Ena 2011 e gole i Norway e dua na isenivalu mai Eritrea. Era vunau vua na iVakadinadina i Jiova, mani kaya vei ira ni sa sotavi ira tale ga na tacida e nona vanua. Ni se tu ena mataivalu e Eritrea, sa dau raica nodra bala e valeniveivesu ra vakatotogani tale ga na tacida nira sega ni via curu ena mataivalu.

Dua na ka a yaco vakasauri ena nona bula mani bala e valeniveivesu. Qori na vanua a sotavi ratou kina na tolu na tacida, o Paulos Eyasu, Negede Teklemariam, kei Isaac Mogos. Ratou se vesu tu ena 1994 ena vuku ni nodratou vakabauta.

E vakadinadinataka e valeniveivesu na tagane qori nodra muria na tacida na ka era vakavulica. E raica nodra dau dina na tacida, ra wasea tale ga na kedra kakana vei ira na vo ni kaivesu. E raica tale ga nodra dau vulica vata na iVolatabu, ra sureti ira tale ga na vo ni kaivesu. Era bese mada ga ni sainitaka na ivola mera cakitaka nodra vakabauta.

E tarai koya sara ga na tagane qori na veika e raica. Ni yaco e Norway, e vinakata me kila na vuna e dei kina noda vakabauta. Tekivu vulica sara na iVolatabu kei ira na tacida, gole tale ga ena soqoni.

A papitaiso me iVakadinadina i Jiova ena Seviteba 2018. Sa vukei ira tiko e levu era gole mai Eritrea kei Sudan mera vulica na iVolatabu, me dei tale ga nodra vakabauta.