tu na veiyabaki talei qori.

 Niu yabaki vitu, e veisautaka noqu ivakarau ni bula nodrau vakamau tale o Na kei Ta, keitou toki sara i St. Louis, e Missouri, e Merika. Au sa qai kila ni dau ca na itovo i tamaqu. Kena ivakaraitaki, ena dua na siga niu suka mai na vuli, e kila o tamaqu nira vakasagai au eso na gone, ia au sega ni sauma lesu. Na levu ni nona cudru e mokuti au vakaukaua, lailai tale na ka au sotava vei ira na gonevuli! Au nanuma dei tu na ka e yaco qori, vakavuna meu dau veivala kei ira na gone niu se qai yabaki vitu.

 E rarawataka o tinaqu nona sega ni lewa vinaka o tamaqu nona cudru, levu gona na gauna rau dau veivala tu ga. Niu yabaki 11, au sa vakayagataka vakasivia na wainimategaga kei na alakaolo. Au dau cudrucudru, veivala tale ga kei ira au sotava e gaunisala. Na gauna au tuvaitutu kina ena sekeniri, sa dau voravora noqu ivalavala.

 Au curu ena Mataivaluiwai ni Merika niu yabaki 18. Au vulica kina na sala meu vakayagataka kina noqu cudru meu veivakamatei. Oti e lima na yabaki, au biuta na mataivalu meu vulica na kena dau dikevi na vakasama, niu via cakacaka ena Tabana ni Veivaqaqai Vakalawa (FBI). Au tekivu vuli ena univesiti e Merika, au tomana tiko ga noqu vuli niu sa lesu tale e Kenada.

 Niu vuli tiko ena univesiti au rarawataka nodra ivalavala na tamata, kei na veika e yaco wavoliti au. Era dau nanumi ira ga, sega ni vakainaki tu e dua na ka ena vuravura qo, sega tale ga na iwali ni noda leqa. Oti sara ga vakadua noqu nuitaka nida rawa ni vakavinakataka na vuravura.

 E sega ni vakainaki tu noqu bula, tekivu meu vakayagataka kina vakasivia na alakaolo, wainimategaga, kocova na ilavo, au veiyacovi tale ga vakatawadodonu. Au dau vakasamataka tu ga na pati meu lako kina, e veiveisau tale ga noqu yalewa. Niu vuli mai na mataivalu, au doudou ni vala kei ira eso tale. Au nanuma niu kila na ka e donu kei na ka e cala, au qaqai ira kina na dau veitovaki se veivakaduiduitaki. Ia au vakalaiva tiko ga meu bobula ina ivalavala voravora.

 Dua na siga keirau vakayagataka vakasivia kei noqu itokani na wainimate gaga ena dua na rumu ena ruku ni neitou vale, gauna vata qori keirau vakarautaka tiko eso me volitaki. E tarogi sara au keu vakabauta ni bula tiko na Kalou. Au mani sauma, “Ke vakavuna na Kalou na veika rarawa kece e yaco tiko e vuravura, au sega sara ga ni via kilai koya!” Na kena siga tarava au gole i cakacaka, e tarogi au sara e dua noqu itokani vakacakacaka e iVakadinadina i Jiova: “O nanuma ni vakavuna na Kalou na veika rarawa e yaco tiko e vuravura?” Au kurabuitaka nona tarogi au va qori, e vakavuna meu via kila e levu na ka. Keirau veitalanoataka sara e levu na ka ena ono na vula e tarava, e vakaraitaka tale ga vei au na isaunitaro vakaivolatabu au dau vaqaqa tu me baleta na bula.

 E sega ni taleitaka na yalewa keirau veimusumusuki tu na veika au sa vulica tiko. Dua na Sigatabu au kaya vua niu sureti ira tu na iVakadinadina i Jiova mera mai vakavulici keirau ena iVolatabu. Na siga tarava, niu suka yani na cakacaka sa tokitaka kece na iyaya e lomanivale, sa biuti au tale ga. Au curu ga e tuba au sorova tagi, au masuti Jiova tale ga me vukei au. Qori na imatai ni gauna au vakayagataka kina na yaca ni Kalou o Jiova ena masu.—Same 83:18.

