O Rachel e tiko ena Dominican Republic. E kaya: “Rau qaravi Jiova tiko na noqu itubutubu ena gauna au sucu kina. Ka ni rarawa, niu yabaki vitu sa sega ni dau sosoqoni o Ta, e veitusaqati kaukaua tale ga. Qori e vakadredretaka sara ga noqu qaravi Jiova. Kena ivakaraitaki, na levu ni nona vinakata meu kua ni qaravi Jiova e solia noqu talevoni, kauti au i Disneyland, e solia mada ga noqu credit card! Eso na gauna e dau vaculaki au me rawa niu biuti Jiova, lai vakavuna meu sega ni rawa ni vosa se taubale. E nanuma o Ta niu na sega ni rawa ni gole kina ena soqoni. Ia e dreve na ka e cakava, au dau sasaga ga meu tiko ena soqoni.

 “E dau mokuti au o Ta ni yali o Na, qai kaya vei au ni na mokulaki Na keu vakatukutuku vua. E dau ulubaletaka ni vu ni noqu mavoa ni vakavulici au tiko ena karate.

 “Au se gone, au rere tale ga na tukuna vei Na na ka e cakava tiko vei au o Ta. Au sa qai talaucaka qori vei Jiova. Au na taubale i veikau volekata neitou vale e Maryland, e Merika. E tiko e kea e dua na vu ni oki au na kaba sara ena dua na tabana i cake, qai masu vei Jiova. Au na tukuna kece vua na lomaqu, kei na ka au na cakava ke taqomaki au tiko ga. Au dau tukuna tale ga vua na ka au na cakava ena vuravura vou, noqu vuvale ena gauna ya, na marau kei na vakacegu au na vakila ni sa na sega tale na rere kei na mosi.

 “E dau mokulaki au o Ta, e solia tale ga vei au eso na ka meu kua kina ni qaravi Jiova. Ia e vakacegui au qai vakaukauataki au tu ga o Jiova ena gauna kece qori. E vukei au meu vosota qai yalodina tiko ga.

 “Au papitaiso niu yabaki tini. Oti e rua na yabaki au painia sara. E sega ni kila tu qori o Ta, ia na gauna e rogoca kina e vaculaki au qai lutu na galegalequ.

 “Eso era kaya vei au meu kua ni painia niu se gone, era leqataka tale ga niu sega ni kila na bibi ni itavi qori. Toso na gauna, au raica e levu na itabagone ena neitou yasayasa e sega ni vu mai lomadra nodra qaravi Jiova. Era taleitaka vakalevu na marau kei na pati. E veibacani na ka era cakava, eso na gauna au dau via cakava tale ga. Au veinanuyaka, ‘Vakacava meu cegu na vunau meu lai tovolea mada na ka era marautaka?’ Ia au na tukuna vei Jiova ke basika mai na rai va qori.

 “Niu yabaki 15, ratou via vakayagataki au ena modela e dua na kabani ni modela kilai levu. Ratou kaya ni ratou na solia vei au e dua na ilavo levu keu cakacaka ena nodratou ofisi e Milan, e Itali. Au marau ni ratou tukuna niu rawa ni modela, biu na kequ itaba ena mekesini qai dara na isulu saulevu ena soqo lelevu. Sa voleka ni tolu na yabaki noqu painia tiko, au mani vakasamataka, ‘Na cakacaka qo e rawa ni tokoni au vakailavo, vukei au tale ga meu tomana tiko ga noqu painia!’ Sa biuti keirau o Ta, au nanuma meu na veivuke tale ga vakailavo vei Na.

 “Au masulaka na ituvaki ya. Au tukuna tale ga qori vei Na sa dede toka mai nona painia, kei na dua na qase ni ivavakoso matua. Au gole tale ina vu ni oki lai talaucaka na lomaqu vei Jiova. E sauma o koya noqu masu ena tikinivolatabu e tukuna vei au na qase ni ivavakoso. Ya na Dauvunau 5:4, e kaya: ‘Ni o bubului vua na Kalou, mo cakava. Mo vakayacora na ka o bubuluitaka.’ Io au yalataka vei Jiova niu na qaravi koya ena noqu vinaka kece, au leqataka tale ga de na vakaleqai au vakayalo na cakacaka qo. Au mani vakatulewataka meu vakasuka.

 “Levu na veika dredre au sotava niu se gone, ia e taqomaki au tu ga o Jiova! Gauna qo au sa marautaka tiko noqu bula kei watiqu o Jaser, kei na luvei keirau o Connor e yabaki ciwa. E qase ni ivavakoso o watiqu, sa dautukutuku bera ni papitaiso o Connor. Sa voleka ni 27 na yabaki noqu veiqaravi tiko vakatabakidua.

 “Au dau vakasamataka noqu dau lai vosa vei Jiova ena vu ni oki volekata neitou vale. Au dau kerei koya me vukei au, e cakava qori ena sala au sega ni namaka. E veivakaukauataki, veivakacegui qai taqomaki au. E levu na sala e vakaraitaka kina o Jiova vei au ni dua na tama dauloloma ena noqu bula kece. Au marau niu qaravi koya ena lomaqu taucoko. Qori na vakatulewa vinaka duadua au cakava.”