Era kelia tiko qo ena rua na misini lelevu na timi ni tarataravaki na vanua me vakadavori kina na paipo ni wai lelevu. Laurai tale tiko ga e muri na Valenivolavola.

E saumi e dua na kabani ni tarataravaki me mai vakacobara na lalaga e tuba. Na roka kei na ituvatuva ni lalaga qori e sagai me tautauvata kei na irairai ni tautuba.

Ni sova oti na simede, a vakayagataki e dua na mataqali misini va qo me vakatautauvatataka, me taliva, me dei tale ga.

iRairai ni valenivolavola ni laurai tiko mai macawa ena muaicake. E samaki tale tiko ga na vanua me ikelekele ni motoka ena mata ni valenivolavola ena tiko kina na rumu me tavaki ira na vulagi. Sa tara oti tale ga na kaukamea ni vale me sema kina na valenivolavola qori kei na dua tale na iyatuvale ena imawi. Laurai tale tiko ga qori na tabavale e tara ena muaicake kei na muaira.

Volekata toka na iTikotiko A, e vakadikeva tiko e dua na daunisovea qai vakavola na nona cakacaka o koya e dau qarava na lomanibai. Era sa tei rawa tu na kau ni bera na tarataravaki, ni gauna e oti kina era sa ka lelevu tu.

Erau boroya tiko na dauboroboro qo e dua na mataqali iboro (resin) ena ikelekele ni motoka. Dua vei rau e dara tiko e dua na mataqali ivava ena sega ni maka kina na vanua sa boro oti. E dau dei na iboro qori, e sega tale ga ni kabi kina na waiwai, e ganita me boro ga kina na ikelekele ni motoka.

Era vakarautaka ra qai musuka na palama na jeini me ivakadei ni papa e lili ena dokanivale me vakarautaka na katakata.

Boro tiko na lalaga ena imatai ni iboro ena loma ni valenivolavola. E ubi ena palasitika loaloa na misini ni cagi (na HVAC unit), me kua ni takava na iboro.

Rau biuta tiko qo e rua na yalewa na kaukamea sitila ena rumu era tavaki kina na vulagi.

Dua na mataqali misini qo na yacana na spider crane e laveta cake na iloilo me biu ena lalaga e tuba ni valenikana kei na vanua ni soqo.

Eratou vakacobara tiko na timi ni internet na isema ni mua ni keveli ni internet. E rauta ni 50 na kilomita na balavu ni keveli era dodo tu ena ruku ni fuloa ni va kece na tabavale qori ena Valenivolavola. Na cere ni fuloa e vakarawarawataka na kena caka na veiveisau, me kua tale ga ni levu sara na cakacaka e vakayacori kina.

Ratou vakatovotovotaka tiko na Timi e Veivuke Vakatotolo ni Yaco na Vakacalaka na sala me vukei kina e dua ni lutu mai na vatavata cere, se ni tao nona beleti ni toka ena dua na vanua cere.

E vakarautaka tiko e dua vei ira na timi ni tarataravaki na iyala ni vanua me sova kina na simede. Dua tale na misini e kelikeli tiko qori ena vanua me tei kina e dua na mataqali vunikau na hornbeam.

Kena irairai mai macawa. E biu tiko e dela ni vale ruarua ni tabavale ena muaicake kei na muaira, vaka kina ena valenivolavola na sola, me veisautaka na katakata ni siga ina livaliva.

E tuva taile (tiles) tiko e dua vei ratou na timi ni tarataravaki ena vanua ni wawa ena ikatolu ni tabavale. E wasei rau na simede kei na taile na rapa seninawanawa, me taqomaka na taile me kua ni kaca ena gauna e yavalati kina.

Era kana tiko na cakacaka ena dua na vanua ni kana e tara tu vakawawa. E wasei vakatolu na gauna ni kana, mera kana kina e voleka ni dua na udolu ena dua na siga.

Usana tiko na iyaya mai na mua ni itikotiko ni valenivolavola e dua na lori levu ni usa benu. Ena imatau, e laurai toka na iloilo donuya na duru lelevu ni valenikana kei na vanua ni soqo me kua ni cilava yani na siga ena draki batabata.

Eratou tuva ibenivalagi e dua na timi, eratou veivuke tale ga eso na lewe ni timi ni Porokaramu ni Bolecakacaka ena Dua na Siga (Day Volunteer Program). Ena vuku ni porokaramu qori, era marautaka kina na ivavakoso kece ni iVakadinadina i Jiova e Peritania kei Ailadi na nodra mai veivuke ena loma ni dua na siga na bolecakacaka. Ni cava na vula o Feperueri, era veivuke ena cakacaka qo e sivia ni 5,500.

E tara e dua na lalaga ena lomadonu ni tabavale me wasea kina na loma ni vale levu qori. Na duru seninawanawa lailai era vakatakilakilataka na vanua me ciciva na misini e vakayagataki me kabi kina na lalaga.

Sa samaki tiko qo na vanua e se tara tu kina vakavo na fuloa ena vanua ni wawa.