Ena ika14 ni Seviteba 2013, era soqoni e rauta ni 10,500 na iVakadinadina ena tuvaitutu ni ika135 ni kalasi ni Koronivuli o Kiliati e Patterson, Niu Yoka, na vanua e dau caka kina nodra vuli na iVakadinadina i Jiova. Na koronivuli qo e vakavulici ira na kenadau ena cakacaka vakaitalatala me vuavuaivinaka na itavi era lesi kina.

E jeameni ena tuvaitutu o Guy Pierce, e lewe ni iLawalawa Dauvakatulewa ni iVakadinadina i Jiova, e yavutaka nona vosa ena Maciu 28:19, 20: “Ni lako moni vakavulici ira na lewe ni veivanua kece ga mera noqu tisaipeli, . . . vakavulici ira mera muria na ka kece au vakarota vei kemuni.”

E vakamacalataka o Brother Pierce ni se tomani tiko ga nikua na ka e tukuna o Jisu. Nida veivakatisaipelitaki, eda vakavulici ira na lewenivanua mera muria na ka kece e vakarota o Jisu. E okati kina na ivakaro mera vunautaka “na itukutuku vinaka qo ni Matanitu.” (Maciu 24:14) Ena sala qo, o ira kece na tisaipeli vou era vunautaka qai vakavulica na itukutuku ni Matanitu. Na cava e rawati kina? E tomana o Brother Pierce, “e tubu na kedra iwiliwili [na lewe i vuravura] vaka kina na kedra iwiliwili na tamata ni Kalou.”

“Era Lomasavu.” O Thomas Cheiky, e lewe ni Komiti ni Tabana e Merika, e yavutaka nona ivunau ena 2 Korinica 8:​1-4. Ena imatai ni senitiuri era cikeva na lotu vaKarisito dravudravua e Masitonia mera cau ena vukudra na mataveitacini e Jerusalemi. E laurai tale ga qo vei ira na gonevuli ni Kiliati, na yalo ni vakuai ira kei na lomasoli.

Ena gauna vata qori eda kila nira yalomatua na kai Masitonia, ni sega ni sivia tale na ka era solia me vakaleqa nodra vuvale se nodra sokalou vua na Kalou. E vakauqeti ira na gonevuli o Brother Cheiky mera vakatotomuri ira na kai Masitonia mera veiraurautaka na nodra solika.

“Sa Mai Cava na Vuli.” O Samuel Herd e lewe ni iLawalawa Dauvakatulewa e vakabibitaka vei ira na gonevuli na vuna mera kua ni guilecava kina na nodra vuli ena Koronivuli o Kiliati. Me vaka na sere totoka o rogoca ena mataka, o na sega ni guilecava rawa ena siga taucoko, ena vakadeitaki ira tale ga na gonevuli nodra vakananuma na vuli e Kiliati.

E vakadreta vei ira na gonevuli o Brother Herd ni sega ni vakaiyalayala na ka e nanuma na Kalou. E vakayacani ira na bilioni vaka bilioni na isoso kalokalo, ena sega vakadua ni guilecavi ira. (Same 147:4) Ena sega tale ga ni guilecava na nodra sasaga na gonevuli era vuli e Kiliati! Era kumuna na “iyau mai lomalagi,” ena sega tale ga ni dua e rawa ni kauta laivi na ka e nanuma o Jiova me baleti ira.​—Maciu 6:​20.

Ni nanuma na Kalou na nodra cakacaka kei na nodra lomani koya, e dodonu gona mera mareqeta nodra vuli e Kiliati. E tukuna o Brother Herd, “ni vakamarautaki iko nomu vakasamataka na gauna ni vuli, kua ni guilecava mo vakavinavinakataki Jiova, o koya e vu ni nomu marau. Dau vakananuma na veika qo, ena vukei iko vakalevu.”

“Me Vakacegui Iko na Kaukaua i Jiova e Sega ni Tukuni Rawa.” E vakauqeti ira na gonevuli o Sam Roberson e dauveivakavulici e Kiliati mera nuitaka na kaukaua i Jiova mera vosota kina na ituvaki dredre. E kaya na Efeso 3:​20 ni Kalou “ena rawa ni cakava vei keda na ka e uasivia sara na ka eda kerea se bau vakasamataka.” Eda sega ni kila se vakamacalataka rawa na nona kaukaua na Kalou, ni ‘uasivia sara na ka eda bau vakasamataka’ baleta e tukuni ena tikinivolatabu qo ni ‘uasivi’ sara na ka e rawa ni cakava.

O Jiova e vakarautaka tu vei ira na lotu vaKarisito na nona kaukaua. O koya e vaka e “dua na qaqa rerevaki,” se “dauvala qaqa,” ena gauna ni leqa. (Jeremaia 20:11; God’s Word Bible) E vakadreta vei ira na gonevuli o Brother Roberson ni o Jiova ena vukei ira ena leqa cava ga era sotava.

“Me Dokai na Nomuni Cakacaka Vakaitalatala.” E vakamacalataka o William Samuelson, e dauveivakavulici tale ga e Kiliati, ni rua na ka era rawa ni sakitaka na gonevuli ni Kiliati ena nodra cakacaka vakaitalatala. Era vakadinadinataka ni ganiti ira mera dokai ena vuku ni nodra cakacaka ni bera kei na gauna ni vuli, kei na nodra dokai tiko ga nira matataka na matanitu cecere duadua​—oya na Matanitu ni Kalou.