 Oti ga e rua na siga, au sa tekivu vuli iVolatabu sara kei na dua na veiwatini rau iVakadinadina i Jiova. Ni rau biubiu oti ga, au wilika tasevu vakadua me yacova na bogi na ivola ni vuli, Ko na Rawa ni Bula Tawamudu ena Vuravura Parataisi. a E uqeta sara ga na lomaqu na veika au vulica me baleta na Kalou o Jiova, na Luvena o Jisu Karisito. E dau yalololoma, e vakila tale ga na ka eda rarawataka. (Aisea 63:9) E uqeti au dina nona loloma na Kalou, kei na nona vakuai koya o Luvena ena vukuda. (1Jn 4:10) Au kila kina ni se vosoti au voli na Kalou, e ‘sega ni vinakata me rusa e dua, e vinakata ga meda veivutuni kece.’ (2 Pita 3:9) Au vakila ni o Jiova e vinakata meu nona itokani.—Joni 6:44.

 Au tekivu soqoni tale ga ena macawa qori. Au ulu balavu, vakasau, vakarerevaki tale ga na kequ irairai. Ia era kauaitaki au na iVakadinadina i Jiova, me vaka nodra marautaka e dua na wekadra sa dede qai laurai. Era vakaraitaka na itovo ni lotu vaKarisito dina. E vaka sara ga niu tiko vei rau o tutu kei bubu, ia e totoka vakaoti na kena qo.

 Sega ni dede e veisautaki au na veika au vulica ena iVolatabu. Au kotiva na uluqu, muduka noqu ivalavala vakasisila kece ni veiyacovi, kei na noqu dau vakayagataka vakasivia na wainimategaga kei na alakaolo. (1 Korinica 6:9, 10; 11:14) Au via vakamarautaki Jiova, niu vulica gona e dua na ka au cakava tiko e cata o koya sega tale niu qai vakaiulubale tiko, e vaka ga e lausua na utoqu. Au dau kaya ga: ‘Sega ni rawa niu na cakava tu ga qo.’ Sega tale niu wawa au na saga sara ga meu veisautaka noqu ivakarau ni vakasama kei na ka au cakava tiko. Sega ni dede au sa vakila na yaga ni noqu muria na ka e vinakata o Jiova. Ena ika29 ni Julai, 1989 ni oti ga e ono na vula noqu tekivu vuli iVolatabu au papitaiso sara meu iVakadinadina i Jiova.

 E veisautaka sara ga noqu itovo na iVolatabu. E liu ni dua e vakacudrui au, ena totolo ga noqu dau valavala kaukaua. Ia qo au saga tiko meu “veiyaloni kei ira na tamata kece.” (Roma 12:18) E dodonu me vakavinavinakataki ga kina o Jiova ni veisautaki au na kaukaua ni nona Vosa kei na yalona tabu.—Kalatia 5:22, 23; Iperiu 4:12.

 Au sa sega ni bobula tale tiko ena wainimategaga, ivalavala kaukaua, se gadreva na veika vakasisila. Ia au sa saga tiko ena noqu igu kece meu vakamarautaka na Kalou, meu solia tale ga vua noqu vinaka kece. Qori e okati kina noqu vukei ira eso tale mera mai kilai koya. Oti ga e vica na yabaki noqu papitaiso, au toki ina dua na yasa i vuravura e vinakati kina vakalevu na veivuke ena cakacaka vakavunau. Ena veiyabaki sa sivi, au marautaka noqu vakavulici ira e levu, kei na noqu raica na kena veisautaka nodra bula na iVolatabu. Au marautaka tale ga nona sa dua na iVakadinadina i Jiova o tinaqu, dua na vuna oya ni raica sara ga na veisau ni noqu ivakarau kei na noqu itovo.

 Ena 1999, au tuvaitutu e El Salvador ena koronivuli e kilai ena gauna qo me Koronivuli ni iTalatala ni Matanitu. Au vulica kina meu vakarautaki au ena liutaki ni cakacaka vakaitalatala, dau veivakavulici, meu veivakatawani tale ga ena ivavakoso. Na yabaki tale ga qori, au vakamautaki Eugenia kina, keirau sa veiqaravi tiko vakatabakidua e Guatemala.

 Gauna qo au sa sega ni dau yalolailai, au marautaka tiko ga vakalevu noqu bula. Noqu muria na ivakavuvuli vakaivolatabu au sega kina ni bobula tale ena veiyacovi vakasisila kei na ivalavala voravora. Ia au vakila ga na loloma kei na vakacegu.