O Clodean e iVakadinadina i Jiova, e tiko mai Sauca Aferika. E tauvimate bibi qai curu e valenibula. E vinakati me caka vua e dua na veisele levu, me vakatulewataka tale ga na veiqaravi vakavuniwai me caka vua. Dua na ka na mosi e vakila, e oca, qai lomaleqa vakalevu ni bera ni sele kei na gauna e oti kina. Ni lesu i vale, e voleka ni tini na macawa nona davo tu ga. E sega ni rawa tale ga ni sikovi ena vuku ni vakatatabu ni COVID-19.

 Ia e sega ni vakalomalomani koya o Clodean, e kerea vua na Kalou me vakaukauataki koya me rawa ni vakayaloqaqataki ira eso tale. Gauna ga e dabe rawa kina, e qirita sara e dua na yalewa rau tiko veivolekati sa cegu tu nona vuli iVolatabu. E vakayaloqaqataki koya ena iVolatabu. Dua na ka nona marautaka qori na yalewa qo, qai via tomana tale nona vuli. E vakamacalataka vua o Clodean na yaga ni tiko ena soqoni vaKarisito, kei na sala e rawa ni sema kina ni vakayagataka na internet. E mani tiko sara ena soqoni, e saumitaro tale ga.

 A vunau tale ga o Clodean vei taci yalewa, qai vinakata me vuli iVolatabu. E kaya sara vei Clodean ni so tale era via vulica na iVolatabu. Cava e qai yaco? E tekivutaka o Clodean na vuli iVolatabu kei na va tale na yalewa. Ia sega ni koya ga qori!

 Ni dau veikauaitaki dina o Clodean, e vakavulici ratou rawa kina ena iVolatabu e tini tale na yalewa ena gauna ni matedewa. Kena ibalebale, sa 16 kece na nona vuli iVolatabu. Eso era sa tiko wasoma ena soqoni. Nona ogaoga tiko o Clodean ena cakacaka vakaitalatala, e sega kina ni vakayalolailaitaki koya na kena ituvaki. E vakadinadinataka ni o Jiova “e dau vakacegui keda ena ka kece,” ena vakacegui koya tale ga ena ituvaki dredre e sotava tiko. Qori e uqeti koya me vakacegui ira eso tale.—2 Korinica 1:3, 4.

 E yaga vakacava vei ratou na gonevuli qo na veika ratou vulica? E kaya e dua vei ratou: “Levu na sala e yaga kina vei au. Ia koya e bibi duadua noqu mai kila na yaca ni Kalou. Qori e vakavolekati au sara ga vei Jiova.” Vakacava na imatai ni yalewa rau veivosaki kei Clodean? Sa nanamaki tiko qo me papitaiso. Dua na ka nona marautaka qori o Clodean, sa bulabula vinaka tale tiko ga ena gauna qo.