E ivakatawa ni tabacakacaka o Artur, e sikova tiko e dua na ivavakoso ni iVakadinadina i Jiova e Armenia. E liaca nira se bera ni vakaitavi tiko na mataveitacini ena vunau e matanalevu, oya me vakayagataki na qiqi era tu kina na ivola vakaivolatabu. E mani tuvanaka sara kei watina o Anna, kei na dua tale na tacida o Jirayr, me vakayagataki na qiqi ni vunau ena dua na taoni. Ratou mani digia e dua na vanua era tavali vakalevu kina na lewenivanua.

 Dua na ka nodra tataleitaki o ira na tavali e yasa ni qiqi, ra kauta tale ga eso na ivola. Sega ni dede rau vakararai toka e rua na bete dauveitusaqati, rau lakova sara yani na qiqi dua vei rau sa tekivu caqeta na qiqi. Oti e roba na matai Artur qai taluva nona matailoilo. Dua na ka nodratou saga o Artur, Anna, kei Jirayr me ratou tarovi rau, ia e dreve nodratou sasaga. Ni bera ni rau biubiu rau butulaka na qiqi, ceburaka na ivola, veivakarerei, qai vosacataki ratou na tacida.

 Ratou gole sara o Artur, Anna, kei Jirayr ina siteseni ni ovisa me ratou lai ripotetaka na ka e yaco. Ni ratou vakamacala oti, ratou wasea tale ga na itukutuku ena iVolatabu vei ira na ovisa kei ira na cakacaka kina. A vakatarogi ratou tale ga na turaganiovisa ni via kila na ka e yaco. Ia ni raica o koya nona tamata momoqaqa o Artur qai sega ni via sauma lesu na iroba e caka vua, e via kila sara ga nodratou vakabauta. E va na aua nodratou veitalanoa tiko! E kurabui na turaganiovisa ena ka e rogoca, e kaya: “Dua dina na lotu vinaka! Au via lewena sara ga!”

 Ena siga e tarava e tomana tale o Artur na vunau ena qiqi, e gole sara yani e dua na tagane a raica na ka kece e yaco. E vakavinavinakataki Artur ena nona sega ni sauma lesu na ka e caka. E kaya tale ga ni ka e raica ya e sega sara ga ni via dokai ira tale na bete.

 Ena yakavi tiko ga ya, e kacivi Artur na turaganiovisa ni via kila eso tale na ka me baleta na iVolatabu. Rau veitomani tale ga ena veivosaki qori e rua na ovisa.

 Ena siga e tarava, e sikovi turaganiovisa tale o Artur me vakaraitaka vua eso noda vidio vakaivolatabu. E kacivi ira na vo ni ovisa na turaganiovisa, ra sarava tale ga na vidio.

 Na ka e cakava qori na bete era ciqoma kina ena imatai ni gauna e levu na ovisa na itukutuku vinaka. Dua dina na irogo vinaka me baleti ira na tacida.