Ena ika6 ni Me 2017, era veivuke e rauta ni 130 na iVakadinadina i Jiova e Ukraine ena kena samaki na veikau na Bryukhovychi volekati Lviv. O ira na bolecakacaka era yabaki 22 ina 80, era vakaitikotiko qai cakacaka ena valenivolavola ni tabana ni iVakadinadina i Jiova e Ukraine, volekata na veikau qori. Era samaka e rauta ni 50 na eka, era kumuna tale ga e voleka ni 600 na kilokaramu na benu ena loma ni tolu ga na aua.

E kaya o Mykhailo Splavinskyi, e liutaka na cakacaka vakaidinia ena Lviv Forest Breeding and Drilling Center: “E dau samaki e veiyabaki na veikau qo, era veitokoni sara ga kina eliu na iVakadinadina i Jiova se tekivu sara mai na 2014.”

E kaya o Mr. Splavinskyi: “Rua na sala e benuci kina na veikau qo. Kena imatai, eso era dau benu ca. Kena ikarua, na benu mai na tarataravaki kei na so tale na benu e dau usani ena lori lelevu era qai mai biu tu eke.”

E benuci vakalevu na veikau qo. E tomana o Mr. Splavinskyi: “E dau taura toka na gauna me qai vuca na benu.” Oti “ena lai benuci kina na wai, e vakaleqa tale ga na vanua e benuci qori.” Na iyaya iloilo era biu tu ena benu qori, e rawa ni vakavuna na kama ni veikau ni katakata sivia ena matanisiga. E rawa tale ga ni veivakaleqai vei ira na gonelalai na qa ni tavaya, kei na icula era sa vakayagataki oti. E kaya tale ga: “Rawa ni wali na leqa qori nira kau laivi na benu.”

E sega ni rawarawa ni samaki na veikau e rauta ni 3,300 na eka. E kaya tale o Mr. Splavinskyi: “E lima ga na veikau lelevu va qo e Ukraine, e sega gona ni rawarawa na samaka. Qori na vuna era kerei kina na lewenivanua mera veitokoni ena kena samaki e veiyabaki.”

Era vaqaniliga, palasitika ni benu kei na reki na iVakadinadina i Jiova nira tomiki na tavaya, taya, iyaya iloilo, kaukamea, pepa, palasitika, kei na icula era sa vakayagataki oti. E kaya o Ihor Fedak, e cakacaka ena yasayasa qori, “e savasava sara ga na vanua era sasamaki kina na iVakadinadina i Jiova.”

E sega ni dua na lawa e vauca na kena wasewase na benu kece e kumuni, ia era cakava qori na bolecakacaka nira wasea na—iloilo, pepa, kei na palasitika—me vakayagataki tale. Na benu kece e kumuni ena kau ina dua na kabani e dau vakayagataka tale. Me tekivu ena 2016, era bolea na iVakadinadina i Jiova mera sauma na kena kumuni na benu. E kaya o Mr. Fedak: “Au vakavinavinakataki ira na iVakadinadina i Jiova ena nodra veivuke, e yaga dina.”

Era marautaka dina na iVakadinadina i Jiova nodra vakaitavi ena sasamaki qori. Era taleitaka tale ga mera vukei ira ena itikotiko, me savasava tiko ga kina na veikau. E kaya e dua na tagane o Volker me baleta na rai e tu vei ira: “E sega ni ka beci na sasamaki. Ia e ka dokai noqu vukei ira eso tale, e vakavu marau tale ga.”

E kaya o Anzhelika: “E sega ni bibi meu kila o cei e biuta na benu, na kena kau laivi ga.” E kaya o Lois e yabaki 78 e veivuke tale ga ena sasamaki: “Niu taubale tiko, keu raica e dua na benu au na tomika ga, mai na noqu vakaraitaka niu sega ni taleitaka.”

E kaya o Wieslaw: “Levu era dau raici keda nida vakaisulu vinaka, vakaneketai nida wasea noda vakabauta. Ia eda rawa ni veivuke tale ga nida cakava eso na cakacaka kaukaua meda vukei ira kina eso tale.”