Ena vica tiko ga na yabaki sa oti e vakila na matanitu o Venezuela na leqa vakailavo, kei na levu tale na veika dredre. E kaya e dua na tacida o Edgar: “Na loma ni gauna qori e leqa sara ga na veika vakailavo, kei na ka me keimami bula kina. Vakasamataka na kena dredre keimami nanuma ga ni keimami tiko ena dua na vanua e dravudravua vakalevu!”

 Cava e vukei Edgar me vosota? E kaya: “Keirau vakasamataka kei watiqu o Carmen na nodra vakaraitaki na daukaulotu era toki ena vanua era sega so ni rawati ira, kei na ka era cakava ke sega mada ga ni tu na veika e gadrevi. Qori e uqeti keirau me keirau bula rawarawa ga, qai cakava eso na ka me vaka na teitei.”

 E levu tale na ka rau cakava o Edgar. Rau vakayaloqaqataki ira na mataveitacini, okati kina o ira era lomabibi. (1 Cesalonaika 5:11) E kaya o Edgar: “Keirau vakacegui ira qai uqeti ira mera vukei ira eso tale me rawa nira marau tiko ga.”—Cakacaka 20:35.

 Ni tekivu veitauvi na COVID-19, e nanuma o Argenis me vunau vei ira na wekana. Eso era vakadonuya mera vulica na iVolatabu ena talevoni.

 E sureti ira tale ga na wekana e sega nodra internet mera sarava na soqo ni veiwasewase ni 2020. E dua na tacida e tiko voleka ena tauni e kea e solia vei ira na wekai Argenis na katokatoni ni porokaramu. Era sa qai kerea e dua na screen levu ni tivi, kei na sipika (speaker). Ni vakarau tekivu na porokaramu a qiriti ira o Argenis me masu vei ira. Nona gugumatua ratou tiko rawa ena soqo e 4 na wekana, kei na le 15 tale.

 Dua na veiwatini o Jairo kei Johana rau vakamotoka ena nodrau ivavakoso, rau qai vakayagataka nodrau lori me rau vukei ira kina eso tale. Ia e dredre me voli na benisini e Venezula. E kaya o Jairo: “Vica vata na aua keirau na wawa tu me tawa na benisini ni lori, eso na gauna ena rawa ni dua taucoko na bogi.”

 E tukuna o Jairo ni yaga dina na nodrau sasaga me rau vukei ira eso tale. E kaya: “Ni keirau solia na ka ni veivuke vei ira, keirau marautaka nira vakavinavinakataki Jiova ni vakarautaka na ka kece era gadreva.”—2 Korinica 9:11, 14.

 O Norianni e dua na tacida yalewa, e voleka ni yabaki 20. E nanuma ni sega ni rawa ni vukei ira eso tale baleta ni se gone. Ia e qai wilika na 1 Timoci 4:12: “Me kua sara ni dua e beci iko ni o se cauravou. Ia mo ivakaraitaki vei ira na yalodina.”

 Na tikinivolatabu qori e uqeti koya me veimaliwai vakalevu kei ira na itabaqase ena nona ivavakoso. E vukei ira ena vola ivola, e sureti ira tale ga mera tomani koya ena caka vuli iVolatabu. E dau qiri se text vei ira me vakayaloqaqataki ira. E kaya o Norianni: “Nona veitokoni o Jiova au vakadeitaka kina ni levu na ka au se rawa ni cakava.”

 Dua na ka na veika dredre era sotava tiko na tacida e Venezuela ena gauna qo. Ia era gumatua tiko ga ena cakacaka vakaitalatala, ra qai ‘dau veivakacegui tale ga.’—Kolosa 4:11; 2 Timoci 4:2.