Era vakadewataka na iVakadinadina i Jiova na ivola vakaivolatabu vakavalagi ina sivia na 900 na vosa. E dredre toka me vakadewataki na vosa vakavalagi ina dua tale na vosa. Ia e levu sara na ka e okati ena vakadewataki ni vosa vagalu. E levu na didivara era veivosaki nira vakayagataka na ligadra kei na irairai ni matadra. O ira gona na dauvakadewa ena vosa vagalu era na matanataka na ka e volai. Era vakadewataka rawa kina o ira na iVakadinadina e sivia ni 90 na ivola ena vosa vagalu.

Me vakataki ira ga na dauvakadewa era iVakadinadina, o ira na dauvakadewa ena vosa vagalu era kila vinaka tale ga na vosa era vakadewa kina. E levu era didivara ra qai vosa vagalu nira tubucake tiko. Eso tale era rawa ni vosa, ia era kila na vosa vagalu ni vica nodra lewenivuvale era didivara. Era gonevuli gugumatua tale ga ni iVolatabu o ira na dauvakadewa.

Era vakavulici vinaka ena yavu ni vakadewa na dauvakadewa vou. Kena ivakaraitaki e kaya o Andrew: “Au vuli ena koronivuli ni didivara qai vakayagataka na vosa vagalu, ia e vukei au na veivakavulici ni dauvakadewa meu kila vinaka kina na ituvatuva ni vosa. Era vakavulici au eso na dauvakadewa meu vakavinakataka na ivakatakilakila ni vakayagataki na liga, irairai ni mata, kei na yavala ni yago me rawa ni vakavotui vinaka na vakasama.”

Era cakacaka vakatimi na dauvakadewa. Na lewe ni timi yadua ena cakava vinaka na itavi e lesi kina, se mani vakadewa, dikevi na vakasama, se wilika na ka e vakadewataki. Ke veiganiti, rawa nira sureti na dauwiliwili didivara ena so na vanua, e duidui tale ga nodra ivakarau ni bula mera raica na ka e vakadewataki. Na veika era raica me vakavinakataka na ivakarau ni vakadewa. Na ikalawa qo e vukea me rairai matau na ivakatakilakila ni liga kei na irairai ni mata. Me donu qai matata na itukutuku e vakaraitaki ena vidio.

O ira na dauvakadewa ena vosa vagalu era na lewena ga na ivavakoso vagalu. Era na caka vulivolatabu tale ga kei ira na didivara era sega ni iVakadinadina i Jiova. Qo e dua na sala e vukei ira na dauvakadewa mera kila vinaka kina na vosa sa vakayagataki tiko nikua.

E kaya na iVolatabu nira na rogoca na itukutuku veivakacegui, e nuitaki tale ga o ira mai na “veimatanitu kece, veiyavusa, veimatatamata, kei na duivosavosa”. (Vakatakila 7:9) E wili tale tiko ga kina o ira na veivosaki ena vosa vagalu.

Era marau na dauvakadewa mera vakayagataka nodra kila kei na gauna ena cakacaka yaga qo. E kaya e dua na dauvakadewa o Tony: “Au didivara, au vakila tale ga na dredre era sotava o ira era vakataki au. Au dau vinakata gona meu wasea vei ira ena kena levu au rawata na inuinui e tu ena iVolatabu.”

E lewe tale ga ni timi ni vakadewa ena vosa vagalu o Amanda, e kaya: “Niu vakatauvatana kei na noqu cakacaka e liu, e yaga sara ga vei au na vakadewataki ni ivola vakaivolatabu me vakasavui kina na itukutuku vei ira na didivara.”

Na idusidusi ena “Find Sign-Language Content” o na raica kina na vidio ni vosa vagalu ena website na jw.org.