Au sucu e Ciudad e Obregón ena noca kei Mexico, au ikalima vei keitou na le ciwa na veitacini. Keitou vakaitikotiko ena saula ni siti, e vakaiteitei kina o tamaqu. Dua na vanua totoka qori, keitou duavata vakavuvale qai mamarau. Ia ka ni rarawa niu se qai yabaki lima e vakacacana neitou iteitei na cagilaba, keitou mani toki ina dua na tauni.

 E tekivu rawaka vakailavo o tamaqu, qai dau mateni. E vakilai na kena revurevu vei keitou e vale. Kena ivakaraitaki, o au kei na rua na taciqu tagane keitou dau butakoca vua na tavako qai vakayagataka. Au tekivu gunu alakaolo niu se qai yabaki ono. Sega ni dede rau veibiu noqu itubutubu, qai levu na ka ca au cakava.

 Keitou toki kece vakaveitacini kei tinaqu ni sa lai tiko vata kei na dua na tagane. E sega ni dau soli ilavo vei Na, keitou sega tale ga ni bula rawa ena ka e rawata o tinaqu. Keitou mani cakava ga vakaveitacini na ka keitou rawata, ia e sega ni veirauti ena ka ni bula e veisiga. Au dau masi ivava, volitaki madrai, niusiveva, drega kei na so tale. Au yavoki tale ga e loma ni siti meu vaqara kakana ena nodra kavanibenu na vutuniyau.

 Niu se yabaki tini a sureti au e dua na turaga meu cakacaka ena vanua ni sova benu. Au mani vakadonuya, biu vuli, au biubiu tale ga mai vale. E sega ni sivia na dua na dola nona saumi au e veisiga, qai solia me kequ kakana na ka e tu ena ibenubenu. Au tara e dua noqu vale ena iyaya e biu laivi. Au bula maliwai ira na dau vosavosa ca, ra qai veiyacovi tawadodonu. E levu tale ga era bobula ena wainimategaga kei na alakaolo. E gauna dredre dina qori, au tagi tu ga e veibogi qai sautaninini ena levu ni noqu rere. Au madualaka noqu bula dravudravua kei na noqu sega tu ni vuli. Tolu na yabaki noqu bula tu ena vanua qori, oti au mani toki ena dua na yasa i Mexico. Au cakacaka sara ena dua na iteitei, meu beti senikau kei na vauvau, kumuni dovu qai keli pateta.

 Oti e va na yabaki au lesu i Ciudad Obregón. E vakadonuya o noqu nei, e dau vakatevoro, meu tiko ena dua na rumu ni nona vale. Au tekivu tadra e levu na ka vakadomobula, lomabibi, qai nanuma meu vakamatei au. Dua na bogi au sa masuta na Kalou: “Turaga ke oni bula dina tiko, au via kilai kemuni, au na qaravi kemuni tale ga me tawamudu. Ke tiko na lotu dina, au via kila.”

 Au dau taleitaka na vulica na veika me baleta na Kalou. Niu se gone mada ga, e levu na lotu au lakova, ia e sega ni dua e vakacegui au. E sega ni levu na ka era vakavulica ena iVolatabu, se vakaceguya noqu gagadre vakayalo. Eso era vakabibitaka ga na ilavo, eso tale na lewenilotu era veiyacovi tawadodonu.

 Niu yabaki 19, e tukuna o tavalequ na ka era vakaraitaka vua ena iVolatabu na iVakadinadina i Jiova, me baleta na vakayagataki ni ivakatakarakara. E wilika na Lako Yani 20:4, 5, e tukuni kina meda kua ni cakava na ivakatakarakara. E tukuni ena tikina e lima: “Mo kua ni cuva vei ira se bacani mo qaravi ira, ni o yau o Jiova na nomu Kalou, na Kalou e vinakata me qaravi duadua ga.” E tarogi au sara o tavalequ, “Ke vakayagataka tiko na Kalou na ivakatakarakara me cakamana kina, se vinakata meda vakayagataka nida sokalou, cava ga e vakatabuya kina?” E vakavure vakasama qori vei au. Keirau mani veivosakitaka e vica tale na usutu vakaivolatabu. E totolo ga na cawi ni gauna na noqu taleitaka na neirau veitalanoa.

 E kauti au sara ina nodra soqoni na iVakadinadina i Jiova. Au qoroya vakalevu na ka au raica kei na ka au rogoca. Era vakaitavi tale ga na itabagone, ra qai vosa vakamatata mai na buturara! Au mani vakasamataka, ‘Era vakavulici vinaka sara ga e ke!’ E balavu tu na drauniuluqu, qai sakulevu na kequ irairai, ia era marautaki au vakayalololoma na iVakadinadina i Jiova. Dua mada ga na vuvale e sureti au me keitou kana vata ni oti na soqoni!

 Au dikeva rawa ena noqu vuli iVolatabu kei ira na iVakadinadina i Jiova, ni dua na Tama dau loloma o Jiova. E kauaitaki keda se mani matatamata cava eda cavutu mai kina, itutu, bula vakailavo, vuli se isususu. E sega ni dau veivakaduiduitaki. (Caka. 10:34, 35) Sa qai vakacegui noqu gagadre vakayalo, au marau tale ga vakalevu.

 E veisau sara ga noqu bula! Au biuta na vakatavako, alakaolo, tinia tale ga noqu vosavosa ca. E seavu yani noqu dau vakila niu cati niu se gone, vaka kina noqu dau tadra eso na ka vakadomobula. Au sega tale ga ni beci au, qori na ka e vakavuna na noqu isususu kei na noqu sega ni vuli vinaka.

 E marama yalovinaka o watiqu, e lomani Jiova, qai tokoni au vakalevu. Au sa ivakatawa dauveilakoyaki tiko qo, meu sikovi ira na ivavakoso meu vakavulici ira na mataveitacini, vakayaloqaqataki ira tale ga. Au vakavinavinakataka vakalevu na veivakabulai ni iVolatabu, kei na nona veivakavulici uasivi na Kalou. Au sega ni maduataka tale na noqu bula.