Na cava mera cakava na gonevuli mera dokai tiko ga kina? E uqeti ira o Brother Samuelson mera vakarokorokotaki Jiova ra qai dokai ira na lewenivanua, me vaka nona dau rokovi ira na so tale o Jisu ena gauna mada ga e veivakadodonutaki se veivakasalataki kina. Na cava na kena yaga? Me vakataki Paula ga, ena dokai qai vakacaucautaki na nodra cakacaka vakaitalatala.​—Roma 11:13.

“Na Nodra Kaukaua na Ose e Tiko e Gusudra.” E vakaraitaka o Michael Burnett e dua tale na dauniveivakavulici e Kiliati, na sala eda tokona kina na Vakatakila 9:​19, noda vakayagataka na ka eda vulica ena soqoni vaKarisito meda vunau kina ena doudou. Oti qori e veivosakitaka kei ira na gonevuli se vakatasuasuataka na veika marautaki era sotava ena nodra cakacaka vakavunau donuya nodra vuli e Kiliati. Kena ivakaraitaki, a taroga e dua na gonevuli na taro vakavure vakasama vua e dua e cakacaka ena igunugunu ni benisini ni kaya, “Gauna cava e tekivu qai cava kina na nodra gauna lokuci na veimatanitu?” (Luke 21:24) Ni lai sikovi koya tale, e vakaraitaka vua na isaunitaro ena Taniela wase 4, kei na ikuri ena ivola Na Cava Sara Mada e Kaya na iVolatabu?

“E Vakadeitaki na Lomadra.” O Adrian Fernandez, e lewe ni Komiti ni Tabana e Merika, e vakataroga e rua na veiwatini eratou sa taura na nodratou ivola. E vakamacalataka o Brother Helge Schumi ni tukuni ena iVolatabu eso na dauveiqaravi ni Kalou era qaciqacia ni soli vei ira eso na itavi lavotaki, ia na vuli e Kiliati era vakadreti kina ni bibi mera dau yalomalumalumu. (2 Veigauna 26:16) Qori tale ga na ka e nanuma o Brother Peter Canning ena dua na ulutaga ni vuli e Kiliati me baleta na vulici ni vosa ni vanua era lesi kina, e tukuni kina: “Kua ni dokadoka. Ciqoma ni o na dredrevaki ena so na gauna.” Eratou vakavinavinakataka na va na gonevuli qo ni vuli e Kiliati e vakarautaki ratou ena veika sa tu mai liu, e vakadeitaka tale ga na lomadratou.​—Iperiu 13:9.

“Moni Marau ga ni sa Volai na Yacamuni Mai Lomalagi.” (Luke 10:20) O Geoffrey Jackson e lewe ni iLawalawa Dauvakatulewa, e vosa ena ulutaga levu ni porokaramu. E levu vei ira na tuvaitutu ena kalasi qo ena sega ni veisau na nodra ilesilesi, se mera lesi ena vanua se sega vakadua ni vunautaki kina na itukutuku vinaka. Me vakacava na nodra rai na gonevuli?

Nira lesu mai na le 70 na tisaipeli a tala o Jisu mera lai vunau, era tukuna vua na ka marautaki nira vakasava na timoni ena yacana. (Luke 10:​1, 17) E duavata kei ira o Jisu, ia e tukuna ga: “Me kua ni vu ni nomuni marau na nomuni vakamalumalumutaki ira na timoni, moni marau ga ni sa volai na yacamuni mai lomalagi.” (Luke 10:20) E vakaraitaka gona o Jisu ni na sega ni dau yaco qori e veisiga. Kena ibalebale me bibi vei ira na nodra yalodina vei Jiova kei na kena ‘sa volai mai lomalagi’ na yacadra, sega ni veika e rawati.

E tomana o Brother Jackson, “eda vuli tale ga ena ka e tukuna o Jisu vei ira na le 70 na tisaipeli.” Me kua ni vu ni noda marau se yalodina na veika eda rawata ena noda cakacaka vakavunau. Ia me vu ni noda marau kei na noda yalodina, na noda veiwekani voleka kei Jiova kei na noda gumatua nida qaravi koya.

A sotava tale ga o Jisu na ituvaki e rawa ni veivakayalolailaitaki. Kena ivakaraitaki, era tekivu muri koya e udolu ni oti nona vakani ira vakacakamana. (Joni 6:​10-​14, 22-​24) Ia ni toso na gauna, e levu vei ira qori era biuti koya nira tarabe ena so na ka e vakavulica o Jisu. (Joni 6:​48-​56, 60, 61, 66) Ia eratou vakadeitaka na nona yapositolo yalodina ni ratou na sega ni biuti koya. Eratou ivakaraitaki vinaka ena nodratou raica vakabibi na nodratou veiwekani kei na nodratou yalodina vei Jiova, sega ni veika e rawati.​—Joni 6:​67-​69.

Kena itinitini. Nira tauri ivola oti na gonevuli, e wilika sara e dua na gonevuli nodra ivola ni vakavinavinaka na lewenikalasi. E tinia o Brother Pierce ni raici ira sobu na tamata ni Kalou o vuravura, wili kina o ira na gonevuli ni Kiliati. (Cakacaka 4:​13; 1 Korinica 1:​27-​31) E vakadonuya ga o Jiova na noda yalataki keda vua qai solia vei keda nona yalo tabu. E kaya o Brother Pierce ni sega ni qoroya o Jiova na ka eda kila, “e qoroya ga na noda yalodina, kei na noda lomani koya dina.”