Era vosataka e levu na galu era tiko ena tokalau kei Kenada na vosa vagalu ni Quebec (LSQ). * Nira le 6,000 na galu ena yalava qori, e vica ga na vidio e tu ena nodra vosa. Ia e vinakati mera kila e levu na iVolatabu, era gumatua kina na iVakadinadina i Jiova mera vakarautaka eso tale na vidio ena vosa vagalu e sega ni saumi.

Me rawa nida kila na bibi ni kena vakadewataki, dikeva mada na italanoa kei Marcel. E sucu ena 1941 ena yasana o Quebec e Kenada. Oti ga e rua na yabaki e tauvi koya na matenimona na meningitis, vakavuna nona daligavara. E kaya, “Niu se qai yabaki ciwa, au tekivu vuli ena nodra koronivuli na galu, qori na vanua au vulica kina na vosa vagalu ni Quebec. E tu eso na ivola e vulici kina na vosa vagalu rawarawa, ia e sega ni dua na vidio ena vosa vagalu.”

Cava e bibi kina me vakarautaki na vidio ena vosa vagalu ni Quebec? E kaya o Marcel: “Era vinakata na galu mera kila na itukutuku e kilai rawarawa ga. Ni sega na ivola ena vosa vagalu ni Quebec, keimami sa vakararavi ga ena vosa e vosataki vakalevu sega ni levu kina na ka keimami kila!”

Me rawa ni vukei o Marcel kei ira e levu tale na galu era vosa vagalu ni Quebec, era vakadewataka kina ena 2005 na iVakadinadina i Jiova na imatai ni nodra ivola ena vosa qori. Dua na gauna wale tiko ga qo, e vakalevutaki na valenivolavola ni vakadewa mai Montreal e Quebec. Ratou le vitu na tacida ratou veiqaravi tiko kina vakatabakidua, e vica vata tale era cakacaka vagauna. E tauyavutaki sara e tolu na timi ni vakadewa, e vakarautaki tale ga e rua na vanua ni katokatoni me baleta na vidio ena vosa vagalu ni Quebec.

Dua na ka nodra vakavinavinakataka o ira na vosa vagalu na ivola era vakarautaka na tacida. E kaya o Stéphan Jacques, e ivukevuke ni dairekita ni Association des Sourds de l’Estrie *: “E vakasakiti dina na vidio ratou cakava. E matata vinaka nodra matanataka na vosa, salavata kei na irairai ni matadra. E rakorako tale ga nodra isulusulu na vakaitavi kina.”

E vakayagataki e veimacawa ena nodra soqoni na iVakadinadina i Jiova e veiyasa i vuravura na mekesini Na Vale ni Vakatawa, sa tu tale ga ena vosa vagalu ni Quebec vei ira na le 220 na iVakadinadina i Jiova era lewena e vitu na ivavakoso vagalu kei kena iwasewase lalai e Quebec. * Kuria ya, e tubu tiko ga na iwiliwili ni vidio ena vosa vagalu era tu ena internet, kei na sere veiuqeti era yavutaki vakaivolatabu.

E kurabuitaka o Marcel e vakamacalataki taumada, na levu ni vidio e vakarautaki ena vosa vagalu ni Quebec. Dua na ka nona vakavinavinakataka nodra cakacaka na iVakadinadina i Jiova. E kaya: “E vu ni veivakalougatataki na levu ni vidio sa tu ena vosa vagalu ni Quebec era tu ena jw.org. Au marau niu raica nira sa tu sara ga ena noqu vosa!”