Sa sivi qo e duanadrau na yabaki na nodra dau droinitaka na peleni ni vale na iVakadinadina i Jiova mera dau soqoni kina, era tara tale ga. Vakacava sa bau tara oti e dua na vale ni sokalou va qori ena nomu itikotiko, e vakatokai me Vale ni Soqoni? Ena yaga vakacava na Vale ni Soqoni ena nomu itikotiko?

E dau tara vakamaqosa na Vale ni Soqoni me rairai vinaka tale ga kina na itikotiko. E kaya o Jason, e dau veivuke ena kena tuvanaki na tara ni Vale ni Soqoni e Merika: “Dau lalawataki na tara ni Vale ni Soqoni yadua me rairai vinaka qai veiganiti ena itikotiko.” E kaya tale ga e dua na iVakadinadina i Jiova e dau droinitaki vale, “Keitou vinakata na gauna e tara oti kina, me vaka ga e dua na iloloma vinaka ina itikotiko, rawa tale ga ni uqeti ira na tiko voleka.”

Era iVakadinadina i Jiova kece na dau bolecakacaka mera tara Vale ni Soqoni. Era vakayagataka tale ga nodra gauna kei na nodra kila mera tara kina na vale e kaukaua vinaka. E levu era dau qoroya na nodra cakacaka vakamatai. Kena ivakaraitaki ena dua na tarataravaki e Richmond, Texas, mai Mereke, e kaya na vakailesilesi e mai dikeva na Vale ni Soqoni ni duatani sara ga na itaratara ni kena delavuvu ni vakatauvatani kei na so tale na vale. Ena yanuyanu o Jamaica, e dua tale ga na vakailesilesi va qori e kauti ira eso tale era se qai tekivu ga ena cakacaka qori, mera lai dikeva e dua na noda Vale ni Soqoni. E kaya vei ira: “Ni kua ni leqataki ira qo. Era dau muria sara vakamatau na iVakadinadina i Jiova na peleni, e vinaka cake tale ga na ka e namaki vei ira na dau taravale e ke.” E kaya e dua tale na vakailesilesi e dau dikeva na vale ni sa tara oti, e na siti o Florida, e Merika, “Au dau dikeva na tara ni valenibula kei na vale lelevu ni matanitu, ia e sega ni tuvanaki vinaka me vaka oni cakava. E vakasakiti dina na ka oni cakava.”

E dau uqeti ira e levu na nodra tiko ena Vale ni Soqoni. Era vukei mera tama, tina se gone vinaka. E vakamacalataka o Rod, e veivuke ena droinitaki ni Vale ni Soqoni: “E vanua ni veivakavulici na Vale ni Soqoni kece, e uqeti kina na itovo savasava me yaga ina itikotiko.” E tomana: “Qo na vanua o na vukei kina ni o vakila tiko na bula dredre. Era dau veikauaitaki vakayalololoma na tiko kina, e yaga vakalevu vei ira na vinakata mera vakacegui, ra via kila tale ga e levu na ka me baleta na Kalou.”

O ira na tiko ena Vale ni Soqoni era kauaitaki ira na tiko voleka, era dau veivuke totolo tale ga ni yaco na leqa tubukoso. Kena ivakaraitaki ena 2016, ni oti na vakacaca ni cagilaba o Matthew e Bahamas. Era vakavinakataka na iVakadinadina i Jiova e 254 na vale. Dua na vanua voleka e tiko kina o Violet, sa yabaki 80. E luvu na nona vale mani gole vei ira na iVakadinadina i Jiova era veivuke tiko, qai tukuna ni na saumi ira ke ra vukei koya. Era sega ni vinakata mera saumi, ia era botana na delavuvu ni nona vale me kua ni turu tiko. E biu talega na lalaga vou me vakavinakataki kina na dokanivale ni rumu. Ni sa caka oti, e mokoti ira kece o Violet, e vakavinavinakataki ira vakavica qai tukuna, “Oni tamata dina ni Kalou!”

Me vinaka tiko ga na Vale ni Soqoni, era tuvanaka na iVakadinadina i Jiova e dua na porokaramu mera vakavulici kina na lewe ni ivavakoso ena kena qaravi na nodra vale ni sokalou qo. E laurai ni yaga sara ga na kena muri. Kena ivakaraitaki, ena dua na vanua mai Arizona, a sureti ina noda Vale ni Soqoni e dua na marama. E kaya ni sa bau qaravi vinaka na noda Vale ni Soqoni. E qoroqoro tale ga ni rogoca na kena tuvanaki me vakavinakataki ni se vinaka tu mada ga na irairai ni Vale ni Soqoni. Na marama qo e dau volaivola ena tauni qori, e volaitukutukutaka gona na kena qaravi vinaka na noda Vale ni Soqoni. E qai tinia ena nona ulutaga: “Marautaki ni dua na . . . Vale ni Soqoni ena noda itikotiko.”

Oni rawa ni raica na Vale ni Soqoni ena nomuni itikotiko. Oni sureti moni gole yani kina. Oni na kidavaki kina vakayalololoma.