E vica vata na milioni na didivara kei ira na sega ni rogo vinaka era tiko e Idonisia, e dau vakatokai ena so na vanua qori me “iYalayala ni Veimama kei Vuravura” (Emerald of the Equator). Me rawa nira vukei na tiko kina era vakarautaka na iVakadinadina i Jiova e levu na ivola vakaivolatabu kei na porokaramu ni veivakavulici ena Vosa Vagalu ni Idonisia. E vakilai sara ga na nodra sasaga.

E vakayacori ena 2016 e Medan, ena muaicake kei Sumatra na nodra soqo vakaiwasewase na iVakadinadina i Jiova ena Vosa Vagalu. Dua na vakailesilesi a gole yani ena soqo qori qai vakavinavinakataki ira na iVakadinadina i Jiova nira vakarautaka na porokaramu ni veivakavulici e sega ni saumi. E uqeti koya sara ga na ka e raica mani tomani ira ena lagasere ni vakatotomuria tiko nodra Vosa Vagalu.

E kaya na manidia ni vanua qori: “E vakayacori vinaka na soqo qai sega ni dua na ka e vakataotaka. Nuitaki nira na vakarautaka tiko ga na soqo matalau va qo na iVakadinadina i Jiova mera vukei kina o ira na didivara tu.” E kaya tale ga ni gauna e rogoca kina na itaukei ni vanua qori ni soqo qo e baleti ira tiko na didivara, “e via vakavinavinakataki ira sara ga na iVakadinadina i Jiova. E vakaroti au sara meu vakarautaka na kedra vakasigalevu na le 300 kece era tiko kina.”

Era dau sikovi ira tale ga na galu na iVakadinadina i Jiova mera veivosakitaka na itukutuku vakaivolatabu. Era dau vakayagataka na vidio ni Vosa Vagalu ni Idonisia e vakarautaki me vukei ira mera marautaka na bula e vinaka, e veivakacegui tale ga.

E kaya o Mahendra Teguh Priswanto, na ivukevuke ni dairekita ni isoqosoqo ni didivara e Idonisia (Indonesian Association for the Welfare of the Deaf) ena siti o Semarang, e Java e Loma: “Moni vakacaucautaki ena cakacaka oni cakava me baleti ira na didivara. Kena ivakaraitaki, sa bau yaga dina na vidio E Rawa ni Mamarau Nomu Vuvale. Keimami taleitaka vakalevu me tomani tiko ga na nomuni veiqaravi va qori.”

E uqeti Yanti e dua na yalewa didivara, na nodra sasaga na iVakadinadina i Jiova. E kaya: “Era dau vakalialiai na didivara, ia o ira na iVakadinadina i Jiova era dau lomani ira. Levu na iVakadinadina i Jiova era sega ni didivara era vukei ira na didivara mera kilai koya na Dauveibuli, me vinaka tale ga nodra bula. Sa bau veivakadrukai dina nodra cakacaka, ra qai yalodina kina.”

A yaco me iVakadinadina i Jiova o Yanti, gauna qo sa lewe tiko ni timi ni vakadewa e veivuke ena kena katoni na vidio ni Vosa Vagalu ni Idonisia na Indonesian Sign Language. E kaya: “Na vidio e vakarautaki e kena inaki me vukei ira na sega ni kila vinaka na Vosa Vagalu. Ia era vakavulici ira tale ga e levu mera bula marau, me vakainaki tale ga nodra bula.”